“Tihlayiseni eRirhandzwini Ra Xikwembu”
1. Buku leyi nge “Tihlayiseni eRirhandzwini Ra Xikwembu” yi kandziyisiwe hi xikongomelo xihi?
1 Hakunene hi swi langutele hi mahlo-ngati ku dyondza buku leyintshwa leyi nge “Tihlayiseni eRirhandzwini Ra Xikwembu” eka Dyondzo ya Bibele ya Vandlha hi vhiki leri sungulaka hi February 23! Papila leri Huvo leyi Fumaka yi ri tsaleleke munhu un’wana ni un’wana la rhandzaka Yehovha ri gimeta hi marito lama nge: “Hi tshemba leswaku buku leyi yi ta ku pfuna leswaku u hambeta u hanya hi ku pfumelelana ni ntiyiso, xisweswo u tihlayisa ‘erirhandzwini ra Xikwembu, u ri ni ntshembo wo kuma vutomi lebyi nga heriki.’—Yudha 21.”
2. Buku leyi leyintshwa yi ta hi pfuna etimhakeni tihi ta vutomi?
2 Leswi Hi Nga Swi Langutelaka: Milawu ya Bibele leyi kongomisaka yi tirha njhani etimhakeni to fana ni ta vanghana, vuhungasi, ku xixima vulawuri, mikhuva ya munhu hi yexe, vukati, mavulavulelo ni minkhuvo? Mapfalo ya hina ma ta kongomisiwa hi milawu leyi tlakukeke yo lulama leyi nga eRitweni ra Xikwembu. (Ps. 19:7, 8) Loko hi ya hi yi twisisa swinene ndlela leyi Yehovha a swi langutaka ha yona swilo, hi ta susumeteleka ku n’wi yingisa etimhakeni hinkwato ta vutomi hileswi hi rhandzaka ku n’wi tsakisa.—Swiv. 27:11; 1 Yoh. 5:3.
3. Ha yini hi fanele hi tikarhatela ku hlamula eka dyondzo ya vhiki na vhiki?
3 Tiyimisele Ku Hlamula: Loko u ri karhi u lunghiselela, tivekele pakani yo dzunisa Xikwembu exikarhi ka vanhu va xona lava hlengeletaneke. (Hev. 13:15) Vandlha hinkwaro ri ta dyondza ni ku bula hi buku leyi leyintshwa. Tanihi leswi ku nga ta hlayiwa tindzimana titsongo vhiki na vhiki, hi ta kota ku lunghiselela kahle, xisweswo hi nyikela tinhlamulo leti hi khorwisekaka ha tona malunghana ni leswi hi swi dyondzeke. Tinhlamulo ta hina leti lunghiseleriweke kahle ni leti komeke ti ta khutaza van’wana erirhandzwini ni le mintirhweni leyinene naswona ti ta endla leswaku mhaka leyi ku buriwaka ha yona yi va leyi vuyerisaka swinene. (Hev. 10:24) Nakambe hi ta tsaka swinene loko hi ri karhi hi nyikela tinhlamulo malunghana ni ripfumelo ra hina.
4. Ha yini swi ri swa nkoka swinene ku va hi yingisa swileriso swa Yehovha?
4 Hi vusiku byo hetelela Yesu a ri laha misaveni, u vule leswaku ku yingisa swileriso swa Yehovha swi fambisana ni ku tshama erirhandzwini ra Yena. (Yoh. 15:10) Hi ku pfuniwa hi buku leyi nge “Rirhandzu Ra Xikwembu,” hi ta tiyimisela swinene ku tlula rini na rini ku tirhisa milawu ya Bibele leyi kongomisaka siku na siku swin’we ni ku ‘tihlayisa erirhandzwini ra Xikwembu.’—Yudha 21.