Xana Yesu A A Ti Languta Njhani Tipolitiki?

VATSARI va Evhangeli va hlamusela swiendlakalo swo hlayanyana swa loko Yesu a ri evutirhelini byakwe leswi n’wi endleke a hlangavetana ni swilo leswi fambisanaka ni tipolitiki. Hi xikombiso, endzhakunyana ka ku khuvuriwa ka Yesu loko a ri ni malembe ya kwalomu ka 30, Diyavulosi u n’wi tshembise ku n’wi endla mufumi wa misava. Endzhakunyana loko a ri evutirhelini byakwe, ntshungu wu lave ku n’wi endla hosi ya wona. Hi ku famba ka nkarhi, vanhu va ringete ku n’wi sindzisa ku va murhangeri wa tipolitiki. Xana Yesu u angule njhani? A hi kambisiseni swiendlakalo leswi.

Mufumi wa misava. Tievhangeli ti vula leswaku Diyavulosi u tshembise Yesu ku n’wi nyika vulawuri bya “mimfumo hinkwayo ya misava.” Ehleketa leswaku i swilo swingani leswinene leswi Yesu a a ta va a swi endlele vanhu lava xanisekaka loko a a ri mufumi wa misava! Kunene a nga kona munhu loyi a rhandzaka tipolitiki ni ku lava ku tlhantlha swiphiqo swa vanhu a nga alaka lunghelo leri ro va mufumi wa misava! Kambe Yesu u ri arile.—Matewu 4:8-11.

Hosi. Vanhu vo tala va le nkarhini wa Yesu a va lava mufumi loyi a a ta va lulamisela swiphiqo swa vona swa ikhonomi ni swa politiki. Leswi a va tsakisiwa hi vuswikoti bya Yesu, vanhu a va lava leswaku a hlanganyela eka tipolitiki. Xana u angule njhani? Yohane mutsari wa Evhangeli u ri: “Hi ku tiva leswaku a va ri kusuhi ni ku ta va ta n’wi khoma va n’wi endla hosi, Yesu a tlhelela entshaveni a ri swakwe.” (Yohane 6:10-15) Swi le rivaleni leswaku Yesu u arile ku katseka eka tipolitiki.

Murhangeri wa politiki. Xiya leswi endlekeke emahlweninyana ka ku va Yesu a dlayiwa. Vadyondzisiwa va Vafarisi, lava a va nga lavi ku fumiwa hi Mfumo wa Rhoma, va joyiniwe hi vanhu lava a va seketela Heroda, ku nga swirho swa ntlawa wa politiki leswi a swi tsakela Rhoma, leswaku va vulavula na Yesu. A va lava ku n’wi sindzisa leswaku a amukela xikhundlha eka swa tipolitiki. Va n’wi vutise loko Vayuda va fanele va hakela swibalo eRhoma.

Marka u rhekhode nhlamulo ya Yesu leyi nge: “‘Ha yini mi ndzi ringa? Ndzi tiseleni denari ndzi yi languta.’ Va yi tisa. Kutani a ku eka vona: ‘Xana xifaniso ni marito lawa i swa mani?’ Va ku eka yena: ‘I swa Khezari.’ Kutani Yesu a ku: ‘Tlheriselani swilo swa Khezari eka Khezari, kambe swilo swa Xikwembu eka Xikwembu.’” (Marka 12:13-17) Loko buku leyi nge Church and State—The Story of Two Kingdoms yi hlamusela xivangelo xo va Yesu a hlamule hi ndlela yoleyo yi gimeta hi ku: “U arile ku nghenelela eka tipolitiki naswona a a ri ni xichavo lexi enteke eka Khezari ni le ka Xikwembu.”

Mhaka ya leswaku Yesu a a nga katseki eka tipolitiki a yi vuli swona leswaku a a nga khathali hi vanhu lava a va xaniseka. Entiyisweni, Bibele yi kombisa leswaku u khumbeke swinene hi xiyimo lexi twerisaka vusiwana xa vanhu lava a va n’wi rhendzerile. (Marka 6:33, 34) Hambileswi Yesu a va tweleke vusiwana vanhu lava a va xaniseka, a nga tekanga goza ro herisa misava leyi nga ni vuhomboloki hambiloko van’wana va ringete hi matimba ku n’wi katsa eka timholovo ta le nkarhini wolowo.

Hilaha swikombiso leswi swi kombisaka hakona, swi le rivaleni leswaku Yesu u ale ku katseka eka tipolitiki. Kambe xana ku vuriwa yini hi Vakreste namuntlha? Xana va fanele va endla yini?