Swa Hi Boha Ku Va Ni Vandlha
1 Vana va Kora va tshame va phofula ku tlangela ka vona vandlha ra Yehovha hi ndlela leyi: “E ku ṭhama siku riṅwe e ndlwini ya wena, ŝi tlula khume ra madzana e kuṅwana.” (Ps. 84:10) Eka vona misava a yi ri hava nchumu lowu yi nga va nyikaka wona. Loko u pfumelelana ni mavonelo wolawo, u fanele u endla vandlha ri va mhaka-nkulu evuton’wini bya wena.
2 Ku sukela emasungulweni ya rona, vandlha ra Vukreste ri kombise leswaku ri katekisiwa hi Yehovha. (Mint. 16:4, 5) Ku hava na un’we wa hina la faneleke ku tekela vandlha ehansi kumbe ku ri vona onge ro pfuna ntsena ku va hi hlengeletana kun’we hi nyama. Vandlha i ndhawu ya Timbhoni ta Yehovha yo tiyisana nhlana eka vanhu hinkwavo. Ri nyika xinakulobye lexi nga ni vun’we leswaku hi ta dyondzisiwa hi Yehovha ni ku hlela ntirho wa Mfumo.—Esa. 2:2.
3 Vandlha ra Vukreste i ndlela ya xisekelo yo hi dyondzisa ntiyiso. (1 Tim. 3:15) Valandzeri va Yesu va fanele “hinkwavo va va un’we”—va va ni vun’we ni Xikwembu, na Kreste na hi xivona. (Yoh. 17:20, 21; ringanisa Esaya 54:13.) Kwihi na kwihi laha hi nga yaka kona emisaveni, vamakwerhu va tshemba tidyondzo ni misinya ya milawu ya Bibele, naswona va hanya hi ku pfumelelana na yona.
4 Ha leteriwa ni ku hlomiseriwa ku hetisisa xiavelo xa hina xo endla vadyondzisiwa. N’hweti yin’wana ni yin’wana, Xihondzo xo Rindza, Xalamuka! na Vutirheli Bya Hina Bya Mfumo swi hi nyika rungula leri hi pfunaka ku sungula mabulo ya Matsalwa. Minhlangano yi endleriwe ku hi komba ndlela yo kuma ku tsakela ni ku yisa bulo emahlweni. Ku andza loku hi ku vonaka emisaveni hinkwayo ku tiyisa leswaku hi na mpfuno wa le tilweni entirhweni lowu.—Mt. 28:18-20.
5 Hi ku tirhisa vandlha, hi kuma xikhutazo siku na siku xo “kombana rirhandzu ni mintirho leyinene.” (Hev. 10:24, 25) Hi khutaziwa ku tiyisela miringo hi ku tshembeka. Valanguteri lava nga ni rirhandzu va hi pfuna ku tiyisela mintshikilelo ni swivilelo. (Ekl. 4:9-12) Hi nyikiwa ndzayo leyi lavekaka loko hi ri ekhombyeni ro hambuka. Hi yihi nhlengeletano yin’wana leyi nyikaka nkhathalelo wo tano wa rirhandzu?—1 Tes. 5:14.
6 I ku rhandza ka Yehovha leswaku hi namarhela nhlengeletano ya yena leswaku hi hlayisa vun’we bya hina. (Yoh. 10:16) Ndlela yin’wana leyi vandlha ri hi pfunaka ha yona ku hlayisa ku vulavurisana ka hina na ntlawa wa nandza lowo tshembeka i ku va ri rhumela valanguteri lava famba-fambaka leswaku va ta hi khutaza. Ku amukela ka hina nkongomiso wa rirhandzu swa hi hlanganisa leswaku hi va ni vun’we lebyi hi pfunaka ku tshama hi tiyile emoyeni.
7 Vandlha i ra nkoka leswaku hi tshama hi hanyile emoyeni. A swi nge koteki ku tirhela Yehovha hi ndlela leyi amukelekaka handle ka rona. Kutani ke, a hi veni kusuhi ni leswi Yehovha a hi nyikeke swona. A hi tirheni hi ku pfumelelana ni tipakani ta rona naswona hi tirhisa ndzayo leyi hi yi kumaka hi mbilu hinkwayo. Leyi hi yona ndlela yi ri yoxe leyi hi nga kombaka ha yona leswi vandlha ri vulaka swona eka hina.—Ps. 27:4.