I Yini Leswi Xikwembu Xi Nga Ta Swi Endla?

Handle ko kanakana, loko u weriwa hi swiyimo swo tika u lava leswaku munghana wa wena a ku pfuna. Hikwalaho, vanhu vo tala va vula leswaku Xikwembu a hi munghana wa vona hikuva a xi na mhaka na vona. Entiyisweni, Xikwembu a xi lo endla swilo swo tala leswi hi vuyerisaka ntsena kambe xi ta herisa ku xaniseka ni swiphiqo leswi nga kona namuntlha. I yini leswi Xikwembu xi nga ta swi endla?

XI TA HERISA VUHOMBOLOKI

Xikwembu xi ta herisa vuhomboloki hinkwabyo ni muvangi wa byona. Bibele yi boxa laha vuhomboloki byi humaka kona, loko yi ku: “Misava hinkwayo yi le hansi ka matimba ya lowo homboloka.” (1 Yohane 5:19) “Lowo homboloka” loyi Yesu a n’wi vitaneke “mufumi wa misava” leyi, i Sathana Diyavulosi. (Yohane 12:31) Tanihi leswi Sathana a kucetelaka vanhu ku endla swo biha, hi yena loyi a endlaka leswaku ku va ni maxangu emisaveni. I yini leswi Xikwembu xi nga ta swi endla?

Ku nga ri khale, Yehovha Xikwembu u ta tirhisa N’wana wakwe Yesu Kreste leswaku, a “herisa la nga ni tindlela to vanga rifu, ku nga Diyavulosi.” (Vaheveru 2:14; 1 Yohane 3:8) Kahlekahle, Bibele yi swi veka erivaleni leswaku Diyavulosi u salele hi “nkarhi wo koma” leswaku a lovisiwa. (Nhlavutelo 12:12) Xikwembu xi ta herisa vanhu hinkwavo lava endlaka swo biha.—Pisalema 37:9; Swivuriso 2:22.

XI TA ENDLA MISAVA YI VA PARADEYISI

Endzhaku ka loko a herise vuhomboloki hinkwabyo emisaveni, Muvumbi wa hina u ta hetisisa xikongomelo xa yena, xa leswaku vanhu va hanya hilaha ku nga heriki laha misaveni. I yini leswi hi nga swi langutelaka?

Ku ta va ni ku rhula ni nsirhelelo. “Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11.

Ku ta va ni ndzalo ya swakudya. “Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

Va ta va ni tiyindlu ni mitirho leyi enerisaka. “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. . . . Ni ntirho wa mavoko ya vona, vahlawuriwa va mina va ta wu tirhisa hi xitalo.”—Esaya 65:21, 22.

Xana u swi langutele hi mahlongati ku vona xiyimo xexo? Ku nga ri khale hi ta tiphina hi swona.

XI TA HERISA MAVABYI NI RIFU

Hinkwerhu ha vabya hi tlhela hi fa kambe ku nga ri khale swilo sweswo a swi nge he vi kona. Ku nga ri khale Xikwembu xi ta tirhisa gandzelo ra nkutsulo ra Yesu leswaku “un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Hi byi hi vuyelo lebyi nga ta va kona?

Mavabyi ma ta herisiwa. “Ku hava munhu la tshamaka kona la nga ta ku: ‘Ndza vabya.’ Vanhu lava tshamaka etikweni rero va ta va va rivaleriwe xidyoho xa vona.”—Esaya 33:24.

Rifu a ri nge he vi kona. “Entiyisweni u ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:8.

Vanhu va ta hanya hilaha ku nga heriki. “Nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.”—Varhoma 6:23.

Vafi va ta pfuxiwa. “Ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Va ta vuyeriwa eka nyiko ya Xikwembu ya nkutsulo.

Xikwembu xi ta swi endla njhani swilo leswi?

XI TA SIMEKA MFUMO WA XONA

Xikwembu xi ta tirhisa mfumo wa xona wa le tilweni lowu Yesu Kreste a nga ta va Hosi ya wona leswaku xikongomelo xa xona xi humelela. (Pisalema 110:1, 2) Mfumo lowu, hi lowu Yesu a dyondziseke valandzeri vakwe leswaku va wu khongelela, va ku: “Tata wa hina la nge matilweni, . . . Mfumo wa wena a wu te.”—Matewu 6:9, 10.

Mfumo wa Xikwembu wu ta fuma misava hinkwayo naswona wu ta herisa gome ni ku xaniseka loku nga kona emisaveni. Lowu i Mfumo lowu nga ta endla leswaku vanhu hinkwavo va ku hefu! Leswi hi swona swi endleke Yesu a tiyimisela ku twarisa “mahungu lamanene ya mfumo” naswona u byele vadyondzisiwa vakwe leswaku va endla leswi fanaka.—Matewu 4:23; 24:14.

Tanihi leswi Yehovha Xikwembu a hi rhandzaka, u hi tshembisa ku hi endlela swilo leswi swo hlamarisa hinkwaswo. Xana leswi a swi ku endli u lava ku tshinela ekusuhi na yena ni ku n’wi tiva ku antswa? Loko u endla tano u ta vuyeriwa njhani? Xihloko lexi landzelaka xi ta hlamusela mhaka yoleyo.