Xivutiso 3: Ha Yini Xikwembu Xi Pfumelela Leswaku Ndzi Xaniseka?

TATA wa Ian a a ri xindzendzele. Hambileswi Ian a kuleke a ri karhi a kuma xin’wana ni xin’wana lexi a xi lava, a a pfumala rirhandzu leri a a navela ku ri kuma eka tata wakwe. Ian u ri: “A ndzi nga ri na xinakulobye na yena ngopfu-ngopfu hileswi a a ri xindzendzele ni ndlela leyi a a n’wi khoma ha yona Manana.” Loko Ian a ri karhi a kula, u sungule ku tivutisa loko ku ri leswaku Xikwembu xi kona. “A ndzi tibyela leswi: ‘Loko Xikwembu xi ri kona hakunene, ha yini xi pfumelela vanhu leswaku va xaniseka?’”

Ha yini u vutisa?

Hambiloko vutomi bya wena byi nga ri na xiphiqo, u nga ha karhateka loko u vona vanhu lava nga riki na nandzu va xaniseka. Hambiswiritano, xivutiso xa wena malunghana ni ku xaniseka xi va lexi xiyekaka ngopfu-ngopfu loko wena, ku fana na Ian, u xaniseka kumbe munhu loyi u n’wi rhandzaka a vabya kumbe a fa.

Xana van’wana va ri yini?

Vanhu van’wana va tshemba leswaku Xikwembu xi pfumelela ku xaniseka leswaku xi hi dyondzisa ku titsongahata ni ku va ni ntwela-vusiwana. Van’wana va vona onge vanhu va xaniseka hikwalaho ka swidyoho leswi va swi endleke eka vutomi lebyi va byi hanyeke enkarhini lowu nga hundza.

Xana tinhlamulo teto ti kombisa langutelo rihi?

Xikwembu a xi khathali hi hina kutani swa tika ku va hi xi rhandza. Xikwembu xi ni tihanyi.

Xana Bibele yi dyondzisa yini?

Bibele yi swi veka erivaleni leswaku Xikwembu a xi fanelanga xi soriwa hikwalaho ka ku xaniseka ka vanhu. Yi ri: “Loko a ri endzingweni, munhu a nga vuli a ku: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) Entiyisweni, mavonelo ya leswaku Xikwembu xi fanele xi soriwa hikwalaho ka ku xaniseka a ya fambisani ni ndlela leyi Bibele yi byi hlamuselaka ha yona vumunhu bya xona. Njhani?

Yin’wana ya timfanelo letikulu ta Xikwembu i rirhandzu. (1 Yohane 4:8) Leswaku yi kandziyisa yinhla yoleyo, Bibele yi vulavula hi Xikwembu tanihi lexi nga ni mintlhaveko yo fana ni ya manana la an’wisaka. Xikwembu xi vutise xi ku: “Xana wansati a nga rivala n’wana loyi a n’wi an’wisaka lerova a nga n’wi tweli vusiwana n’wana wa khwiri rakwe? Vavasati lava va nga rivala, kambe mina a ndzi nge ku rivali.” (Esaya 49:15) Xana u ehleketa leswaku manana la nga ni rirhandzu a nga vavisa n’wana wakwe hi vomu? Ku hambana ni sweswo, mutswari loyi a khathalaka u ta ringeta ku herisa ku xaniseka ka n’wana wakwe. Hilaha ku fanaka, Xikwembu a xi endli leswaku vanhu lava nga riki na nandzu va xaniseka.—Genesa 18:25.

Hambiloko Xikwembu xi khathala, vanhu lava nga riki na nandzu va xaniseka. U nga ha tivutisa, ‘Loko Xikwembu xi khathala hi hina naswona xi ri ni matimba hinkwawo, ha yini xi nga herisi leswi vangaka ku xaniseka?’

Xikwembu xi pfumelela ku xaniseka leswaku ku ya emahlweni sweswi hikwalaho ka swivangelo leswi twalaka. Xiya xivangelo xin’we ntsena: Hakanyingi vanhu hi vona va vangelaka van’wana ku xaniseka. Vanhu vo tala lava nga swifamona ni lava nga ni tihanyi a va tiyimiselanga ku cinca tindlela ta vona. Kutani leswaku Xikwembu xi susa nchumu lowukulu lowu vangaka ku xaniseka, xi ta boheka ku herisa vanhu vo tano.

Loko a hlamusela xivangelo xo va Xikwembu xi nga si va herisa vanhu vo tano lava endlaka swo biha, muapostola Petro u tsale a ku: “Yehovha a nga nonoki malunghana ni xitshembiso xa yena, hilaha vanhu van’wana va ehleketaka hakona leswaku i ku nonoka, kambe u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.” (2 Petro 3:9) Ku lehisa mbilu ka Yehovha Xikwembu i xikombiso xa rirhandzu ni tintswalo takwe.

Kambe, ku nga ri khale Yehovha Xikwembu u ta teka goza. U ta ‘tlherisela nhlomulo eka vanhu lava tiselaka vanhu lava nga riki na nandzu nhlomulo.’ Vanhu lava vangaka maxangu va ta “kuma nxupulo wa vuavanyisi bya ku loviseriwa makumu.”—2 Vatesalonika 1:6-9.

Ian loyi a tshahiweke eku sunguleni, u kume tinhlamulo leti enerisaka eka swivutiso swakwe malunghana ni ku xaniseka. Leswi a swi dyondzeke swi cince ndlela leyi a a byi languta ha yona vutomi. Hlaya rungula rakwe exihlokweni lexi nge “Bibele Yi Hundzula Vutomi Bya Vanhu”.

Leswaku u kuma rungula leri engetelekeke malunghana ni leswaku ha yini Xikwembu xi pfumelela ku xaniseka ni leswi xi nga ta swi endla ha kona, vona ndzima 11 ya buku leyi nge Xana Bibele Yi Dyondzisa Yini Hakunene? U nga yi kopa eka www.jw.org/ts

I Yini Leswi Yesu A Swi Vuleke Malunghana Ni Ku Xaniseka?

Yesu a nga xi vonanga nandzu Xikwembu hikwalaho ka ku xaniseka loku a a langutane na kona. Ematshan’weni ya sweswo, u endle leswi landzelaka.

Yesu u kombise leswaku Xikwembu a xi xupuli vanhu lava nga riki na nandzu hi ku endla leswaku va xaniseka. Yesu u hanyise vanhu lava vabyaka, lava lamaleke ni lava feke mahlo. (Matewu 15:30) Masingita lawa Yesu a ma endleke ma hi dyondzisa tinhla timbirhi leti xiyekaka: Yo sungula, Yesu u tirhise matimba ya Xikwembu leswaku a herisa ku xaniseka, ku nga ri ku ku vanga. Yinhla ya vumbirhi, Yesu a a ngo horisa vanhu ntsena. Loko a vona vanhu va xaniseka, a a “susumetiwa hi ntwela-vusiwana” eka vona. (Matewu 20:29-34) Yesu u yi kombise kahle ndlela leyi Tata wakwe a titwaka ha yona hi ku xaniseka. Hikokwalaho, eka mavulavulelo ni swiendlo swa Yesu, hi nga dyondza leswaku Xikwembu xi karhatiwa hi ku xaniseka loku xi ku vonaka naswona xi lava ku ku herisa.—Yohane 14:7, 9.

Yesu u vule xihlovo xa ntiyiso lexi endlaka leswaku vanhu va xaniseka—Sathana Diyavulosi. Yesu u te: “Yena a a ri mudlayi wa vanhu ku sukela eku sunguleni.” (Yohane 8:44) Yesu u tlhele a hlamusela Sathana Diyavulosi tanihi “mufumi wa misava” ni loyi a “xisaka misava hinkwayo leyi akiweke.”—Yohane 12:31; Nhlavutelo 12:9.

Yesu u hi nyike ntshembo wa nkarhi lowu ku xaniseka hinkwako ku nga ta hela. U dyondzise valandzeri vakwe ku khongela va ku: “Tata wa hina la nge matilweni, . . . Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) Loko Mfumo wa Xikwembu wu ta, a ku nge he vi ni ku xaniseka emisaveni, tanihi leswi ku nga riki na ku xaniseka etilweni.

Eka nhlavutelo leyi a yi nyikeke muapostola Yohane, Yesu u hlamusele leswi vutomi byi nga ta va xiswona eka vanhu lava nga ta hanya ehansi ka Mfumo wa Xikwembu. Hi nkarhi wolowo, Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 1:1; 21:3, 4.