BOKISI RA SWIVUTISO

◼ Xana hi nga hlamula njhani hi laha ku humelelaka eminhlanganweni?

 Hi tshama hi langutele ku ya hlangana kun’we eminhlanganweni ya vandlha ya vhiki na vhiki. Kwalaho hi ni lunghelo ro phofula ripfumelo ra hina ni ku khutaza van’wana hi tinhlamulo ta hina. (Swiv. 20:​15; Hev. 10:​23, 24) Hi fanele ku languta ku hlamula ku ri lunghelo naswona hi lwela ku hlanganyela nkarhi na nkarhi. Xana leswi hi nga swi endlisa ku yini hi laha ku humelelaka?

 Ku lunghiselela i goza ro sungula. Ku hlaya ni ku anakanyisisa hi mhaka ka ha ri emahlweni i swa nkoka. Ringeta ku kuma nhlamuselo ya leswi vuriwaka. Hambi loko mhaka leyi ku dyondziwaka ha yona ku tshame ku buriwa ha yona enkarhini lowu hundzeke, languta tinhla tihi na tihi leti ndlandlamuxiweke kumbe leti antswisiweke leti ku buriwaka ha tona. Tsundzuka nhloko-mhaka hinkwayo ya dyondzo. Loko u lunghiselela tinhlamulo leti humaka ebukwini leyi kombisaka dyondzo hinkwayo ya buku ya Bibele, yo tanihi buku leyi nge Ku Chaputa Ka Nhlavutelo, ringeta ku vona ndlela leyi ndzimana yo karhi yi fambisanaka ha yona ni tindzimana leti nga ekusuhi na yona. Loko u landzela swiringanyeto leswi swi ta kurisa vuswikoti bya wena byo anakanya. Swi ta ku pfuna leswaku u lunghiselela tinhlamulo letinene naswona u ta tsakela ku hlanganyela.

 Tinhlamulo letinene hi leto koma, leti vuriweke hi ndlela yo olova, naswona ti sekeriwe ebukwini leyi ku dyondziwaka yona. Munhu loyi a sungulaka ku hlamula u fanele ku hlamula xivutiso hi ku kongoma, a siya tinhla letin’wana leswaku ti ta hlamuseriwa hi laha ku engetelekeke. Papalata tinhlamulo leto leha, leti nga kongomiki leti dyaka nkarhi ni leti sivelaka van’wana leswaku va hlamula. Hlamula hi marito ya wena, ematshan’weni yo hlaya rito rin’wana ni rin’wana ebukwini. Tinhlamulo leto engetela ti fanele ku katsa ni tinhla leti humaka eMatsalweni lama kombisiweke. Yingisela hi vukheta eka leswi van’wana va swi vulaka leswaku u ta papalata ku phindha leswi vuriweke handle ka xivangelo.

 I swinene ku yimisa voko minkarhi yo hlayanyana kambe ku nga ri eka ndzimana yin’wana ni yin’wana. Hi rhamba ni vana leswaku va hlamula. Loko u kanakana ku hlamula, u nga ha tivisa mufambisi wa dyondzo ka ha ri emahlweni ndzimana leyi u tsakelaka ku hlamula eka yona, naswona a swi kanakanisi leswaku u ta kota ku ku nyika nkarhi wo endla tano.

 Hinkwerhu ka hina hi fanele ku endla matshalatshala yo hlanganyela eminhlanganweni ya vandlha leyi katsaka ku hlanganyela ka vayingiseri. Tsundzuka, leswaku minhlangano yo tano yi humelela, swi titshege hi ku hlamula ka hina hi ku tirhandzela ni hi laha ku humelelaka.​—⁠Ps. 26:⁠12.