Dyondzisa Van’wana Leswaku Va Rhandza Yehovha
1. I yini lexi kokelaka van’wana eka Yehovha?
1 Xana wa ha tsundzuka loko wa ha ku sungula ku dyondza ha Yehovha? I yini lexi nga ku kokela eka yena? Vanhu vo tala va timbilu letinene va ta ku byela leswaku va tshinele eka Muvumbi wa hina loko va dyondza hi timfanelo takwe leti nga ringanisiwiki na nchumu, ngopfu-ngopfu ntwela-vusiwana ni rirhandzu rakwe.—1 Yoh. 4:8.
2, 3. Xana hi nga yi tirhisa njhani buku leyi nge Leswi Bibele Yi Swi Dyondzisaka ku pfuna swichudeni swa Bibele leswaku swi rhandza Yehovha?
2 “Lexi I Xikwembu Xa Hina”: Buku leyi nge Leswi Bibele Yi Swi Dyondzisaka yi kandziyisa rirhandzu ra Yehovha ni xilaveko xa ku va ni vuxaka na yena. Xana hi nga yi tirhisa njhani buku leyi leswaku hi dyondzisa van’wana leswaku va rhandza Xikwembu swinene? Loko hi hundzela eka yinhla yin’wana, hi nga ha vutisa swivutiso leswi nga ta endla leswaku xichudeni xi ehleketa, swo tanihi leswi nge: “Xana ntiyiso lowu wu ku byela yini hi Yehovha?” kumbe lexi nge “Xana yinhla leyi yi swi kombisa njhani leswaku Yehovha hi yena Tatana lonene loyi un’wana ni un’wana a n’wi lavaka?” Ku dyondzisa hi ndlela leyi swi nga pfuna xichudeni leswaku xi va ni vuxaka lebyi tiyeke na Yehovha vutomi bya xona hinkwabyo.
3 Loko hi pfuna swichudeni swa hina swi swi vona leswaku i swa risima ku kuma vutivi bya Xikwembu xi ri xin’we xa ntiyiso lexi hanyaka, sweswo swi ta endla leswaku swi pfumelelana ni marito ya Esaya lama nge, “lexi i Xikwembu xa hina.” (Esa. 25:9) Loko hi hlamusela Rito ra Xikwembu, hi fanele hi kandziyisa ndlela leyi vanhu va nga ta katekisiwa ha yona loko swikongomelo swa Yehovha swi hetiseka ehansi ka hulumendhe leyi tlakukeke leyi rhangeriwaka hi Kreste Yesu.—Esa. 9:6, 7.
4, 5. Xana rirhandzu ra Yehovha ri vula yini?
4 Vumbhoni Lebyi Kombisaka Leswaku Munhu U Rhandza Yehovha: Ha swi tiva leswaku ku rhandza Yehovha hi mbilu hinkwayo, moya-xiviri hinkwawo ni mianakanyo hinkwayo swi katsa swo tala. Hi fanele hi tekelela ni ku namarhela ndlela leyi a anakanyaka ha yona. (Ps. 97:10) Ndlela leyi hi xi rhandzaka ha yona Xikwembu yi vonaka kahle loko hi yingisa milawu ya xona hinkwayo ni ku tikarhatela ku va ni “swiendlo swa ku tinyiketela loku nga ni vukwembu,” hambiloko hi langutane ni miringo kumbe hi kanetiwa.—2 Pet. 3:11; 2 Yoh. 6.
5 Hi tsakela ku endla ku rhandza ku Xikwembu hikwalaho ka leswi hi xi rhandzaka. (Ps. 40:8) Xichudeni xa Bibele xi fanele xi swi vona leswaku milawu ya Xikwembu hinkwayo yi vekeriwe ku pfuna malandza ya xona hilaha ku nga heriki. (Det. 10:12, 13) Kutani loko munhu a hanya hi ku pfumelelana ni nkongomiso wa Yehovha, u va a kombisa leswaku wa yi tlangela swinene mintirho ya Yena hinkwayo leyi hlamarisaka. Pfuna xichudeni xi swi xiya leswaku hi rihi khombo leri nga vaka kona loko xi nga fambi hi tindlela ta Yehovha to lulama.
6. Hi yihi mikateko leyi munhu a nga ta yi kuma loko a rhandza Yehovha?
6 Mikateko Leyi Kumiwaka Hi Lava Va Rhandzaka Xikwembu: Yehovha u va khathalela swinene vanhu lava n’wi rhandzaka ni lava titsongahata, naswona u va paluxela “swilo leswi enteke swa Xikwembu.” (1 Kor. 2:9, 10) Loko va va ni vutivi lebyi kongomeke hi swikongomelo swa Yehovha, va va ni vumundzuku lebyinene ni ntshembo lowu tiyeke. (Yer. 29:11) Lava va n’wi rhandzaka u va kombisa musa wa rirhandzu. (Eks. 20:6) Va tlangela lunghelo leri va nga na rona ro kuma vutomi lebyi nga heriki hikwalaho ka leswi va n’wi rhandzaka swinene.—Yoh. 3:16.
7. U titwa njhani hi lunghelo leri u nga na rona ro dyondzisa van’wana leswaku va rhandza Yehovha?
7 Loko hi ya emahlweni hi dyondza hi Tata wa hina wa le tilweni, hi ta ya hi susumeteleka ku byela van’wana ha yena. (Mat. 13:52) Hakunene i lunghelo ku dyondzisa van’wana leswaku va rhandza Yehovha, ngopfu-ngopfu vana va wena! (Det. 6:5-7) Onge hinkwerhu, ku katsa ni swichudeni swa hina swa Bibele, hi nga hambeta hi dzunisa Yehovha tanihi leswi hi vonaka ‘vunene bya yena byo tala.’—Ps. 145:7.