Avelana Ni Van’wana Hi Ku Ya Hi Swilaveko Swa Vona

¹ Yehovha u tirhisa “hlonga” ro tshembeka ku endla malunghiselelo lama enerisaka swilaveko swa hina swa moya. (Mat. 24:45-47) Vunyingi bya malunghiselelo lawa i tibuku, Tibibele, tivholumo, tivhidiyo, tikhasete ni tidiskete ta khompyuta ta ku endla ndzavisiso wa Bibele. Leswi Yehovha a hi nyikaka swona swi va swi ringene minkarhi hinkwayo naswona a hi fanelanga hi tlanga hi swona. U langutele leswaku hi avelana ni van’wana, hi tiyiseka leswaku hinkwerhu hi vuyeriwa ku ringana.

² Swi durha ngopfu ku endla malunghiselelo wolawo hinkwawo. Mali leyi yi huma eka vamakwerhu emisaveni hinkwayo. Leswi swi tano ngopfu-ngopfu ku sukela loko nhlengeletano yi sungule lunghiselelo ra ku fambisa tibuku handle ko hakerisa vanhu, swi titshege hi ku helela hi minyikelo ya ku tirhandzela leswaku yi ta hakela mali leyi tirhiseriwaka malunghiselelo lawa. Ku engetela kwalaho, marhavi yo tala ma kuma tibuku eka Sosayiti hi nxavo lowu pfunaka vamakwerhu leswaku va kota ku kuma leswi va swi lavaka eminhlanganweni ni le ntirhweni wa nsimu hambiloko va ri evuswetini lebyikulu hi tlhelo ra nyama.

³ Ndlela Leyi Hi Nga Pfunaka Ha Yona: Hi nga amukela xitsundzuxo xa Pawulo xa ku avelana ni van’wana “hi ku ya hi swilaveko swa vona.” (Rhom. 12:13) Loko hi nyikela hi mali entirhweni wa misava hinkwayo, hi ta va hi teka leswi hi nga na swona hi avelana hi ku kongoma ni vamakwerhu emisaveni hinkwayo. Hikwalaho ka sweswo, van’wana va endle xiboho xa ku vekela mali etlhelo leyi va nga ta nyikela ha yona entirhweni wa misava hinkwayo n’hweti ni n’hweti, hilaha va endlaka hakona hi mali ya ku khathalela Holo ya Mfumo. Va swi xiya leswaku mali yoleyo a yi tirhisiwi ku hakelela ku humesiwa ka minkandziyiso ntsena kambe yi tlhela yi khathalela hinkwaswo leswi khumbanaka ni ntirho wolowo. Anakanya ndlela leyi vamakwerhu emisaveni hinkwayo va nga vuyeriwaka swinene ha yona loko vanhu lava engetelekeke a va hambeta va avelana hi ndlela yoleyo.

⁴ Ku tlula kwalaho, hi nga avelana na vona hi ku ringanisela loko hi endla swikombelo swa minkandziyiso leyi kumekaka hi ku olova eka hina. Ku endla xikombelo xa nchumu lowu hi nga riki na wona hakunene swi pfuna vamakwerhu kun’wana leswaku va kuma malunghiselelo ya moya lawa na vona va ma lavaka leswaku va tshama va tiyile ni ku ya emahlweni ni ntirho wa ku chumayela mahungu lamanene eswiphen’wini leswi va nga eka swona swa misava.—Hev. 13:16.

⁵ Hi fanele ku anakanyisisa hi sweswo loko hi endla swikombelo swa swilo leswi durhelaka Sosayiti swinene ku swi endla. Leswi swi katsa tivhidiyo, ti-CD-ROM, tibuku letikulu to endla ndzavisiso, tivholumo ni swikhokhelo leswi nga eka tikhasete. Ku ri ni ku endlela xirho ha xin’we xa ndyangu xikombelo xa nchumu wolowo, xana ndyangu hinkwawo a wu nge swi koti ku tirhisa nchumu wun’we ntsena? Loko hi pima swilo leswi hi swi tekaka, hi endla leswaku van’wana na vona va kuma swilo leswinene leswi na hina hi tsakelaka ku va na swona.—Filp. 2:4.

⁶ Nxavo wa minkandziyiso leyi hi yi fambisaka ensin’wini wu nga ha hungutiwa katsongo hi minyikelo leyi yaka eka Sosayiti ya ntirho wa misava hinkwayo, leyi hina hi yi nyikelaka eHolweni ya Mfumo ni leyi nyikeriwaka hi vanhu lava tsakelaka, lava amukelaka minkandziyiso leyi. Hambiswiritano, loko swi ta eka minkandziyiso leyi hi yi kombelaka leswaku hi ta yi tirhisa hina vini, yo kota tibuku ta tinsimu, Tibuku Ta Lembe, Tibibele ta deluxe ni swin’wana, a hi nge languteli leswaku vanhu va le handle va hi nyikelela mali ya tona. Malandza ya Yehovha lama tinyiketeleke hi wona vaseketeri-nkulu va lunghiselelo leri hi tlhelo ra timali. Hikwalaho ka sweswo, vahuweleri vo tala va ringanyeta leswaku nkandziyiso wolowo wu nga dya mali muni loko wu xaviwa kutani va nyikela hilaha ku faneleke. Hi xikombiso, Bibele ya deluxe, leyi lomu matlhelo ka yona ku pendiweke hi muvala va nsuku, yi nga ha va R150 kumbe ku tlula, buku yo endla ndzavisiso yi nga ha dya R300 kumbe ku tlula, khalendara ya mivala-vala yi nga ha sungula eka R40, nsonga-vutivi lowu nga eka CD-ROM wu nga ha dya R400 ku ya eka R800 kumbe ku tlula, hi ntolovelo tidiskete ta vuyimbeleri ti dya kwalomu ka R100 kasi hakanyingi tivhidiyo tin’wana ti durha ku tlula kwalaho. Ku tsandzeka ku humesa munyikelo lowu ringaneke ku hlanganisa mali leyi nchumu wolowo wu yi koxaka, ku ta endla leswaku nhlengeletano yi hetelela yi nga ha swi koti ku hetisisa ku yisiwa emahlweni ka ntirho emisaveni hinkwayo.

⁷ Yesu u vule leswaku vadyondzisiwa va yena va ntiyiso a va ta tiviwa kahle hi ku rhandzana ka vona. (Yoh. 13:34, 35) Ku hanana ka hina hi swilo leswi vonakaka ni ku nga vi na vutianakanyi loko hi avelana ni van’wana hi ku ya hi swilaveko swa vona, i tindlela letinene ta ku tikombisa hi ri Vakreste va xiviri.