‘A Hi Landzelerisiseni Mikondzo Ya Yesu’
1. Hi fanele hi endla yini leswaku hi kota ku chumayela ku fana na Yesu?
1 Yesu a nga yanga eswikolweni swa Varabi hambiswiritano a nga kona loyi a a kota ku chumayela ku fana na yena. Nkateko wa kona, rungula ra ntirho lowu a wu endleke ri tsariwile ri tlhela ri hlayisiwa leswaku ri ta hi pfuna. Leswaku hi kota ku chumayela ku fana na Yesu, hi fanele hi “landzelerisisa mikondzo yakwe.”—1 Pet. 2:21.
2. I yini lexi nga ta hi pfuna leswaku hi rhandza vanhu ku fana na Kreste?
2 Rhandza Vanhu: Yesu a a chumayela vanhu hileswi a a va rhandza. (Mar. 6:30-34) Vanhu vo tala ensin’wini ya hina va twa ku ‘vava’ kutani va lava ku chaveleriwa hi mahungu lamanene. (Rhom. 8:22) Ku anakanyisisa hi xiyimo xo tika lexi va langutaneke na xona ni ndlela leyi Yehovha a va rhandzaka ha yona, swi ta endla leswaku hi va chumayela hi ku phikelela. (2 Pet. 3:9) Nakambe vanhu va ta hatla va amukela rungula ra hina loko va swi vona leswaku ha va rhandza hakunene.
3. Yesu a a chumayela rini?
3 Chumayela Nkarhi Wun’wana Ni Wun’wana: Yesu a a tirhisa nkarhi wun’wana ni wun’wana lowu a wu kumaka leswaku a chumayela mahungu lamanene. (Mat. 4:23; 9:9; Yoh. 4:7-10) Na hina, hi fanele ku tshama hi lunghekele ku chumayela nkarhi wun’wana ni wun’wana. Van’wana va tshama va khome Bibele ni minkandziyiso leswaku va ta chumayela entirhweni, exikolweni niloko va ri eriendzweni ni kun’wana.
4. Hi nga endla njhani leswaku Mfumo wu va wona nchumu wa nkoka lowu hi vulavulaka ha wona loko hi ri eku chumayeleni?
4 Chumayela Hi Mfumo: Yesu a a chumayela hi Mfumo. (Luka 4:43) Hambileswi hi nga hatliki hi boxa Mfumo eka xingheniso xa hina, i swinene ku komba n’wini wa muti leswaku i wa nkoka. Hambiloko hi vulavula hi swiendlakalo swo biha leswi kombisaka leswaku hi hanya emasikwini ya makumu, kambe xikongomelo xa hina i ku ‘vula mahungu lamanene ya swilo leswinene.’—Rhom. 10:15.
5. Xana hi fanele hi yi tirhisa njhani Bibele leswaku ntirho wa hina wo chumayela wu ta humelela?
5 Tirhisa Rito Ra Xikwembu: Yesu a a tirhisa Matsalwa minkarhi hinkwayo loko a chumayela. Hinkwaswo leswi a a swi dyondzisa a swi huma eka Tata wa yena. (Yoh. 7:16, 18) A a hlaya Rito ra Xikwembu a tlhela a tisirhelela hi rona eka minhlaselo ya Sathana. (Mat. 4:1-4) Leswaku hi kota ku dyondzisa van’wana, hi fanele hi dyondza Bibele siku ni siku hi tlhela hi yi tirhisa evuton’wini bya hina. (Rhom. 2:21) Loko hi hlamula vanhu ensin’wini, hi fanele hi va komba leswaku leswi hi swi vulaka swi huma eBibeleni hi tlhela hi yi hlaya hi ku kongoma loko swi koteka. Hi lava leswaku n’wini wa muti a swi vona leswaku a hi tivulavuleli swa hina kambe hi vulavula leswi humaka eka Xikwembu.
6. Xana Yesu u endle yini leswaku a fikelela timbilu ta vayingiseri va yena?
6 Fikelela Mbilu Loko U Dyondzisa: Vaprista lavakulu ni Vafarisi va rhumele tindhuna leswaku ti ya khoma Yesu. Loko ti vutisiwa leswaku ha yini ti nga vuyanga na yena, ti te: “Ku hava munhu un’wana la tshameke a vulavula hi ndlela leyi.” (Yoh. 7:46) Yesu a a nga vulavuli hi ndlela yo hetisisa nawu ntsena, kambe a a dyondzisa hi ndlela leyi fikelelaka timbilu ta lava a va dyondzisaka. (Luka 24:32) U tirhise swifaniso leswi tolovelekeke leswaku mhaka ya yena yi hanya. (Mat. 13:34) Yesu a a nga phyarheki vayingiseri va yena hi rungula ro tala. (Yoh. 16:12) Rungula ra yena a ri tlakusa Yehovha minkarhi hinkwayo. Na hina hi nga va vadyondzisi lavanene ku fana na Yesu, hi ku hambeta hi ‘nyikela nyingiso eka ndlela leyi hi dyondzisaka ha yona.’—1 Tim. 4:16.
7. Ha yini Yesu a phikelerile entirhweni wo chumayela?
7 Phikelela Hambiloko U Nga Yingisiwi Kumbe U Kanetiwa: Hambileswi Yesu a endleke mintirho yo tala yo hlamarisa, a hi vangani lava n’wi yingiseke. (Luka 10:13) Hambi ku ri maxaka ya yena, a ma anakanya leswaku wa “hlanya.” (Mar. 3:21) Hambiswiritano, Yesu u phikelerile. A nga helanga matimba hikuva a a swi tiva leswaku u tamele ntiyiso lowu nga ta ntshunxa vanhu. (Yoh. 8:32) Yehovha u ta hi pfuna leswaku hi nga heli matimba.—2 Kor. 4:1.
8, 9. Hi nga n’wi tekelela njhani Yesu leswaku hi titsona swo karhi hikwalaho ka mahungu lamanene?
8 Ntirho Wo Chumayela Wu Lava Hi Titsona Swo Karhi: Yesu u titsone vutomi bya vulovolovo leswaku a ta kota ku chumayela. (Mat. 8:20) A a chumayela a nga karhali, minkarhi yin’wana a ri kala ri pela a ri eku chumayeleni. (Mar. 6:35, 36) Yesu a a swi tiva leswaku nkarhi wa yena wo endla ntirho lowu wu komile. Tanihi leswi ‘nkarhi lowu seleke wu komeke,’ na hina hi fanele hi titsona swo karhi leswaku hi ta tirhisa nkarhi wa hina, matimba ya hina ni rifuwo ra hina hilaha Yesu a endleke hakona.—1 Kor. 7:29-31.
9 Vakreste va lembe-xidzana ro sungula a va humelela entirhweni wa vona wo chumayela hileswi a va tekelela Yesu. (Mint. 4:13) Na hina hi nga humelela entirhweni wa hina loko hi tekelela Mudyondzisi lonkulu.—2 Tim. 4:5.