Loko Hi Chumayela Hi Kombisa Leswaku Hi Rhandza Xikwembu
1. Ndlela leyi Yesu a a xi rhandza ha yona Xikwembu yi n’wi susumetele leswaku a endla yini?
1 Rirhandzu ri susumetele Yesu leswaku a chumayela. Tindlela leti a nga ti tirhisa loko a chumayela ti kombisa ndlela leyi a a n’wi rhandza ha yona Yehovha. Yesu u te: “Ku endlela leswaku misava yi swi tiva leswaku ndza n’wi rhandza Tatana, ndzi endla hilaha Tatana a ndzi leriseke ku endla hakona.” (Yoh. 14:31) Leswi hi nga valandzeri va Yesu, na hina hi ni lunghelo ro kombisa ndlela leyi hi xi rhandzaka ha yona Xikwembu loko hi chumayela.—Mat. 22:37; Efe. 5:1, 2.
2. Ntirho wa hina wo chumayela wu hi pfuna leswaku hi endla yini?
2 “Vito Ra Wena A Ri Kwetsimisiwe”: Loko hi tirhisa nkarhi wun’wana ni wun’wana lowu hi wu kumaka leswaku hi vulavula ni vanhu van’wana hi Yehovha ni Mfumo wakwe, hi kombisa leswaku ha n’wi rhandza naswona hi hoxa xandla eku kwetsimisiweni ka vito rakwe. (Ps. 83:18; Ezek. 36:23; Mat. 6:9) Leswi ku chumayela ka Yesu a swi endla leswaku vito ra Xikwembu ri kwetsimisiwa, na hina loko hi chumayela hi kombisa leswaku hi navela leswaku vito rero ri kwetsimisiwa naswona ku rhandza ka xona ku endleka.—Mat. 26:39.
3. Rirhandzu leri hi nga na rona eka Yehovha ri hi pfuna njhani leswaku hi hlula swihinga?
3 Rirhandzu Ri Hi Pfuna Leswaku Hi Hlula Swihinga: Rirhandzu leri hi nga na rona eka Yehovha ri hi pfuna leswaku hi hlula swihinga. (1 Kor. 13:4, 7) Yesu u langutane ni swiyimo swo tala swo tika leswi a swi ta va swi n’wi siverile ku ya emahlweni ni ntirho wakwe wo chumayela. Kambe rirhandzu leri a a ri na rona eka Yehovha ni ku navela kakwe ku endla ku rhandza ka Tata wakwe, swi n’wi pfunile leswaku a hlula swihinga leswi a a langutana na swona. (Mar. 3:21; 1 Pet. 2:18-23) Na hina hi langutana ni swiyimo swo tika, kambe rirhandzu leri hi nga na rona eka Yehovha ra hi pfuna leswaku hi swi tiyiselela. Loko hi landzela xikombiso lexi Kreste a nga hi vekela xona, hi ta va ni xivindzi naswona a hi nge hetiwi matimba kutani hi tshika ku chumayela. Hambileswi ku kanetiwa hi swirho swa ndyangu, vuvabyi, ku dyuhala kumbe ku vengiwa swi nga hi hetaka matimba, a swi nge swi koti ku hi sivela ku kombisa rirhandzu ra hina eka Yehovha kutani hi nga ha wu hisekeli ntirho wa hina wo chumayela.
4. Rirhandzu leri hi nga na rona eka Yehovha ri hi nyika lunghelo ro endla yini?
4 Rirhandzu ri ni matimba naswona ha tsaka leswi hi nga ni lunghelo ro kombisa hi mimoya-xiviri ya hina hinkwayo leswaku hi rhandza Xikwembu loko hi ri ensin’wini. (1 Kor. 13:13) Leswi nkarhi wa leswaku vito ra Xikwembu ri kwetsimisiwa hilaha ku heleleke wu nga kwala nyongeni, onge ‘rirhandzu ra hina ri nga ya ri andza ngopfu.’—Filp. 1:9; Mat. 22:36-38.