TINHLAMULO TA SWIVUTISO SWA BIBELE
Xana wu kona ntshembo hi lava feke?
Rifu ri fana ni ku etlela, lerova vafi a va tivi nchumu naswona a va koti ku endla nchumu. Hambiswiritano, Mutumbuluxi wa vutomi a nga endla leswaku vafi va tlhela va hanya hi ku va pfuxa. Ku tiyisekisa sweswo, Xikwembu xi nyike Yesu matimba yo pfuxa vanhu vo hlayanyana lava a va file leswaku va tlhela va hanya.—Hlaya Eklesiasta 9:5; Yohane 11:11, 43, 44.
Xana rifu ri fana ni ku etlela hi ndlela yihi?
Xikwembu xi tshembisa leswaku vanhu lava feke lava nga emianakanyweni ya xona va ta pfuxiwa leswaku va ta hanya emisaveni leyintshwa yo lulama. Lava nga ta pfuxiwa va ta hambeta va ri emasirheni kukondza Xikwembu xi tlhela xi va nyika vutomi. Xikwembu xa Matimba Hinkwawo xi ta tirhisa matimba ya xona leswaku xi nyika vanhu lava feke vutomi.—Hlaya Yobo 14:14, 15.
Xana ku pfuxiwa ka vafi ku ta va njhani?
Loko Xikwembu xi pfuxa vanhu, va ta kota ku tsundzuka leswi vona va nga swona, vanghana ni mindyangu ya vona. Hambileswi miri wa munhu wu bolaka, Xikwembu xi ta pfuxa munhu yoloye a ri ni miri lowuntshwa.—Hlaya 1 Vakorinto 15:35, 38.
Vanhu va nga ri vangani va ta pfuxiwa leswaku va ya hanya etilweni. (Nhlavutelo 20:6) Vo tala lava nga ta pfuxiwa va ta hanya laha misaveni eparadeyisini leyi vuyeteriweke. Va ta nyikiwa nkarhi, hi xikongomelo xa leswaku va hanya hilaha ku nga heriki.—Hlaya Pisalema 37:29; Mintirho 24:15.