NHLOKOMHAKA YA XIFUNENGETO | NDLELA YO TSAKELA NTIRHO WA WENA
Ku Tirha Hi Matimba—Xana Ku Hundzeriwe Hi Nkarhi?
Alex wa hefemuteka loko a ri karhi a tlakula bokisi leswaku a ta ri veka eka lori ya khampani leyi a tirhaka eka yona. U tivutisa a ku: ‘Ha yini ndzi ri eka ntirho lowu swi nga tshembisiki leswaku ndzi ta tlakusiwa? Xana ndzi ta tlakusiwa rini? Vutomi bya mina a byi ta antswa loko a swi nga bohi leswaku ndzi tirha!’
Ku fana na Alex, vo tala a va swi tsakeli ku tirha hi matimba. Aaron loyi a lunghisaka timovha u ri: “Vanhu vo tala va anakanya leswaku swa va tsongahata loko va tirha ntirho wa le hansi. Va tibyela va ku: ‘Ndzi ta endla ntirho lowu ku kondza ndzi kuma ntirho wa kahle.’”
Ha yini vo tala va tivona va nga faneriwi hi ku endla ntirho lowu lavaka matimba? Kumbexana va kuceteriwa hi leswi va swi vonaka ni ku swi twa eka thelevhixini, laha hakanyingi ku vulavuriwaka hi vutomi bya vulovolovo tanihi lebyi olovaka. Matthew loyi ntirho wa yena ku nga ku lunghisa swilo leswi onhakeke u ri: “Vanhu va anakanya leswaku loko u tirha ntirho lowu lavaka matimba a wu nge humeleli.” Shane loyi ntirho wa yena ku nga ku basisa u swi xiyile sweswo. U ri: “Vanhu a va ha swi lavi ku tirha ntirho lowu lavaka leswaku va tirha siku hinkwaro.”
Hi hala tlhelo, vanhu vo tala lava humeleleke va swi tsakela ku tirha hi matimba. Daniel la nga ni malembe ya 25 loyi ntirho wa yena ku nga ku aka u ri: “Ndzi anakanya leswaku ntirho lowu lavaka matimba wa vuyerisa swinene, ngopfungopfu loko u tirha u ri ni swikongomelo swo karhi leswinene.” Andre la nga ni malembe ya 23 u pfumelelana na yona mhaka leyi. U ri: “Ndzi tshemba leswaku ntsako ni ku tiphina swi fambisana ni ntirho. Ku tirha u nga tiyimiseli a swi nge ku endli u tsaka nkarhi wo leha kambe swi ta ku siya u nga tsakanga!”
I yini lexi endleke leswaku Daniel na Andre va va ni langutelo lerinene hi ntirho lowu lavaka matimba? Hi leswi va hanyaka hi milawu ya Bibele evuton’wini bya vona. Bibele yi khutaza vanhu leswaku va tirha hi matimba va tlhela va tiyisela. Kambe Bibele a yi khutazi ku tirha ntsena. Yi tlhela yi hi komba ndlela leyi hi nga wu tsakelaka ha yona ntirho wa hina.
Hi yihi milawu ya le Bibeleni leyi nga ku pfunaka leswaku u eneriseka hi ntirho wa wena? Hi ku rhamba leswaku u xiya yin’wana ya yona leyi nga ta hlamuseriwa eka nhlokomhaka leyi landzelaka.