Xana Wa Rhurha?

Loko nhlamulo ya wena eka xivutiso lexi ku ri ina, ku ni swilo swo tala leswi wena ni van’wana mi faneleke mi swi endla. Hi ku landzelela magoza ya nkoka lama xaxametiweke laha hansi, mi ta hatla mi tshamiseka evandlheni ra n’wina lerintshwa.

(1) Loko u kala u tiva laha u rhurhelaka kona, matsalana wa vandlha ra ka n’wina a nga kuma adirese ya Holo ya Mfumo ya vandlha ra wena lerintshwa. Loko u fika kwalaho, hatla u kumisisa holo ivi u tiyiseka hi minkarhi ya minhlangano ya vandlha. Loko ku ri ni mavandlha yo hlaya lama tirhisaka Holo ya Mfumo, kombela vakulu va ku byela leswaku wena u tshama ensin’wini ya vandlha rihi. U nga hlweli ku ya eminhlanganweni ni ku tolovelana ni vakulu va kwalaho.

(2) Matsalana wa vandlha leri a wu ri eka rona ni wa vandlha leri se u nga eka rona va ta tirhisana leswaku va rhumela khadi ra Rhekhodo ya Muhuweleri wa Vandlha ra wena ni ra ndyangu wa wena. Ku ta rhumeriwa ni papila ra ku ku tivisa eka vakulu va vandlha leri se u hlanganyelaka eka rona. (Vona Bokisi Ra Swivutiso eka Vutirheli Bya Hina Bya Mfumo bya February 1991) Komiti ya Ntirho ya Vandlha ya kwalaho yi fanele yi tivisa mufambisi wa dyondzo ya buku malunghana ni ku fika ka wena leswaku a ta tihlanganisa na wena ni ku ku pfuna ku ku komba ntlawa wa wena lowuntshwa wa dyondzo ya buku.—Rhom. 15:7.

(3) Vahuweleri hinkwavo va le vandlheni ra wena lerintshwa va ni xiphemu lexi tsakisaka lexi va nga xi endlaka—leswaku va tolovelana na wena ni ku ku endla u titwa u amukelekile. (Ringanisa 3 Yohane 8.) Ina, leswi swi vula leswaku u fanele u va kona eminhlanganweni leswaku mi ta khutazana ni ku akana ni vamakwenu.

(4) A wu fanelanga u rindza kukondza hinkwaswo leswi katsekaka eku rhurheni swi hetiwa u nga si ya evutirhelini bya nsimu ni vandlha ra wena lerintshwa. Loko u rhangisa timhaka ta Mfumo, timhaka tin’wana ti ta khathaleriwa naswona u ta titwa u tshamisekile endhawini ya wena leyintshwa. (Mat. 6:33) Loko se u tshamisekile ekaya ra wena lerintshwa, kumbexana u nga tsakela ku rhamba van’wana va le vandlheni rolero leswaku va ku endzela ivi u va tolovela ku antswa.—Rhom. 12:13b.

Ku rhurha i ntirho lowukulu. Hambiswiritano, loko un’wana ni un’wana la khumbekaka a endla leswi a faneleke ku swi endla, a ku nge vi na swiphiqo hi tlhelo ra moya. Un’wana ni un’wana u ta tsakisiwa hi vumakwerhu bya hina bya rirhandzu ra Vukreste.