Xiyimiso Xa Nhlengeletano Yo Hlawuleka Ya Siku Rin’we

Namuntlha ku ni rungula ro tala ra ku hi pfuna leswaku hi hlayisa mbilu ya hina ya xiviri yi ri exiyin’weni lexinene, leswaku hi ta va ni vutomi byo tsakisa ni lebyi leheke. Kambe lexi xi nga xa nkoka ngopfu i mbilu ya hina yo fanekisela. Hikokwalaho ya faneleka nhloko-mhaka ya xiyimiso lexintshwa xa nhlengeletano leyi sungulaka hi September 2003, leyi nge: “Ku Tirhela Yehovha Hi Mbilu Leyi Heleleke.” (1 Tikr. 28:9) Xana i yini leswi hi nga swi langutelaka?

Mulanguteri wa xifundzha u ta tamela xihloko lexi nge “Ku Pfuna Van’wana Leswaku Va Tirhela Yehovha Hi Moya Xiviri Lowu Tsakeke.” Mimbulavurisano yi ta kandziyisa ntsako lowu tisiwaka hi ku landzelela lava kombiseke ku tsakela ni ku fambisa tidyondzo ta Bibele ni vanhu lava lavaka ku tirhela Yehovha. A swi kanakanisi leswaku hinkwerhu hi ta khutaziwa hi nkulumo yo sungula ya xivulavuri lexi endzeke leyi nge “Ku Hlayisa Mbilu Ya Hina Emisaveni Leyi Nga Ni Khombo.” Xiyimiso xa nimixo xi ta gimeta hi nkulumo ya nkhuvulo.

Hi ndzhenga, xiyenge lexi nge “Ku Pfuna Van’wana” xi ta hlamusela ndlela leyi hi nga pfunaka van’wana ha yona. Xana vatswari va nga endla yini leswaku va sirhelela timbilu ta vana va vona eka minkucetelo yo biha ni ku va pfuna leswaku va tshinela eka Yehovha? Xiyenge lexi nge “Pfuna Vana Va Wena Leswaku Va Rhandza Yehovha” xi ta nyikela swiringanyeto leswi pfunaka naswona xi ta kombisa ndlela leyi leswi swi nga endliwaka ha yona.

Xana ha ma tirhisa malunghelo man’wana ni man’wana lawa Yehovha a hi nyikaka wona leswaku hi hlayisa mbilu ya hina yo fanekisela yi hanyile yi tlhela yi tiya? Nkulumo yo hetelela ya xivulavuri lexi endzeke leyi nge “Hambeta U Tirhela Yehovha Hi Mbilu Leyi Heleleke,” yi ta kambisisa tindlela ta mune ta nkoka leti hi nga tshamaka hi ri karhi hi ti tirhisa leswaku hi hlayisa vumoya bya hina byi ri kahle. Xana hi tinyika nkarhi wo tanihi kwihi naswona hi endla matshalatshala wahi leswaku hi kuma nkarhi wo khongela swi huma embilwini, hi dyondza Rito ra Xikwembu, hi chumayela hi ku hiseka ni ku va swin’we ni Vakreste van’wana? Xana hi nga antswisa eka yin’wana ya tindlela leti?

Yehovha wa hi rhamba: “Tisa mbilu ya wena endzayweni ni ndleve ya wena emaritweni ya vutivi.” (Swiv. 23:12) Kunguhata ka ha ri sweswi leswaku u ta va kona eka ndzetelo lowu wa siku lowu vuyerisaka wa Matsalwa. Leswi swi ta ku tiyisa leswaku u hambeta u tirhela Yehovha hi mbilu leyi heleleke ni hi moya-xiviri lowu tsakeke.