Xana Vakreste Namuntlha Va Fanele Va Nghenelela Eka Tipolitiki?

NAMUNTLHA, Vakreste va ntiyiso a va ngheneleli eka tipolitiki. Ha yini? Hikuva va tekelela xikombiso xa Yesu. U vule leswi malunghana na yena: ‘A ndzi xiphemu xa misava.’ Loko a vulavula hi valandzeri vakwe, u te: ‘A mi xiphemu xa misava.’ (Yohane 15:19; 17:14) Xiya swivangelo swin’wana leswi endlaka leswaku Vakreste va nga fanelanga va nghenelela eka tipolitiki.

1. Vuswikoti bya vanhu byi pimiwile. Bibele yi vula leswaku vanhu a va na vuswikoti hambi ku ri mfanelo yo tifuma. Muprofeta Yeremiya u tsale a ku: “Munhu loyi a fambaka a nga ka a nga wu kongomisi nkondzo wa yena.”—Yeremiya 10:23.

Tanihi leswi vanhu va vumbiweke va ri hava vuswikoti byo haha hi voxe, a va vumbiwanga va ri ni vuswikoti byo tifuma hi ndlela leyi humelelaka. Loko a vulavula hi swipimelo leswi swa mfumo, n’wamatimu David Fromkin u te: “Mimfumo yi endliwa hi vanhu va nyama; kutani swa olova leswaku yi tsandzeka naswona vumundzuku bya yona bya kanakanisa. Yi ni vulawuri byo karhi lebyi xiyekaka kambe byi pimiwile.” (The Question of Government) Swa twisiseka leswi Bibele yi hi lemukisaka leswaku hi nga veki ntshembo wa hina eka vanhu.—Pisalema 146:3.

2. Sweswi mimoya leyo biha yi ni nkucetelo. Loko Sathana a nyika Yesu vulawuri bya misava, Yesu a nga alanga leswaku Diyavulosi u na yona mfanelo yo n’wi nyika mimfumo hinkwayo ya misava. Entiyisweni, endzhakunyana ka xiendlakalo xexo, Yesu u vule leswaku Sathana i “mufumi wa misava.” Endzhakunyana ka malembe, muapostola Pawulo u hlamusele Sathana tanihi “xikwembu xa mafambiselo lawa ya swilo.” (Yohane 14:30; 2 Vakorinto 4:4) Pawulo u tsalele Vakreste-kulobye a ku: ‘Hi dodombisana ni vafumi va misava va munyama lowu, ni mavandla lama hombolokeke ya moya, etindhawini ta le tilweni.’ (Vaefesa 6:12) Mhaka leyi tumbeleleke vanhu hileswaku mimoya leyo biha ya matimba hi yona yi fumaka misava leyi hakunene. Xana mhaka leyi yi fanele yi ri khumba njhani langutelo ra hina hi tipolitiki?

Anakanya hi xifananisi lexi: Tanihi leswi mabyatso lamantsongo ma nga ha ndlengandlengisiwaka hi magandlati ya lwandle, mimfumo ya vanhu na yona yi ndlengandlengisiwa hi mimoya leyo biha ya matimba. Nakambe tanihi leswi xi nga riki kona lexi vatluti va mabyatso va nga xi endlaka leswaku va yimisa magandlati wolawo, varhangeri va tipolitiki va hava lexi va nga xi endlaka ku va va cinca nkucetelo wa mimoya leyo biha ya matimba. Mimoya yoleyo ya matimba yi tiyimisele ku onha vanhu hilaha ku heleleke ni ku vanga leswaku ku va ni “khombo eka misava.” (Nhlavutelo 12:12) Hikokwalaho, ku cinca ka xiviri ku nga tisiwa ntsena hi munhu loyi a nga ni matimba swinene ku tlula Sathana ni madimona yakwe. Munhu yoloye i Yehovha Xikwembu.—Pisalema 83:18; Yeremiya 10:7, 10.

3. Vakreste va ntiyiso va seketela Mfumo wa Xikwembu ntsena. Yesu ni vadyondzisiwa vakwe a va swi tiva leswaku hi nkarhi lowu vekiweke, Xikwembu a xi ta simeka hulumendhe ya le tilweni leyi nga ta fuma misava hinkwayo. EBibeleni, hulumendhe yoleyo yi vitaniwa Mfumo wa Xikwembu naswona ku vuriwa leswaku Yesu Kreste hi yena a vekiweke ku va Hosi ya yona. (Nhlavutelo 11:15) Tanihi leswi Mfumo wolowo wu katsaka vanhu hinkwavo, Yesu u endle “mahungu lamanene ya mfumo wa Xikwembu” ma va nhloko-mhaka ya tidyondzo takwe. (Luka 4:43) U tlhele a dyondzisa vadyondzisiwa vakwe ku khongela va ku: “Mfumo wa wena a wu te.” Ha yini? Hikuva ehansi ka Mfumo wolowo, ku rhandza ka Xikwembu ku ta endleka etilweni ni le misaveni.—Matewu 6:9, 10.

Kutani i yini leswi nga ta humelela eka tihulumendhe ta vanhu? Bibele yi vula leswaku tihulumendhe “ta misava hinkwayo leyi akiweke” ti ta herisiwa. (Nhlavutelo 16:14; 19:19-21) Loko munhu a kholwa leswaku ku nga ri khale Mfumo wa Xikwembu wu ta herisa mimfumo hinkwayo ya vanhu ya mafambiselo ya tipolitiki, swi le rivaleni leswaku u ta tshika ku seketela mafambiselo lawa ya tipolitiki. Phela, loko a seketela mimfumo leyi ya vanhu, entiyisweni u ta va a kanetana ni Xikwembu.

Loko Vakreste va ntiyiso va nga hlanganyeli eka tipolitiki, xana swi vula leswaku a va na mhaka ni ku ringeta ku antswisa vutomi bya vanhu lava tshamaka na vona? Kambisisa nhlamulo leyi nga eka xihloko lexi landzelaka.

[Marito lama tshahiweke exihlokweni lama nga eka tluka 7]

Timbhoni ta Yehovha ti khomekile hi ku seketela Mfumo wa Xikwembu, ku nga ri tipolitiki