Ku Seketela Vuhosi Bya Yehovha A Ku Ve Nchumu Wa Nkoka eVuton’wini Bya Wena

1, 2. (a) Hi yihi mhaka ya nkoka leyi khumbaka vanhu hinkwavo? (b) Hikwalaho ka yini swi ri swa nkoka ku seketela vuhosi bya Yehovha?

MALI i nchumu wa nkoka swinene eka vanhu vo tala namuntlha. Vanhu vo tala va heta nkarhi wo tala va ri karhi va lava tindlela to kuma mali yo tala kumbe to hlayisa leswi va nga na swona. Eka van’wana ku va ni ndyangu, ku va ni rihanyo lerinene kumbe ku fikelela swilo leswi va swi lavaka i swa nkoka swinene.

² Hambiswiritano, mhaka ya nkoka swinene leyi hi khumbaka hinkwerhu i ku seketeriwa ka vuhosi bya Yehovha. Hi fanele hi tivonela leswaku hi nga yi tekeli ehansi mhaka leyi ya nkoka. Sweswo swi nga endlekisa ku yini? Hi nga ha khomeka hi mitirho ya siku ni siku lerova hi rivala ndlela leyi vuhosi bya Xikwembu byi nga bya nkoka ha yona. Kumbexana hi nga ha pfumelela miringo yo tika leyi hi langutanaka na yona yi hi kavanyeta. Loko hi seketela vuhosi bya Yehovha swi ta endla leswaku hi kota ku langutana ni swiphiqo swa hina swa siku ni siku. Kutani sweswo swi ta endla leswaku hi tshinela ekusuhi na Yehovha.

LEXI ENDLAKA KU SEKETELA VUHOSI BYA YEHOVHA SWI VA SWA NKOKA

3. Sathana u vule yini mayelana ni ndlela leyi Xikwembu xi fumaka ha yona?

³ Leswi Sathana Diyavulosi a swi vuleke swi tlakuse xivutiso xa loko Yehovha Xikwembu a ri ni mfanelo yo fuma hakunene. U vule leswaku vuhosi bya Xikwembu a hi byinene ni leswaku a xi hi naveleli swilo leswinene. Hi ku ya hi Diyavulosi vanhu a va ta va va tsakile va tlhela va tiphina loko va tifuma. (Gen. 3:1-5) Sathana u tlhele a vula leswaku vanhu a va nge swi koti ku tshama va tshembekile eka Xikwembu loko va langutane ni miringo leyikulu. (Yobo 2:4, 5) Hikwalaho ka swihehlo leswi swa Diyavulosi, Yehovha u nyika vanhu nkarhi wo vona leswaku swilo a swi nge va fambeli kahle loko va nga fumiwi hi yena.

4. Ha yini mhaka ya ku soriwa ka mfanelo ya Xikwembu yo fuma yi fanele yi lulamisiwa?

⁴ Yehovha wa swi tiva leswaku leswi Diyavulosi a swi vuleke i mavunwa. Kutani hikwalaho ka yini Xikwembu xi nga yi lulamisanga hi xihatla mhaka leyi? Nhlamulo ya kona yi khumba tintsumi ni vanhu. (Hlaya Pisalema 83:18.) Phela vatekani vo sungula va ale ku fumiwa hi Yehovha naswona ku sukela kwalaho ni van’wana vo tala va endle tano. Leswi a swi ta endla leswaku van’wana va tivutisa loko leswi vuriweke hi Diyavulosi ku ri ntiyiso. Loko vanhu ni tintsumi va nga yi kumi nhlamulo ya xivutiso xexo, a ku nge vi na ku rhula exikarhi ka matiko, tinxaka ta vanhu ni le mindyangwini. Kambe loko vuhosi bya Yehovha byi kumeke byi faneleka ku fuma, hinkwerhu hi ta titsongahatela ku fumiwa hi Mfumo wakwe wo lulama hilaha ku nga heriki. Emisaveni hinkwayo ku ta tlhela ku va ni ku rhula.—Efe. 1:9, 10.

5. Hi byihi vutihlamuleri lebyi hi nga na byona eku seketeleni ka vuhosi bya Yehovha?

⁵ Xikwembu xi ta kumeka xi faneleka ku fuma kutani mfumo wa Sathana ni wa vanhu swi ta lovisiwa tanihi leswi swi nga ta va swi tsandzeke hilaha ku heleleke. Mfumo wa Xikwembu lowu Hosi ya wona ku nga Mesiya wu ta fuma hi ndlela leyinene naswona vanhu vo tshembeka va ta va va swi kombisile leswaku va seketela Mfumo wa xona. (Esa. 45:23, 24) Xana wa swi lava ku va exikarhi ka vanhu lava seketelaka vuhosi bya Yehovha hi ku tshembeka? A swi kanakanisi leswaku wa swi lava. Leswaku hi endla tano hi fanele hi tshama hi ri karhi hi anakanya hi mhaka yoleyo ya nkoka ya vuhosi bya Yehovha hi tlhela hi twisisa ndlela leyi yi nga ya nkoka ha yona.

VUHOSI BYA YEHOVHA I BYA NKOKA SWINENE KU TLULA KU PONISIWA KA HINA

6. Vuhosi bya Yehovha i bya nkoka ku fikela kwihi?

⁶ Hilaha se hi dyondzeke hakona, vuhosi bya Yehovha i mhaka ya nkoka swinene leyi khumbaka vanhu hinkwavo. I ya nkoka swinene ku tlula nchumu wihi ni wihi lowu nga endlaka leswaku hi tsaka. Xana sweswo swi vula leswaku Yehovha a nga na mhaka na hina kumbe ku ponisiwa ka hina? A swi tano nikatsongo. Ha yini hi vula tano?

7, 8. Ha yini ku faneleka ka vuhosi bya Xikwembu ku katsa ku hetiseka ka switshembiso swa xona?

⁷ Yehovha u va rhandza swinene vanhu naswona u va teka va ri va nkoka. Hi rirhandzu u tirhise ngati ya N’wana wakwe leswaku hi ta kota ku ponisiwa. (Yoh. 3:16; 1 Yoh. 4:9) Loko Yehovha Xikwembu a a nga swi hetisisi switshembiso swakwe, Diyavulosi a a ta vula leswaku Yehovha i muhembi loyi a tsonaka vanhu vakwe swilo leswinene naswona a nga fumi hi ndlela leyinene. Nakambe vakaneti a va ta va va tiyisile loko va ku: “Byi kwihi vukona byakwe lebyi tshembisiweke? Hikuva, ku sukela siku vatata wa hina va etleleke ha rona eku feni, swilo hinkwaswo swa ha tshame hilaha a swi ri hakona eku sunguleni ka ntumbuluko.” (2 Pet. 3:3, 4) Hikwalaho Yehovha u ta tiyiseka leswaku ku kumeka ka vuhosi byakwe byi ri lebyi fanelekaka swi ta katsa ku ponisiwa ka vanhu lava yingisaka! (Hlaya Esaya 55:10, 11.) Ku tlula kwalaho, Yehovha u fuma hi ndlela ya rirhandzu. Kutani hi nga tiyiseka leswaku u ta tshama a ri karhi a ma rhandza ni ku ma teka ma ri ya nkoka malandza yakwe yo tshembeka.—Eks. 34:6.

⁸ Ku teka vuhosi bya Yehovha byi ri bya nkoka swinene, a swi vuli swona leswaku hi teka ku ponisiwa ka hina ku nga ri ka nkoka eka yena. Hi fanele hi va ni langutelo lerinene loko swi ta emhakeni ya vuhosi bya Yehovha ni ku ponisiwa ka hina. Ku endla tano swi ta hi pfuna leswaku hi tshama hi ri karhi hi anakanya hi mhaka yoleyo ya nkoka ni ku tlhela hi seketela ndlela leyinene leyi Yehovha a fumaka ha yona.

YOBO U CINCE LANGUTELO RAKWE

9. Sathana u vule yini hi Yobo? (Vona xifaniso lexi nga eku sunguleni ka xihloko lexi.)

⁹ Ku va ni langutelo lerinene swi kombisiwe kahle ebukwini ya Yobo, ku nga yin’wana ya tibuku to sungula ku tsariwa eBibeleni. Eka yona hi hlaya leswaku Sathana u vule leswaku loko Yobo o weriwa hi maxangu, a a ta tshika ku tirhela Xikwembu. Sathana u tlhele a byela Xikwembu leswaku xi vangela Yobo maxangu. Yehovha a nga pfumelanga kambe u pfumelele Sathana leswaku a ringa Yobo, u te: “Hinkwaswo leswi a nga na swona swi le vokweni ra wena.” (Hlaya Yobo 1:7-12.) Hi xinkarhana, Yobo u feriwe hi malandza yakwe, u lahlekeriwe hi rifuwo rakwe ni ku feriwa hi vana vakwe va khume. Sathana u endle swilo leswi onge hiloko Xikwembu a ku ri xona lexi a xi vangela Yobo maxangu wolawo. (Yobo 1:13-19) Endzhaku ka sweswo, Sathana u vangele Yobo vuvabyi byo chavisa swinene. (Yobo 2:7) Lexi n’wi twiseke ku vava swinene i marito yo tlhava lawa nsati wakwe ni vavanuna vanharhu lava a va tiendla onge i vanghana vakwe va n’wi byeleke wona.—Yobo 2:9; 3:11; 16:2.

10. (a) Yobo u swi kombise njhani leswaku wa tshembeka eka Xikwembu? (b) Hikwalaho ka yini langutelo leri a ri na rona a ri fanele ri lulamisiwa?

¹⁰ Vuyelo byi ve byihi? Leswi Sathana a swi vuleke swi swi veke erivaleni leswaku i muhembi. Yobo u ye emahlweni a tirhela Xikwembu hi ku tshembeka. (Yobo 27:5) Kambe ku ve ni nkarhi lowu Yobo a veke ni langutelo leri hoxeke. U sungule ku tivona a lulame ku tlula mpimo naswona a a tshamela ku lava ku tiva leswaku ha yini a xaniseka. (Yobo 7:20; 13:24) Hi nga anakanya leswaku sweswo a swi twala endzhaku ka loko a weriwe hi maxangu wolawo. Kambe, Xikwembu xi vone swi fanerile leswaku xi lulamisa langutelo ra Yobo. Xana Yehovha u n’wi byele yini Yobo?

11, 12. Yehovha u n’wi pfune njhani Yobo leswaku a cinca vonelo rakwe naswona Yobo u angule njhani?

¹¹ Marito lawa Xikwembu xi ma byeleke Yobo ko va tindzima ta mune ntsena ebukwini ya Yobo, ma sungula eka ndzima 38 ku ya fika eka ndzima 41. A ku kona laha Xikwembu xi byeleke Yobo leswaku hikwalaho ka yini a xaniseka. Xikongomelo xa Yehovha a ku nga ri ku byela Yobo leswaku hikwalaho ka yini a xaniseka, onge hiloko Xikwembu xi lava ku tiyimelela. Kambe Yehovha Xikwembu a a lava ku pfuna Yobo ku vona leswaku a nga ri nchumu loko a ringanisiwa na yena. Nakambe Yehovha u pfune Yobo ku vona leswaku ku ni swilo swa nkoka ngopfu leswi a nga karhatekaka ha swona ku tlula ku karhateka hi yena n’wini. (Hlaya Yobo 38:18-21.) Leswi swi endle leswaku Yobo a cinca langutelo rakwe.

¹² Xana ku va Yehovha a tshinye Yobo endzhaku ka maxangu lawa a langutaneke na wona, a swi vula leswaku a nga n’wi tweli vusiwana? A swi tano naswona Yobo a nga anakanyi tano. Ku nga khathariseki maxangu yakwe, Yobo u cince langutelo rakwe. U tlhele a ku: “Ndzi tlhentlhela endzhaku, ndza hundzuka entshurini ni le nkumeni.” U vule sweswo hikwalaho ka leswi Yehovha a n’wi tshinyeke hi ku kongoma naswona hi ndlela leyi khutazaka. (Yobo 42:1-6) Emahlweni ka kwalaho, Elihu loyi a ha ri muntshwa u tshinye Yobo. (Yobo 32:5-10) Endzhaku ka loko Yobo a yingise ndzayo ya Xikwembu ivi a lulamisa langutelo rakwe, Yehovha u vule leswaku wa tsaka hileswi Yobo a tshameke a tshembekile eka yena hambiloko a langutane ni maxangu.—Yobo 42:7, 8.

13. Ndzayo leyi Yehovha a yi nyikeke Yobo a yi ta n’wi pfuna njhani hi ku famba ka nkarhi?

¹³ Ndzayo leyi Yehovha a yi nyikeke Yobo a yi ta ya emahlweni yi n’wi pfuna hambiloko se maxangu yakwe ma herile. Njhani? Hambileswi “Yehovha a [katekiseke] makumu ya Yobo ku tlula masungulo yakwe,” swi fanele swi teke nkarhi leswaku a tlhela a va ni rifuwo ni ku hola evuvabyini byakwe. Hi ku famba ka nkarhi u “[ve] ni vana va majaha va nkombo ni va vanhwanyana vanharhu.” (Yobo 42:12-14) A swi kanakanisi leswaku Yobo a a va tsundzuka vana vakwe lava dlayiweke hi Sathana. Swi nga endleka ku ringana nkarhi wo karhi a a pfa a tsundzuka maxangu lawa ma tshameke ma n’wi wela. Hambileswi a nga ha vaka a hetelele a twisise xivangelo xa maxangu yakwe, swi nga endleka mikarhi yin’wana a a tivutisa leswaku ha yini a xaniseke hi ndlela yoleyo. Ku nga khathariseki leswi a a swi anakanya, a anakanyisisa hi ndzayo leyi Xikwembu xi n’wi nyikeke yona. Ku endla tano a swi ta n’wi pfuna leswaku a tshama a ri ni langutelo lerinene ni ku n’wi chavelela.—Ps. 94:19.

14. Hi nga dyondza yini emhakeni ya Yobo?

¹⁴ Na hina hi nga va ni langutelo lerinene hi tlhela hi chaveleriwa hi rungula ra Yobo. Naswona Yehovha u ri hlayisele “ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Rhom. 15:4) Hi dyondza yini emhakeni leyi? Hi dyondza leswaku a hi fanelanga hi karhateka ngopfu hi hina vini lerova hi rivala hi mhaka ya nkoka swinene, ku nga ku lweriwa ka vuhosi bya Yehovha. A hi yeni emahlweni hi tlangela lunghelo leri hi nga na rona ro seketela vuhosi bya Yehovha hi ku tshama hi tshembekile hambiloko hi langutana ni swiyimo swo tika hilaha Yobo a endleke hakona.

15. Loko hi tshembeka hambiloko hi langutana ni miringo swi ta hi vuyerisa njhani?

¹⁵ Ha yini swi chavelela ku anakanyisisa hi vuyelo lebyi vaka kona loko hi tshembeka? Hikuva miringo yi hetisisa xikongomelo xo karhi. Ematshan’weni yo kombisa leswaku Yehovha a nga khathali ha hina, yi hi nyika nkarhi wo kombisa leswaku hi seketela vuhosi bya Xikwembu. (Swiv. 27:11) Ku tiyisela ka hina ku endla leswaku hi va lava ‘amukelekaka’ naswona ku tiyisa ntshembo wa hina. (Hlaya Varhoma 5:3-5.) Rungula ra Yobo ri kombisa leswaku “Yehovha u ni xinakulobye lexikulu swinene ni tintswalo.” (Yak. 5:11) Kutani hi nga tiyiseka leswaku u ta hi hakela swin’we ni hinkwavo lava seketelaka vuhosi byakwe. Ku tiva sweswo swi endla leswaku hi kota ku “tiyisela hi ku helela ni ku va ni mbilu yo leha hi ntsako.”—Kol. 1:11.

TSHAMA U RI KARHI U ANAKANYA HI VUHOSI BYA YEHOVHA

16. Ha yini hi fanele hi titsundzuxa hi nkoka wo seketela vuhosi bya Yehovha?

¹⁶ Ku tshama hi ri karhi hi anakanya hi ku seketela vuhosi bya Yehovha swi nga va ntlhontlho. Mikarhi yin’wana swiphiqo leswi hi nga na swona swi nga hi tshikilela. Hambi ku ri swiphiqo leswitsongo swi nga hi heta matimba loko hi tshamela ku anakanya ha swona. Hikwalaho, hi endla kahle loko mikarhi hinkwayo hi titsundzuxa nkoka wo seketela vuhosi bya Yehovha hambiloko hi langutana ni swiyimo swo tika.

17. Xana ku hisekela ntirho lowu Yehovha a hi nyikeke wona swi nga hi pfuna njhani leswaku hi tshamela ku anakanya hi vuhosi bya yena?

¹⁷ Loko hi ya emahlweni hi hiseka entirhweni wa Yehovha swi ta hi pfuna leswaku hi tshamela ku anakanya hi vuhosi bya yena. Hi xikombiso, Renee loyi a ri Mbhoni a a ri ni vuvabyi byo oma swirho ni khensa. Loko a ri karhi a tshunguriwa exibedlhele u chumayele vatirhi va kwalaho, vavabyi ni vaendzi. Eka xibedlhele xin’wana u chumayele tiawara ta 80 hi mavhiki mambirhi ni hafu ntsena. Niloko Renee a ri kusuhi ni ku fa, a nga tshikanga ku anakanyisisa hi vuhosi bya Yehovha. Sweswo swi hungute ntshikilelo wa yena.

18. Makwerhu un’wana wa xisati u swi kombise njhani leswaku u seketela vuhosi bya Yehovha?

¹⁸ I ntiyiso leswaku hi lava ku tshama hi ri karhi hi anakanya hi vuhosi bya Yehovha hambiloko hi langutane ni swiphiqo swa siku ni siku. Jennifer u hete masiku manharhu erivaleni ra swihahampfhuka a rindzele xihahampfhuka xo ya ekaya. Kambe a xi fikanga hikwalaho ka swiyimo swo karhi. Leswi a ri ni xivundza naswona a karhele, a ta va a tipute vusiwana. Ku ri na sweswo, u khongerile a kombela Yehovha leswaku a n’wi pfuna a kota ku chumayela vanhu lava a va ri exiyin’weni xo fana ni xa yena. Ku ve ni vuyelo byihi? U chumayele vanhu vo tala a tlhela a fambisa mikandziyiso yo tala. U ri: “Ndzi swi xiyile leswaku Yehovha u ndzi katekisile ni ku tlhela a ndzi nyika matimba yo tivisa vanhu hi vito ra yena ku nga khathariseki xiyimo lexi a ndzi ri eka xona.” Hakunene makwerhu loyi wa xisati u anakanyisise hi xikongomelo xa Yehovha.

19. Xana vanhu va Yehovha va titwa njhani hi vuhosi byakwe?

¹⁹ Ku seketela vuhosi bya Yehovha swi hi hambanisa ni vukhongeri bya mavunwa. Se i khale vanhu va Xikwembu va seketela vuhosi bya xona. Leswi hi seketelaka vugandzeri bya ntiyiso, hinkwerhu hi fanele hi tiyimisela ku tshama hi ri karhi hi seketela vuhosi bya Yehovha.

20. Yehovha u titwa njhani hi matshalatshala ya wena yo seketela vuhosi bya yena?

²⁰ Tiyiseka leswaku Yehovha wa ma tlangela matshalatshala ya wena yo seketela vuhosi byakwe hi ku n’wi tirhela hi ku tshembeka ni ku tiyisela miringo. (Ps. 18:25) Exihlokweni lexi landzelaka ku ta kambisisiwa leswaku ha yini u fanele u seketela vuhosi bya Yehovha hi mbilu hinkwayo ni leswaku u nga byi seketela njhani.