NHLOKOMHAKA YA XIFUNENGETO | TIMBHONI TA YEHOVHA I VAMANI?
Ha Yini Hi Chumayela?
Hina Timbhoni ta Yehovha hi tiviwa ngopfu hi ntirho wa hina wo chumayela hi yindlu ni yindlu, eka tindhawu ta mani na mani, ni hinkwako laha vanhu va kumekaka kona. Ha yini hi chumayela?
Hi chumayela leswaku hi dzunisa Xikwembu, ni ku endla leswaku vito ra xona ri tiviwa. (Vaheveru 13:15) Nakambe hi yingisa leswi Kreste Yesu a swi leriseke loko a ku: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.”—Matewu 28:19, 20.
Ku tlula kwalaho, hi rhandza vaakelani va hina. (Matewu 22:39) Ha swi xiya leswaku vanhu vo tala va ni tikereke ta vona, ni leswaku a hi hinkwavo va tsakelaka rungula ra hina. Hambiswiritano, ha tshemba leswaku tidyondzo ta Bibele ti ponisa vutomi. Hikokwalaho hi ‘hambeta hi nga rhuteli ku dyondzisa ni ku vula mahungu lamanene hi Kreste, Yesu,’ hilaha Vakreste va khale va endleke hakona.—Mintirho 5:41, 42.
Mutivi wa ntshamisano Antonio Cova Maduro, u te: “Timbhoni ta Yehovha, ti endla matshalatshala leswaku matsalwa yo kwetsima ma fikelela tindhawu ta le kule swinene ta misava.”—Phephahungu ra El Universal, Venezuela
Vanhu vo tala lava hlayaka tibuku ta hina a hi Timbhoni ta Yehovha. Kasi vanhu va timiliyoni lava hi dyondzaka na vona Bibele i va vukhongeri byin’wana. Kambe va tsaka leswi Timbhoni ti va endzelaka ku ta dyondza na vona.
I ntiyiso leswaku u nga ha va ni swivutiso swin’wana hi Timbhoni ta Yehovha. Loko swi ri tano u nga kuma tinhlamulo hi ku
Vutisa un’wana wa Timbhoni ta Yehovha.
Nghena eka website ya hina ya www.jw.org/ts.
Ta eminhlanganweni ya hina, leyi nga mahala.