Tsima Ro Hlawuleka Ra Ku Rhambela Vanhu eXitsundzuxweni!

1. Hi wihi ntirho lowu vahuweleri va Mfumo va nga ta wu endla emisaveni hinkwayo ku sukela hi March 21, 2009, naswona ha yini?

¹ Hi Ravumune, April 9, 2009, vagandzeri va Yehovha Xikwembu emisaveni hinkwayo va ta hlengeletana leswaku va tsundzuka xiendlo lexikulu xa rirhandzu lexi Yehovha a xi kombeke vanhu. (Rhom. 5:6-8) Hi swi langutele hi mahlo-ngati ku va swin’we ni vanhu va timiliyoni lava tsakelaka loko hi tsundzuka rifu ra Yesu. Ku sukela hi March 21 vanhu emisaveni hinkwayo va ta nyikiwa swirhambo swo hlawuleka swa Xitsundzuxo.

2. Hi tihi tinhla leti u faneleke u ti tsundzuka loko u fambisa xirhambo?

² Tinhla Leti Faneleke Ti Tsundzukiwa: Swi tirhise kahle swifaniso, swivutiso ni matsalwa lama kombisiweke eka xirhambo. Hi xikombiso, u nga ha tirhisa xifaniso lexi nga emahlweni ka xirhambo kutani u ku: “Ndza ku rhamba leswaku u va na hina loko hi tsundzuka rifu ra Yesu, hi Ravumune, April 9, 2009.” Kutani n’wi kombe nhloko-mhaka ya xirhambo ni swivutiso leswi nga ehansi ka nhloko-mhaka yoleyo. Tiyiseka leswaku u byela n’wini wa muti leswaku a nga ha rhamba swirho swa ndyangu wakwe swin’we ni vanhu van’wana lava a tsakelaka ku ta na vona.

3. I yini leswi u nga swi endlaka endzhaku ka loko u rhambe vanhu?

³ Loko vandlha ra n’wina ri ri ni nsimu leyikulu, vakulu va nga ha mi byela leswaku mi siya swirhambo emakaya lawa mi nga kumangiki munhu eka wona. Hi mahelo-vhiki, fambisani timagazini swin’we ni swirhambo. Tivekeleni pakani yo rhamba vanhu lava mi tlheleleke eka vona, swichudeni swa Bibele, maxaka, swichudeni-kuloni, vatirhi-kuloni, vaakelani ni vanhu van’wana lava mi va toloveleke. N’wexemu, makwerhu un’wana wa xisati u rhambe maxaka yakwe ya 30 naswona a a tshamela ku ma tsundzuxa hi nkoka wa xiendlakalo lexi. Hakunene u tsakile loko 25 wa wona ma tile naswona endzhakunyana mune wa wona ma amukele dyondzo ya Bibele!

4. Hi wahi malunghiselelo lawa hi faneleke hi ma endla sweswi, naswona ha yini?

⁴ Tilunghiselele Sweswi: Vahuweleri vo tala va nga ha swi kota ku ndlandlamuxa ntirho wa vona hi March na April. Loko u ri ni vana kumbe swichudeni swa Bibele leswi endlaka nhluvuko lowunene, lowu wu nga ha va nkarhi lowunene leswaku va va vahuweleri lava nga khuvuriwangiki. Sweswi i nkarhi wo sungula ku endla malunghiselelo ya leswaku u hlanganyela hi xitalo eka tsima leri ro rhamba vanhu leswaku va ta tsundzuka swikombiso swimbirhi leswikulu swa rirhandzu.—Yoh. 3:16; 15:13.