Swiyimo Swi Cincile
1 Bibele yi hi byela leswaku “misava leyi ni swa yona hinkwaswo swa hundza.” (1 Kor. 7:31) Vona ntiyiso lowu leswi swi nga wona namuntlha! Hambi ku ri evuton’wini bya hina, hi vone ku cinca ka xihatla ka ku ehleketa ni ku tikhoma ka vanhu va swiyimo hinkwaswo. Loko hi ta kota ku va fikelela hi rungula ra Mfumo, xingheniso xa hina xi fanele xi fambisana ni swiyimo leswi cincaka. Hi lava ku vula mahungu lamanene hi ndlela leyi nga ta tsakisa vanhu ni ku fikelela timbilu ta vona.
2 Emalembeni lama nga hundza, ematikweni yo tala ntirho wo vula vumbhoni a wu nga fani ni wa sweswi, hikuva hakanyingi, vanhu a va tihanyela hi ku rhula, naswona a va titwa va sirhelelekile. Vukhongeri a byi kwetsima evuton’wini bya vona. Bibele a yi xiximiwa swinene. Emasikwini wolawo ku vula vumbhoni hakanyingi a ku katsa ku hlamusela leswi nga ntiyiso etimhakeni ta ripfumelo. Namuntlha, vutomi bya vanhu byi pfilunganyekile. Vukhongeri bya sandziwa. I vatsongo lava tshembaka Bibele. Naswona eka vo tala, dyondzo ya hundzuluko yi herise ku pfumela eka Xikwembu.
3 Mulanguteri un’wana la famba-fambaka u te: “Sweswi, ku vonaka ku ri na swiphiqo swo tala ni ku nonon’hwa ka vutomi bya vanhu lava hi faneleke hi va dyondzisa ndlela leyi va faneleke va tikhoma ha yona.” Leswi vanhu va karhatekaka ngopfu ha swona namuntlha swi khumba vona vini, mindyangu ya vona ni swivilelo swa vona. Leswi i swilo leswi va vulavulaka ha swona ngopfu loko va hlanganile. Hi fanele hi tsundzuka sweswo loko hi ri entirhweni wa hina wo vula vumbhoni.
4 Mfumo Wa Xikwembu Hi Wona Ntsena Ntshembo Wa Vumundzuku: Vanhu vo tala a va na ntshembo nikatsongo eka tihulumendhe ta vanhu. A va tshembi leswaku va nga yi vona misava yo antswa evuton’wini bya vona. Vukhongeri bya mavunwa byi tsandzekile ku va nyika xisekelo xihi na xihi xa ntshembo. Hi xona xivangelo lexikulu lexi endlaka vanhu va lava ku twa mahungu lamanene ya Mfumo wa Xikwembu. Kombisa ndlela leyi ha yona eku heteleleni wu nga ta nyikela ntlhantlho wa swiphiqo hinkwaswo leswi vanhu va hlangavetanaka na swona.
5 Bibele Hi Yona Ntsena Xihlovo Lexi Tshembekaka Xa Nkongomiso: Namuntlha mintshungu yi hambukisiwile hi varhangeri lava titshegaka hi vutlhari bya vanhu ni tifilosofi ta misava. Vanhu va ha fanele ku xiya leswaku “ndlela ya munhu a yi le matimbeni ya yena.” (Yer. 10:23) Dyondzo ya nkoka ngopfu leyi va nga yi dyondzaka hi leswaku, va fanele va ‘tshemba Yehovha hi timbilu ta vona hinkwato, va nga tshembi ku tlhariha ka vona.’ (Swiv. 3:5) Hambileswi swiyimo swi nga cinca, Bibele a yi cincanga. Hikwalaho, evutirhelini bya hina, minkarhi hinkwayo hi fanele hi vulavula hi Rito ra Xikwembu, hi dyondzisa van’wana leswaku va tlangela nkongomiso wa rona lowu huhuteriweke hi Xikwembu. (2 Tim. 3:16, 17) Leswaku hi hetisisa xikongomelo xexo, hi fanele hi kombisa vanhu nkoka wa Bibele hi ku kombetela eka yona loko hi endla swingheniso, hi tirhisa yona ku hlamula swivutiso swa vona, naswona hi seketela xilaveko xo yi dyondza ni ku tirhisa vutlhari bya yona lebyi humelelaka.
6 Hambi ku ri eka swiyimo swa namuntlha leswi cincaka, swikongomelo swa hina evutirhelini a swi cinci. Hi fanele ku chumayela mahungu lamanene ya Mfumo, hi aka ntshembo eRitweni ra Xikwembu, ni ku pfuna van’wana leswaku va vona xilaveko xo dyondza Bibele na hina. Leswi hi swi vulaka swi fanele swi ri swa nkoka eka swilaveko swa sweswinyana swa lava hi va byelaka vumbhoni. Hi ku endla tano, hi nga ha avelana mahungu lamanene ni van’wana, xisweswo hi pfuna vanhu vo tala.—1 Kor. 9:19, 23.