“Mi Hiteka”
1 Loko Yesu a vule marito lama tsariweke eka Matewu 26:38-41, a a ri kusuhi ni nkarhi wo tika wa vukona byakwe tanihi munhu wa nyama. A wu ta tikomba wu ri nkarhi wa nkoka swinene ematin’wini hinkwawo ya vanhu. Ku ponisiwa ka vanhu hinkwavo a ku ri ekhombyeni. Vadyondzisiwa va Yesu a va fanele ku “hiteka.”
2 Namuntlha hi yime enyangweni wa ku fika ka Yesu hi swikongomelo swimbirhi swa ku ponisa ni ku avanyisa. Tanihi Vakreste lava hitekaka ni lava xiyaka xihatla xa minkarhi, a hi khondli mavoko hi yimela ku ponisiwa ntsena. Ha swi tiva leswaku minkarhi hinkwayo hi fanele ku tshama hi rindzile. I swa nkoka eka hina ku hambeta hi ‘tirha swinene ni ku tikarhata’ entirhweni wa hina wo tirhela Yehovha. (1 Tim. 4:10) Ku vuriwa yini hi un’wana ni un’wana wa hina? Xana hi tshama hi hitekile?
3 Ku Tikambela: Nakambe Yesu u tsundzuxile: “Tivoneleni.” (Lk. 21:34, 35) Hi fanele ku tikambela, hi tiyiseka leswaku a hi na ‘nandzu naswona hi tengile exikarhi ka rixaka leri ro homboloka.’ (Flp. 2:15) Xana siku rin’wana ni rin’wana hi hanya tanihi Vakreste, hi tekelela Yesu ni ku famba hi ku pfumelelana ni misinya ya milawu hi laha yi tsariweke ha kona eRitweni ra Xikwembu? Hi fanele ku papalata mahanyelo lama nga riki ya Vukreste lama funghaka misava leyi nga “hansi ka matimba ya Lowo biha.” (1 Yoh. 5:19; Rhom. 13:11-14) Loko hi tikambisisa malunghana ni Matsalwa, xana hakunene ha hiteka hi laha Yesu a dyondziseke ha kona?
4 Vakulu va fanele ku xalamuka leswaku va gingiriteka eku endleni ka swiavelo swa vona evandlheni, va tiva leswaku va ta tihlamulela eka ndlela leyi va khomaka ntlhambi ha yona. (Hev. 13:17) Tinhloko ta mindyangu ti ni ndzhwalo wo hlawuleka wo fambisa mindyangu ya tona hi tindlela ta Yehovha. (Gen. 18:19; Yox. 24:15; ringanisa 1 Timotiya 3:4, 5.) Nakambe, mawaku ndlela leyi swi nga swa nkoka ha yona leswaku hinkwerhu ka hina hi hetisisa nawu wa Matsalwa wa leswaku hi rhandzana! I mfungho wa Vukreste bya ntiyiso.—Yoh. 13:35.
5 Xalamukela Ku Tsundzuxa Van’wana: Ku hiteka ku katsa leswi tlulaka ku tikambisisa hina vini ntsena. Hi ni ntirho wo endla van’wana vadyondzisiwa. (Mt. 28:19, 20) Ku rhandza vanhu-kulorhi swi ta hi susumetela ku tsundzuxa van’wana leswaku va ta pona ndzoviso lowu langutaneke ni misava leyi. Lebyi i vutihlamuleri lebyi byarhisiweke Vakreste hinkwavo. I xiphemu xa nkoka xa vugandzeri bya hina. (Rhom. 10:9, 10; 1 Kor. 9:16) Hakanyingi hi langutana ni ku pfumala ku tsakela kumbe ku kanetiwa hi ku kongoma eka ntirho lowu wo ponisa vutomi. Hi boheka ku phikelela, hambi loko vunyingi bya vanhu byi honisa rungula ra hina. (Ezek. 33:8, 9) Ku rhandza Xikwembu ni vanhu-kulorhi swi ta hi susumetela ku tiyisela.
6 Lowu a hi nkarhi wa vurhongo. A hi fanelanga hi pfumelela swivilelo swa vutomi bya siku na siku swi hi hambukisa kumbe hi khomeka swinene hi mintsako ya fambiselo leri lerova yi hundzuka ntlhamu. (Lk. 21:34, 35) Lowu hi wona nkarhi wo teka goza hi xihatla ku tlula rini na rini. Nkarhi wa leswaku Yesu Kreste a avanyisa fambiselo leri ro homboloka wu tshinela hi ku hatlisa. Hi lava xalamukeke ntsena, lava tlhariheke ni lava hitekaka lava nga ta pona. Loko hi yingisa swiletelo swa Yesu ivi hi “pona eka swilo hinkwaswo,” kunene hi ta nkhensa!—Lk. 21:36.