Dyondza Vutshila Byo Hlamulana Ni Vanhu
1. Hi rihi rungula ra le Bibeleni leri hi nga ta ri kambisisa naswona ha yini?
1 Nkulumo ya muapostola Pawulo loko a ri esinagogeni ya le Antiyoka le Pisidiya, leyi tsariweke eka Mintirho 13:16-41, yi hi komba ndlela leyinene leyi hi nga hlamulanaka ni vanhu ha yona. Pawulo u anakanyele swiyimo ni mavonelo ya vayingiseri vakwe kutani a endla xingheniso xa yena xi pfumelelana ni swiyimo swa vona. Loko hi ri karhi hi kambisisa rungula, leri a hi xiyeni ndlela leyi hi nga endlaka leswi fanaka loko hi ri ensin’wini.
2. Xana hi dyondza yini eka ndlela leyi Pawulo a sunguleke nkulumo yakwe ha yona?
2 Kuma Lexi Mi Twanaka Hi Xona: Hambileswi rungula ra Pawulo a ri vulavula hi ntirho wa nkoka lowu Yesu a wu endleke leswaku a hetisisa swikongomelo swa Xikwembu, Pawulo a nga sungulanga nkulumo yakwe hi marito wolawo. Leswi hi xitalo vayingiseri va yena a ku ri Vayuda, u vulavule hi swilo leswi a a twanana na vona hi swona, ku nga matimu ya Vayuda. (Mint. 13:16-22) Hilaha ku fanaka hi ta kota ku pfuna vo tala loko hi sungula hi kuma leswi hi twananaka hi swona na vona. Leswi swi nga lava leswaku hi va endla va tiphofula hi ku va vutisa swivutiso hi vutlhari kutani hi rhiya ndleve leswaku hi twisisa leswaku i yini leswi nga swa nkoka hakunene eka vona.
3. I yini leswi endleke vayingiseri va Pawulo swi va tikela ku pfumela leswaku Yesu a a ri Mesiya la tshembisiweke?
3 Loko Pawulo a vulavula hi matimu ya Vayuda, u tsundzuxe vayingiseri vakwe hi xitshembiso xa Xikwembu xo va tisela Muponisi la humaka eka rixaka ra Davhida. Hambiswiritano, Vayuda vo tala a va yimele nhenha leyi a yi ta va ntshunxa emavokweni ya Varhoma kutani yi endla rixaka ra vona ri va ni matimba ku tlula tinxaka letin’wana hinkwato. Entiyisweni a va swi tiva leswaku varhangeri va Vayuda a va n’wi amukelanga Yesu eYerusalema naswona va n’wi nyikete eka vafumi va Varhoma kutani va n’wi dlaya. Xana Pawulo a a ta va khorwisa njhani leswaku Loyi a a ri yena Mesiya loyi a tshembisiweke?
4. Xana Pawulo u vulavurise ku yini hi vutlharhi ni vayingiseri va yena va Vayuda?
4 Endla Leswaku Xingheniso Xa Wena Xi Pfumelelana Ni Swiyimo: Hi ku tiva ndlela leyi vayingiseri va yena a va ehleketa hi yona, Pawulo u tirhise Matsalwa ku bula na vona hi swilo leswi ana se a va swi pfumela. Hi xikombiso, u vule leswaku Yesu i ntukulu wa Davhida, loyi a tiviweke hi Yohane Mukhuvuri, loyi a a tiveka ngopfu tanihi muprofeta wa Xikwembu. (Mint. 13:23-25) Pawulo u vule leswaku loko varhangeri va vukhongeri va fularhela Yesu ni ku n’wi avanyisela rifu, va “hetisise swilo leswi vuriweke hi Vaprofeta.” (Mint. 13:26-28) Loko a ya emahlweni u hlamusele leswaku a ku ri ni timbhoni leti swi voneke hi mahlo leswaku Yesu u pfuxiwile eku feni, kutani a va komba Matsalwa lama tolovelekeke lama hetisekeke loko Yesu a pfuxiwa.—Mint. 13:29-37.
5. (a) Xana Pawulo u endle njhani leswaku xingheniso xakwe xi pfumelelana ni Magriki? (b) Xana hi nga xi tekelela njhani xikombiso xa Pawulo loko hi tirha nsimu ya ka hina?
5 Hi hala tlhelo, loko Pawulo a vulavurisana ni Magriki eAreyopago le Atena, u tirhise xingheniso lexi hambaneke. (Mint. 17:22-31) Hambiswiritano, u tirhise rungula leri fanaka niloko a bula ni Vayuda naswona matshalatshala yakwe ma tirhile eka vona ni le ka Magriki. (Mint. 13:42, 43; 17:34) Hilaha ku fanaka, ninamuntlha swi ta hi fambela kahle ensin’wini loko hi rhanga hi kuma leswi hi twananaka ha swona ni vayingiseri va hina niloko hi endla xingheniso xa hina xi fambisana ni ndhavuko swin’we ni ndlela leyi va ehleketaka hi yona.