Tshamani Mi Ri Karhi Mi “Tswala Mihandzu Yo Tala”

¹ Yesu u tifanise ni murhi wa vhinya wa ntiyiso, Tata wa yena u n’wi fanise ni Murimi kasi valandzeri vakwe lava totiweke hi moya u va fanise ni marhavi ya murhi wa vhinya wa ntiyiso. Loko a hlamusela ntirho wa Murimi wo fanekisela, u kandziyise nkoka wa ku va munhu a tshama a ri rhavi emurhini wolowo wa vhinya. (Yoh. 15:1-4) Leswi hi swi dyondzaka laha hileswaku un’wana ni un’wana la nga ni vuxaka lebyikulu na Yehovha u fanele a fana ni rhavi ra “murhi wa vhinya wa ntiyiso” leri vekaka mihandzu, ku nga Yesu Kreste. Hi fanele hi tshama hi ri karhi hi tswala “mihandzu ya moya” ni mihandzu ya Mfumo.—Gal. 5:22, 23; Mat. 24:14; 28:19, 20.

² Mihandzu Ya Moya: Nhluvuko wa hina wa moya wu vonaka hi ndlela leyi hi yi kombisaka ha yona mihandzu ya moya. Xana u tikarhatela ku hlakulela mihandzu ya Xikwembu ya moya hi ku va u dyondza Rito ra Xikwembu nkarhi na nkarhi ni ku anakanyisisa ha rona? (Filp. 1:9-11) U nga kanakani ku khongelela moya lowo kwetsima, ku nga wona wu nga ta humesa timfanelo leti vangamisaka Yehovha eka wena ni leti nga ta ku pfuna leswaku u endla nhluvuko hi tlhelo ra moya.—Luka 11:13; Yoh. 13:35.

³ Ku hlakulela mihandzu ya moya swi ta hi pfuna nileswaku hi hiseka swinene tanihi vachumayeri. Hi xikombiso, rirhandzu ni ripfumelo swi hi susumetela leswaku hi tinyika nkarhi wo ya ensin’wini nkarhi na nkarhi hambiloko hi khomekile hi mintirho ya siku ni siku. Timfanelo to tanihi ku rhula, ku lehisa mbilu, musa, vunene ni ku tikhoma ti hi pfuna leswaku hi angula vakaneti hi ndlela leyi faneleke. Ntsako wu endla leswaku hi eneriseka entirhweni wo chumayela hambiloko vanhu va nga ri amukeli rungula ra hina.

⁴ Mihandzu Ya Mfumo: Nakambe hi fanele hi tswala mihandzu ya Mfumo. Sweswo swi katsa ku nyikela “xitlhavelo xa ku dzunisa nkarhi hinkwawo, ku nga mbhandzu wa milomu leyi endlaka xitiviso xa le rivaleni eka vito ra [Yehovha].” (Hev. 13:15) Leswi hi swi endla hi ku va hi hisekela ku hambeta hi twarisa mahungu lamanene. Xana u tikarhatela ku tswala mihandzu yo tala ya Mfumo hi ku va u antswisa ndlela leyi u chumayelaka ha yona?

⁵ Yesu u vule leswaku valandzeri vakwe lava tshembekaka va ta tswala mihandzu hi mpimo lowu nga faniki. (Mat. 13:23) Hikwalaho, a hi fanelanga hi tiringanisa ni van’wana kambe hi fanele hi nyika Yehovha hinkwaswo leswi nga ematimbeni ya hina. (Gal. 6:4) Ku kambela swiyimo swa hina vini hi ku tirhisa Rito ra Xikwembu swi ta hi pfuna leswaku hi hambeta hi vangamisa Yehovha hi ku “tswala mihandzu yo tala.”—Yoh. 15:8.