Masimu Ma Basile Leswaku Ma Tshoveriwa
1. Hi wihi ntirho wa nkoka lowu endliwaka?
1 Loko Yesu a heta ku chumayela wansati wa Musamariya u byele vadyondzisiwa vakwe a ku: “Tlakusani mahlo ya n’wina mi languta masimu, ma basile leswaku ma tshoveriwa.” (Yoh. 4:35, 36) Ntshovelo wa hi tlhelo ra moya a wa ha ta naswona Yesu a a kota ku vona leswi a swi ta hetisisiwa hi ntirho lowu wu nga ta endliwa emisaveni hinkwayo. Xikhundlha lexi Yesu a nga na xona etilweni xi endla leswaku a katseka swinene eka ntshovelo. (Mat. 28:19, 20) I yini leswi kombisaka leswaku ntirho lowu wa andza swinene tanihi leswi wu tshinelaka makumu ya wona?
2. Hi kwihi ku engeteleka loku kombisaka leswaku ntshovelo wa misava hinkwayo wu le ku andzeni?
2 Ntshovelo Wa Misava Hinkwayo: Hi lembe ra ntirho ra 2009, vahuweleri va andze hi 3,2 wa tiphesente emisaveni hinkwayo. Ematikweni lawa ntirho wo chumayela wu yirisiweke va andze hi 14 wa tiphesente. Nhlayo ya tidyondzo ta Bibele ta le kaya leyi vikiweke n’hweti ni n’hweti a yi tlula 7 619 000, ku nga nhlayo leyi hundzaka nhlohlorhi ya vahuweleri naswona yi yi tlulaka hi kwalomu ka hafu ya miliyoni nhlayo leyi vikiweke haxawa ya tidyondzo ta Bibele. Tanihi leswi ntirho wu yaka wu andza ematikweni yo tala, ku na swikombelo swo tala leswi amukeriwaka swa lava lavaka ku leteriwa tanihi varhumiwa le Giliyadi. Nsimu ya ririmi-rimbe yi humesa mihandzu yo tala ematikweni yo hambana-hambana. Swi le rivaleni leswaku Yehovha u hatlisisa ntirho hi nkarhi lowu wa ntshovelo wo hetelela. (Esa. 60:22) Xana u ni langutelo lerinene hi “nsimu” ya n’wina?
3. Xana van’wana va ri yini malunghana ni ntshovelo wa le ndhawini ya ka vona?
3 Ntshovelo Wa Le Ndhawini Ya Ka N’wina: Van’wana va nga ha vula va ku: “Nsimu ya hina a yi humesi mihandzu yo tala.” I ntiyiso nsimu yin’wana a yi humesi mihandzu ku fana ni yin’wana kumbe a ya ha humesi mihandzu hilaha a yi ri hakona eku sunguleni. Timbhoni tin’wana ti nga ha anakanya leswaku ntshovelo se wu fikelele nhlohlorhi ya wona etindhawini teto naswona ntirho wutsongo lowu saleke i wa ku hlanganisa lava nga sala. Xana swi tano hakunene?
4. Hi rihi langutelo lerinene leri hi faneleke hi ri hlakulela malunghana ni nsimu ya hina naswona ha yini?
4 Ntirho wo tshovela wu lava matimba ku sukela eku sunguleni ku fikela emakumu. Xiya marito ya Yesu ya xihatla lama nge: “Ntshovelo i wukulu, kambe vatirhi a hi vangani. Hikokwalaho, kombelani N’wini wa ntshovelo leswaku a rhumela vatirhi entshovelweni wakwe.” (Mat. 9:37, 38) Yehovha N’wini wa ntshovelo, u ni vutihlamuleri byo vula leswaku ntshovelo wu ri ni naswona wu ta va kwihi. (Yoh. 6:44; 1 Kor. 3:6-8) Hi wihi ntirho wa hina? Bibele ya hlamula: “Byala mbewu ya wena nimixo, naswona u nga ri wisisi voko ra wena ku fikela nimadyambu.” (Ekl. 11:4-6) Ina, loko ntshovelo wu fikelela makumu ya wona, a hi nkarhi wo wisisa voko ra hina!
5. Ha yini hi fanele hi ya emahlweni hi chumayela hi ku hiseka eka nsimu leyi vonakaka yi nga humesi mihandzu?
5 Hambeta U Tshovela: Hambiloko nsimu ya hina yi phindha-phindhiwile naswona yi ti komba yi nga humesi mihandzu, hi na xivangelo xo tirha hi ku hiseka naswona hi xihatla. (2 Tim. 4:2) Ku hundzuka loku hlamarisaka ka xiyimo xa misava, ku endla leswaku vanhu va cinca langutelo ra vona naswona va sungula ku anakanyisisa swinene hi vumundzuku. Loko vantshwa va ri karhi va kula, va nga ha vona xilaveko xo va ni ku sirheleleka ni ku rhula ka mianakanyo. Ku phikelela ka hina ku nga khumba vanhu van’wana. Ina, lava nga yingiselangiki enkarhini lowu nga hundza va nga yingisela enkarhini lowu taka. Hambi lava alaka rungula ra hina hi vomu va fanele va lemukisiwa.—Ezek. 2:4, 5; 3:19.
6. I yini lexi nga hi pfunaka leswaku hi hambeta hi hiseka hambiloko nsimu ya hina yi tika?
6 I yini lexi nga hi pfunaka leswaku hi hambeta hi hiseka hambiloko nsimu ya hina yi tika? Kumbexana hi nga katsa ntirho wa hina wo chumayela hi yindlu ni yindlu ni swiyenge swin’wana swo chumayela swo fana ni ku chumayela etindhawini ta mabindzu kumbe hi riqingho. Kumbe hi nga cinca-cinca xingheniso xa hina. Hi nga cinca ni xiyimiso xa hina leswaku hi kota ku chumayela ni madyambu kumbe hi minkarhi yin’wana leyi vanhu va kumekaka ha yona emakaya. Kumbexana hi nga dyondza ririmi lerintshwa leswaku hi ta kota ku fikelela vanhu lava engetelekeke hi mahungu lamanene. Hi nga swi kota ku andzisa vutirheli bya hina hi ku nghenela vuphayona bya nkarhi hinkwawo. Kumbe hi nga rhurhela endhawini leyi nga ni vatshoveri va ntsongo. Loko hi ri ni langutelo lerinene hi ku tshovela, hi ta ti karhatela ku hlanganyela hi xitalo hilaha hi nga kotaka hakona eka ntirho lowu wa nkoka.
7. Xana hi fanele hi ya emahlweni ni ntirho wo hlengeleta ku fikile rini?
7 Varimi va ni nkarhi wutsongo wo hlengeleta mintshovelo, hikwalaho a va fanelanga va wisa kumbe va hunguta rivilo ku kondza ntirho wu hela. Ntshovelo hi tlhelo ra moya wu lava langutelo leri fanaka. Xana hi fanele hi ya emahlweni ni ntirho wo hlengeleta ku fikile rini? Ku fikela “emakumu ka mafambiselo ya swilo” naswona ku fika ‘emakumu.’ (Mat. 24:14; 28:20) Ku fana na Yehovha loyi a nga Mutirhi lonkulu, hi lava ku heta ntirho lowu hi nyikiweke wona. (Yoh. 4:34; 17:4) Hikwalaho a hi hambeteni hi endla ntirho lowu hi ku hiseka, hi ntsako naswona hi ri ni langutelo lerinene ku kondza makumu ma fika. (Mat. 24:13) Ntshovelo a wu si hela!
[Marito lama tshahiweke exihlokweni lama nga eka tluka 2]
Ntirho wo tshovela wu lava matimba ku sukela eku sunguleni ku fikela emakumu