“U Nga Chavi”
1. I swihi swiyimo swo tika leswi fanaka ni swa Yeremiya leswi hi nga ha langutanaka na swona?
1 Loko Yeremiya a nyikiwe ntirho wa vuprofeta, a a titwa a nga faneleki. Kambe Yehovha u n’wi khutaze a ku, “u nga chavi” naswona hi musa u n’wi tiyisile leswaku a hetisisa xiavelo xa yena. (Yer. 1:6-10) Eminkarhini ya hina, tingana ni ku nga titshembi swi nga khumba ndlela leyi hi hlanganyelaka ha yona entirhweni wa nsimu. Ku chava ndlela leyi vanhu va nga angulaka ha yona kumbe ndlela leyi va nga hi langutaka ha yona swi nga hi endla hi chava ku chumayela. Xana hi nga ku hlula njhani ku chava koloko naswona hi ta vuyeriwa hi yini?
2. Xana ku lunghiselela ku nga hi pfuna njhani leswaku hi hlula ku chava ensin’wini?
2 Lunghiselela Ka Ha Ri eMahlweni: Ku lunghiselela ka ha ri emahlweni swi ta hi pfuna leswaku hi hlula ku chava. Hi xikombiso, loko hi pfuxeta ka ha ri emahlweni ndlela yo hlamula lava lavaka ku siva bulo, hi ta va hi swi lunghekerile ku hlamula minkaneto leyi tolovelekeke. (Swiv. 15:28) Ha yini mi nga endli minkombiso hi nkarhi wa Dyondzo ya Ndyangu leswaku mi lunghiselela ndlela yo langutana ni minkaneto exikolweni ni le vutirhelini bya nsimu?—1 Pet. 3:15.
3. Xana ku tshembela eka Yehovha swi hi pfuna njhani leswaku hi hlula ku chava?
3 Tshembela Eka Yehovha: Loko hi titshega hi Xikwembu hi ta swi kota ku hlula ku chava. Yehovha u tshembise leswaku u ta hi pfuna. (Esa. 41:10-13) A ku na nsirhelelo wun’wana lowu hi nga wu kumaka wo fana na wona. Ku engetela kwalaho, Yesu u vule leswaku hambi ko va ni xiyimo xin’wana lexi a hi nga xi langutelanga, moya lowo kwetsima wu ta hi pfuna leswaku hi nyikela vumbhoni hi ndlela leyinene. (Marka 13:11) Hikwalaho, nkarhi hinkwawo kombela Yehovha leswaku a ku nyika moya lowo kwetsima.—Luka 11:13
4. Hi yihi mikateko leyi kumekaka hi ku tiyisela evutirhelini bya nsimu ku nga khathariseki ku kanetiwa?
4 Mikateko: Loko hi tiyisela evutirhelini bya nsimu ku nga khathariseki minkaneto, swi ta hi pfuna leswaku hi kota ku hlula miringo ya nkarhi lowu taka. Hi ta va ni xivindzi ni vurhena ku nga timfanelo ta lava teleke hi moya lowo kwetsima. (Mint. 4:31) Ku engetela kwalaho, loko hi hlula ku chava hi mpfuno wa Yehovha, hi tiyisa ripfumelo ra hina ni ku tshembela ka hina eka voko ra yena leri ponisaka. (Esa. 33:2) Nakambe hi kuma ntsako ni ku eneriseka hi ku tiva leswaku hi tsakisa Tata wa hina wa le tilweni. (1 Pet. 4:13, 14) Hikwalaho, hi nga chaveni ku twarisa mahungu ya Mfumo hi xivindzi, hi ri karhi hi titshega hi mpfuno wa Yehovha!