Leswi Ntirho Wa Hina Wo Chumayela Wu Swi Hetisisaka
1. Xana Yehovha u wu languta njhani ntirho wa hina wo chumayela naswona vanhu va angurisa ku yini?
1 Rito ra Xikwembu ri hlamusela Vakreste va ri lava fambaka ku fana ni vahluri entirhweni wa Yehovha. (2 Kor. 2:14-16) Loko hi ri karhi hi twarisa vutivi bya Xikwembu, ntirho wa hina wo chumayela wu fana ni mirhi ya risuna leyi nun’hwelaka kahle eka Yehovha. Vanhu van’wana va kokiwa hi nun’hwelo lowunene wa mahungu lamanene; kambe van’wana a va wu rhandzi. Hambiswiritano, ku nga anguli kahle ka vo tala a ku vuli leswaku ntirho wa hina i wa hava. Anakanya hi leswi ntirho wa hina wu swi hetisisaka.
2. Xana ntirho wa hina wo chumayela wu hi pfuna leswaku hi kombisa yini?
2 Ku Twarisa Yehovha: Sathana u vula leswaku vanhu va gandzela Yehovha leswaku va ta kuma swo karhi eka yena. (Yobo 1:9-11) Ntirho wa hina wo chumayela wu hi pfulela ndlela yo kombisa leswaku ku tinyiketela ka hina eka Xikwembu i ka xiviri. Vahuweleri vo tala va ya emahlweni va yingisa xileriso xa ku chumayela ni ku endla vadyondzisiwa hambileswi va langutanaka ni swiyimo swo tika nileswi vanhu va nga va yingisiki. Ku tiyisela ko tano hi ku tshembeka ku endla leswaku mbilu ya Yehovha yi tsaka!—Swiv. 27:11.
3. Ha yini swi ri swa nkoka leswaku hi ya emahlweni hi twarisa vito ra Xikwembu ni swikongomelo swa xona?
3 Ntirho wa hina wo chumayela wu tlhela wu hoxa xandla eku hetisekeni ka xikongomelo xa Xikwembu. Loko Yehovha a vulavula hi ku lovisiwa ka misava ya Sathana loku taka, u ri: “Matiko ma ta tiva leswaku hi mina Yehovha.” (Ezek. 39:7) Leswaku vanhu hinkwavo va twa hi ta ndzoviso lowu, i swa nkoka leswaku malandza ya Xikwembu ma ya emahlweni ma twarisa vito ra xona ni swikongomelo swa xona eka “matiko hinkwawo ni tinyimba hinkwato ni tindzimi hinkwato ni vanhu hinkwavo.”—Nhlav. 14:6, 7.
4. Xana ntirho wo chumayela wu va xisekelo xa ku avanyisa hi ndlela yihi?
4 Xisekelo Xa Vuavanyisi: Ku chumayeriwa ka mahungu lamanene ku tlhela ku va xisekelo xa vuavanyisi. Muapostola Pawulo u vule leswaku Kreste Yesu u ta tisa ndzihiselo eka “lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.” (2 Tes. 1:8, 9) Vanhu va ta avanyisiwa hi ndlela leyi va angulaka ha yona eka mahungu lamanene. Leswi swi vula leswaku malandza ya Xikwembu ma ni vutihlamuleri bya nkoka hakunene! Leswaku hi nga vi ni nandzu wa ngati, a hi yeni emahlweni hi chumayela rungula ra Mfumo leri ponisaka.— Mint. 20:26, 27.
5. Xana tintswalo ta Yehovha ti kombisiwa njhani entirhweni wa hina wo chumayela?
5 Matshalatshala ya hina yo hambeta hi pfuna vaakelani va hina leswaku va amukeleka eka Yehovha ma kombisa tintswalo ta Yena. (1 Tim. 2:3, 4) Hi ku tiva leswaku vutomi bya vanhu byi tshama byi ri karhi byi cinca-cinca, hi ya eka vona hi vuyelela, hi va khutaza leswaku va lava Yehovha nkarhi wa ha ri kona. Hi ku endla tano hi kombisa “ntsetselelo lowukulu wa Xikwembu xa hina” lexi ‘nga naveliki leswaku ku lova ni un’we kambe xi navelaka leswaku hinkwerhu hi hundzuka.’—Luka 1:78; 2 Pet. 3:9.
6. Xana ku tshama hi khomekile entirhweni wa Yehovha swi hi pfuna njhani?
6 Na Hina Ha Pfuneka: Ku tshama hi khomekile entirhweni wa Yehovha i xisirhelelo eka hina. Swi hi pfuna leswaku hi hamba hi ‘tsundzuka vukona bya siku ra Yehovha’ ni ku papalata ku tithyakisa hi mafambiselo lawa yo biha ya swilo. (2 Pet. 3:11-14; Tito 2:11, 12) Hikwalaho, a hi hambeteni hi ‘tserhama, hi nga tsekatsekisiwi, nkarhi hinkwawo hi va ni swo tala swo swi endla entirhweni wa Hosi’ hi ri karhi hi tiva leswaku ntirho wa hina wo chumayela a hi wa hava.—1 Kor. 15:58.