Xana Wa Xi Vutisa Xichudeni Xa Wena Loko Xi Tiva Lava Nga Tsakelaka Ku Dyondza Bibele?

Loko ku ri ni loyi u dyondzaka na yena Bibele sweswi, ha yini u nga n’wi vutisi loko ku ri ni van’wana lava na vona va nga tsakelaka ku dyondza leswi Bibele yi swi dyondzisaka, ku nga ha va vanghana va yena, maxaka kumbe vanhu lava a va toloveleke? Hi xitalo u ta ku byela mavito ya vo hlayanyana lava nga swi tsakelaka. Loko a ku pfumelela leswaku u boxa vito ra yena, u nga ha byela vanhu volavo loko u va endzela leswaku u byeriwe hi yena leswaku va nga swi tsakela ku dyondza Bibele. U nga ha ku, “[Ximani-mani] wa tiphina hi ku dyondza Bibele naswona u anakanya leswaku na wena u nga vuyeriwa hi lunghiselelo ra hina ra dyondzo ya mahala ya Bibele.” Kutani n’wi kombise ndlela leyi dyondzo yi fambisiwaka ha yona, u tirhisa buku leyi nge Leswi Bibele Yi Swi Dyondzisaka.

Loko u ri ni xichudeni lexi endlaka nhluvuko lowunene u nga ha xi khutaza leswaku xi hlamusela vanghana va xona ni swirho swa ndyangu hi dyondzo ya xona, loko ku ri ni lava va swi tsakelaka. Xi nga ha va rhamba leswaku va va kona loko ku dyondziwa. Kumbe loko sweswo swi nga koteki, xi nga ha hlela leswaku wena u hlangana na vona u va komba ndlela leyi ku dyondziwaka ha yona. Sweswo swi ta khutaza xichudeni xa wena leswaku xi sungula ku byela van’wana hi leswi xi swi dyondzaka eBibeleni.

Lava u tshamelaka ku endla maendzo yo vuyela eka vona va nga ku nyika mavito ya van’wana lava tsakelaka ku dyondza Bibele nkarhi na nkarhi. Loko u va nyika buku ya vona leyi nge Leswi Bibele Yi Swi Dyondzisaka, u nga ha va vutisa u ku, “Xana va kona van’wana lava u vonaka onge va nga swi tsakela ku va ni buku leyi?”

Hikwalaho ka leswi hi hanyaka enkarhini lowu lavaka leswaku hi endla ntirho wa hina hi xihatla, hi lava ku endla hinkwaswo leswi hi nga swi kotaka leswaku hi pfuna vanhu va twa ni ku amukela mahungu lamanene. Hikwalaho vutisa xichudeni xa wena ni van’wana loko va tiva vanhu lava nga tsakelaka ku dyondza Bibele!