Rifu Ra Yesu Ni Ku Pfuxiwa Ka Yena—Ndlela Leyi Swi Nga Ku Pfunaka Ha Yona

Vanhu a va nga tumbuluxeriwanga ku fa

“Kutani Yehovha Xikwembu a teka munhu a n’wi veka entangeni wa Edeni leswaku a wu rima ni ku wu khathalela. Yehovha Xikwembu a tlhela a nyika munhu xileriso a ku: ‘U nga ha tidyela u eneriseka eka murhi wun’wana ni wun’wana wa ntanga. Kambe loko ku ri murhi wa ku tiva leswinene ni leswo biha u nga tshuki u wu dya hikuva siku u nga ta wu dya, u ta fa hakunene.’”—Genesa 2:15-17.

Xikwembu xi veke wanuna wo sungula Adamu, entangeni wa Edeni laha a ku ri paradeyisi leyi a yi tele hi swiharhi ni swimilana swo saseka. Kwalaho a ku ri ni mirhi ya mihandzu leyi Adamu a a ta tiphina ha yona. Kambe Yehovha Xikwembu u byele Adamu leswaku a nga dyi eka nsinya wo karhi hikuva loko o dya eka wona u ta fa.

Xana Adamu u yi twisisile mhaka yoleyo? A a swi tiva leswaku ku fa swi vula yini; u swi vonile swiharhi swin’wana swi fa. Kambe u swi xiyile leswaku loko a yingisa Xikwembu naswona a nga dyi eka murhi wolowo, a a ta hanya hilaha ku nga heriki a nga fi.

Van’wana va tshemba leswaku murhi wolowo a wu fanekisela timhaka ta masangu kambe sweswo a hi ntiyiso. Kambe Yehovha a a lava leswaku Adamu na Evha va ‘tswala va andza, va tata misava, va yi fuma.’ (Genesa 1:28) Nawu lowu a va nyikiwe wona, a wu ri wa murhi wa xiviri. Yehovha u vule leswaku i “murhi wa ku tiva leswinene ni leswo biha” hikuva a wu fanekisela vulawuri byakwe bya ku tiva leswaku i yini leswi lulameke ni swo biha eka vanhu. Loko Adamu a a nga dyanga mbhandzu wa murhi wolowo, a a ta va a kombise leswaku wa yingisa ni ku tlangela Loyi a nga n’wi vumba a tlhela a n’wi katekisa swinene.

Adamu u file hikuva a nga xi yingisanga Xikwembu

[Xikwembu xi] ku eka Adamu: ‘Hikwalaho ka leswi u [nga] dya eka murhi lowu ndzi ku leriseke eka wona, . . . u ta dya xinkwa hi nyuku wa xikandza xa wena kukondza u tlhelela emisaveni hikuva u humesiwe eka yona. Hikuva u ntshuri u ta tlhelela entshurini.’”—Genesa 3:17, 19.

Adamu u dye eka murhi lowu a a byeriwe leswaku a nga dyi eka wona. Xiendlo xolexo xa ku nga yingisa a xi bihe ngopfu. A ku ri ku xandzuka, a swi ri erivaleni leswaku a a nga swi tlangeli hinkwaswo leswinene leswi Yehovha a n’wi endleleke swona. Leswi Adamu a dyeke mbhandzu wolowo, a swi kombisa ku va a fularhele Yehovha ivi a hlawula ku tilawula naswona sweswo swi ve ni vuyelo byo vava swinene.

Eku heteleleni Adamu u file hilaha Yehovha a a vule hakona. Xikwembu xi endle Adamu “hi ntshuri wa misava” xi tlhela xi n’wi byela leswaku u ta “tlhelela entshurini.” Adamu a nga tlhelanga a hanya a ri nchumu wun’wana kumbe endhawini yin’wana. Loko a fa, a a nga ha ri nchumu ku fana ni ntshuri lowu a endliweke ha wona.—Genesa 2:7; Eklesiasta 9:5, 10.

Ha fa hikuva hi huma eka Adamu

“Xidyoho xi nghene emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.”—Varhoma 5:12.

Ku nga yingisi ka Adamu—kumbe xidyoho—ku ve vuyelo bya nkarhi wo leha. Leswi Adamu a dyoheke a nga lahlekeriwanga hi ku hanya nkarhi lowu tolovelekeke wo tanihi malembe ya 70 kumbe 80, kambe u lahlekeriwe hi ku hanya hilaha ku nga heriki. Ku tlula kwalaho, u tlhele a lahlekeriwa hi ku va loyi a hetisekeke naswona hinkwerhu u hi tlulete ku nga hetiseki koloko.

Hinkwerhu hi vatukulu va Adamu. Eka yena hi kume miri lowu nga hetisekangiki lowu voyameleke eka xidyoho naswona emakumu ha fa. Pawulo u xi hlamusele kahle xiyimo lexi. U tsale a ku: “Ndzi xaviseriwe xidyoho. Mina munhu wa maxangu! I mani loyi a nga ta ndzi ponisa eka miri lowu weriwaka hi rifu leri?” Pawulo u tlhela a hlamula xivutiso xakwe a ku: “Ndzi nkhensa Xikwembu ha Yesu Kreste Hosi ya hina!”—Varhoma 7:14, 24, 25.

Yesu u nyikele hi vutomi byakwe leswaku hi kota ku hanya hilaha ku nga heriki

“Tatana u rhume N’wana wa yena leswaku a va Muponisi wa misava.”—1 Yohane 4:14.

Yehovha Xikwembu u endle lunghiselelo leswaku a hlula vuyelo bya xidyoho naswona a hi tshunxa eka rifu. Njhani? U rhumele N’wana wakwe loyi a rhandzekaka a suka etilweni leswaku a ta velekiwa tanihi munhu la hetisekeke ku fana na Adamu. Yesu a nga fani na Adamu hikuva “a nga xi endlanga xidyoho.” (1 Petro 2:22) Leswi a a hetisekile, a nga vanga ehansi xidyoho naswona a a ta va a hanye hilaha ku nga heriki a ri munhu wa nyama loyi a hetisekeke.

Kambe Yehovha u pfumelele Yesu leswaku a dlayiwa hi valala va yena. Endzhaku ka masiku manharhu, Yehovha u n’wi pfuxile a ri munhu wa moya leswaku a ta tlhelela etilweni. Loko Yesu a ri kwalaho u nyikele eka Xikwembu nkoka wa vutomi bya yena lebyi hetisekeke leswaku a hakela leswi Adamu na hina vanhu hi lahlekeriweke ha swona. Yehovha u xi amukerile xitlhavelo xolexo a endla leswaku swi koteka leswaku lava kombisaka ripfumelo eka Yesu va kuma vutomi lebyi nga heriki.—Varhoma 3:23, 24; 1 Yohane 2:2.

Yesu u vuyise leswi lahliweke hi Adamu. U hi ferile leswaku hi ta hanya hilaha ku nga heriki. Bibele yi ri: “Yesu . . . u file leswaku hi musa lowu nga faneriwiki wa Xikwembu a ta nantswa rifu hikwalaho ka vanhu hinkwavo.”—Vaheveru 2:9.

Lunghiselelo leri ri vula swo tala hi Yehovha. Vululami byakwe lebyi tlakukeke byi endle leswaku swi nga koteki ku va vanhu lava nga hetisekangi va ti ponisa. Hikwalaho, rirhandzu ni musa wa yena swi n’wi endle leswaku a nyikela hi N’wana wakwe leswaku a va nkutsulo.—Varhoma 5:6-8.

Yesu u pfuxiwe eku feni naswona ni vanhu van’wana na vona va ta pfuxiwa

“Kreste se u pfuxiwile eka lava feke, a va xirhangana xa lava va etleleke eku feni. Hikuva tanihi leswi rifu ri nga kona hikwalaho ka munhu, ni ku pfuka ka vafi ku va kona hikwalaho ka munhu. Hikuva tanihi leswi hinkwavo va faka eka Adamu, kutani hinkwavo va ta hanyisiwa eka Kreste.”—1 Vakorinto 15:20-22.

A swi kanakanisi leswaku Yesu u hanyile a tlhela a fa kambe xana hi byihi vumbhoni lebyi kombisaka leswaku u pfuxiwile eku feni? Vumbhoni lebyikulu hileswaku loko a pfuxiwile u humelele eka vanhu vo tala eka swiyimo swo hambanahambana ni le tindhawini to tala. Nakambe u humelele eka vanhu vo tlula 500. Muapostola Pawulo u tsale hi swoleswo eka papila leri a ri tsaleleke Vakorinto a xiya leswaku timbhoni tin’wana a ta ha hanya naswona a anakanya leswaku ti nga ha vula leswi ti swi voneke.—1 Vakorinto 15:3-8.

Xa nkoka hileswaku, loko Pawulo a tsala leswaku Kreste a a ri “xirhangana” xa lava pfuxiweke, a a kombisa leswaku van’wana na vona va ta pfuxiwa. Yesu hi byakwe u vule leswaku nkarhi wu tata laha “hinkwavo lava nga eka masirha-bako ya xitsundzuxo” va nga ta “huma.”—Yohane 5:28, 29.

Hi fanele hi va ni ripfumelo eka Yesu leswaku hi hanya hilaha ku nga heriki

“Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16.

Buku yo sungula ya Bibele yi hi byela hi nkarhi lowu rifu ri sunguleke ha wona ku tlhela ku lahleka Paradeyisi. Buku yo hetelela yi hi byela hi nkarhi lowu rifu ri nga ta herisiwa ha wona naswona Xikwembu xi ta vuyisa Paradeyisi laha emisaveni. Hi nkarhi wolowo vanhu va ta hanya va tsakile hilaha ku nga heriki. Nhlavutelo 21:4 yi ri: “Rifu a ri nge he vi kona.” Lexi tiyisekisaka xitshembiso xolexo i ndzimana ya vuntlhanu leyi nge: “Marito lawa ma tshembekile, i ya ntiyiso.” Leswi Yehovha a swi tshembisaka u ta swi endla hi ku helela.

Xana wa pfumela leswaku “marito lawa ma tshembekile, i ya ntiyiso”? Dyondza swo tala hi Yesu Kreste u tlhela u va ni ripfumelo eka yena. Loko u endla tano, u ta amukeleka eka Yehovha. U ta kuma mikateko yakwe yo tala sweswi u tlhela u va ni ntshembo wa ku hanya hilaha ku nga heriki emisaveni leyi nga Paradeyisi laha ‘rifu ri nga ta va ri nga ha ri kona, hambi ku ri ku kolola, ni xirilo ni xitlhavi a swi nge he vi kona.’