Mfanelo Ya Nkoka Swinene Ya Ku Va Mudyondzisi Lonene

1. Hi yihi mfanelo ya nkoka swinene ya ku va mudyondzisi lonene?

¹ Hi yihi mfanelo ya nkoka swinene leyi endlaka leswaku munhu a va mudyondzisi lonene wa Bibele? Xana i dyondzo ya misava? Xana i ntokoto? Xana i vuswikoti bya ntumbuluko? Entiyisweni, i mfanelo leyi hetisisaka Nawu, leyi kombisaka lava nga vadyondzisiwa va Yesu naswona hi yona leyikulu ni leyi tsakisaka eka timfanelo leti xiyekaka ta Yehovha. (Yoh. 13:35; Gal. 5:14; 1 Yoh. 4:8) Mfanelo leyi i rirhandzu. Vadyondzisi lavanene va kombisa rirhandzu.

2. Ha yini swi ri swa nkoka leswaku hi rhandza vanhu?

² Rhandza Vanhu: Mudyondzisi Lonkulu, ku nga Yesu, u kombise vanhu rirhandzu naswona leswi swi va susumetele leswaku va n’wi yingisa. (Luka 5:12, 13; Yoh. 13:1; 15:13) Loko hi khathala hi vanhu, hi ta chumayela nkarhi wun’wana ni wun’wana. Swihinga swo fana ni nxaniso ni ku loloha a swi nge hi siveli. Hi ta kombisa leswaku ha khathala swinene hi vanhu lava hi va chumayelaka naswona hi ta antswisa xingheniso xa hina leswaku xi fambisana ni leswi va karhataka. Hi ta tiyimisela ku tinyika nkarhi ku nga ri ntsena loko hi ri ni xichudeni ha xin’we xa Bibele kambe niloko hi ri eku lunghiseleleni ka dyondzo ha yin’we ka ha ri emahlweni.

3. Xana ku rhandza ntiyiso wa Bibele swi hi pfuna njhani ensin’wini?

³ Rhandza Ntiyiso Wa Bibele: Yesu na yena a a rhandza ntiyiso wa Bibele naswona a wu teka tanihi xuma. (Mat. 13:52) Loko hi rhandza ntiyiso, hi ta vulavula hi ku hiseka naswona leswi swi nga tsakisa vayingiseri va hina. Rirhandzu ro tano ri ta hi pfuna leswaku hi dzika eka rungula ra nkoka leri hi ri hundzisaka ematshan’weni yo vilela hi vuswikoti bya hina naswona a hi nge khomiwi ngopfu hi rhumbyana ensin’wini.

4. Xana hi nga ri hlakulela njhani rirhandzu?

⁴ Hlakulela Rirhandzu: Hi nga swi hlakulela hi ndlela yihi ku rhandza vanhu? Hi ku anakanyisisa hi rirhandzu leri Yehovha ni N’wana wakwe va ri kombiseke ni xiyimo xo biha lexi vanhu lava nga ensin’wini ya hina va nga eka xona hi tlhelo ra moya. (Mar. 6:34; 1 Yoh. 4:10, 11) Rirhandzu ra hina ra ntiyiso wa Bibele ri ta ya ri kula hikwalaho ka dyondzo ya nkarhi na nkarhi ya munhu hi yexe ni ku anakanyisisa. Rirhandzu i mbhandzu wa moya. (Gal. 5:22) Kutani hi nga kombela Yehovha leswaku a hi nyika moya lowo kwetsima ni ku hi pfuna leswaku hi kula erirhandzwini. (Luka 11:13; 1 Yoh. 5:14) Ku nga khathariseki dyondzo ya hina ya misava, ntokoto lowu hi nga na wona entiyisweni kumbe vuswikoti bya ntumbuluko, hi nga va vadyondzisi va Bibele lava humelelaka loko hi kombisa rirhandzu.