TINHLAMULO TA SWIVUTISO SWA BIBELE
Xana pulanete ya hina yi endliwe hi xikongomelo?
Misava a yi endliwe leswaku yi va kaya ra vanhu lava tsakeke
Pulanete ya hina yi endliwe leswaku ku tshama swilo hinkwaswo leswi hanyaka. Yi ni mati lama eneleke lama nga ya nkoka eka swilo leswi hanyaka. Ku rhendzeleka ka misava i ka nkoka hikuva ku endla leswaku lwandle ri nga gwitsili kumbe ri tshwa. Atimosifiya ya misava ni matimba ya yona ya maginete swi yi sirhelela eka ku hisa lokukulu loku dlayaka. Swimilana leswi titshegeke hi swimilana swin’wana ni vutomi bya swiharhi swa hlamarisa. Hikwalaho ka sweswo, vanhu vo tala va gimete hi ku vula leswaku pulanete ya hina yi endliwe hi xikongomelo.—Hlaya Esaya 45:18.
Kambe u nga ha tivutisa: ‘Xana ku xaniseka ni ku pfumala vululami i xiphemu xa xikongomelo xexo?’—Hlaya Deteronoma 32:4, 5.
Xana xikongomelo xa misava xi ta kala xi hetiseka?
Misava yi endliwe leswaku ku va kaya lerinene ra vanhu lava xiximaka ni ku rhandza Muvumbi wa vona. Hikokwalaho, vutomi bya vanhu byi ni xikongomelo ku tlula bya swiharhi. Hina vanhu hi nga kota ku tiva leswaku Muvumbi wa hina i mani, hi n’wi xixima hi tlhela hi tekelela rirhandzu ni vululami byakwe.—Hlaya Eklesiasta 12:13; Mikiya 6:8.
Muendli wa hina a nga hetisisa swikongomelo hinkwaswo leswi a lavaka ku swi endla. Kutani hi nga tiyiseka leswaku u ta herisa ku xaniseka ni ku kala vululami naswona a endla pulanete ya hina yi va kaya leri hetisekeke ni leri tsakisaka eka vanhu.—Hlaya Pisalema 37:11, 29; Esaya 55:11.