Sirhelela Ripfalo Ra Wena
1. Hi xihi xihloko xa siku ra nhlengeletano yo hlawuleka ya lembe ra ntirho ra 2013, naswona hi xihi xikongomelo xa nongonoko?
1 Siku ni siku hi langutana ni swiyimo leswi nga endlaka leswaku hi onha mapfalo ya hina. Hi yo mhaka nongonoko wa siku ra nhlengeletano yo hlawuleka ya lembe ra ntirho ra 2013 leri sungulaka hi September 1, 2012, wu ri ni nhloko-mhaka leyi nge “Sirhelela Ripfalo Ra Wena.” (1 Tim. 1:19) Nongonoko wolowo wu hleriwe hi ndlela leyi nga ta pfuna un’wana ni un’wana wa hina leswaku a dzikisa mianakanyo eka ndlela leyi a yi tirhisaka ha yona nyiko leyi yo hlawuleka leyi humaka eka Muvumbi.
2. Hi swihi swivutiso swa nkoka leswi nga ta hlamuriwa loko nongonoko wu karhi wu ya emahlweni?
2 Tinhla Leti U Faneleke U Ti Xiya: Nongonoko wu ta hlamula swivutiso swa nkombo malunghana ni ripfalo:
• I yini leswi nga vekaka ripfalo ra hina ekhombyeni?
• Hi nga ri letela njhani ripfalo ra hina?
• Hi nga swi kotisa ku yini ku va lava baseke engatini ya vanhu hinkwavo?
• Xana ku anakanyisisa ni ku hanya hi misinya ya milawu ya Bibele swi kombisa yini hi hina?
• Xana hi nga swi papalata njhani ku vavisa van’wana loko swi ta etimhakeni ta ripfalo?
• Vantshwa, xana mi nga tiyisela njhani loko mi tshikileriwa leswaku mi landzula ripfumelo ra n’wina?
• Hi yihi mikateko leyi kumiwaka hi vanhu lava landzelaka ripfalo ra vona leri kongomisiwaka hi moya?
3. Xana nongonoko wu ta hi vuyerisa njhani?
3 Hi ku pfuniwa hi Yehovha hi nga swi kota ku hlula matshalatshala ya Sathana yo ringeta ku tlanyata mapfalo ya hina. Hi ku tirhisa Rito ra Xikwembu ni nhlengeletano ya xona, Tata wa hina wa le matilweni la nga ni rirhandzu u ri: “Ndlela hi leyi. Fambani hi yona.” (Esa. 30:21) Nongonoko lowu i ndlela yin’wana leyi Yehovha a yi tirhisaka. Hikwalaho, endla matshalatshala ya leswaku u va kona eka nongonoko hinkwawo. Yingisela hi vukheta u tlhela u kambisisa ndlela leyi u nga tirhisaka tinhla leti u nga ta ti dyondza ha yona. Bulani hi nongonoko hinkwawo tanihi ndyangu. Loko hi tirhisa swiletelo leswi hi swi dyondzaka, swi ta hi tiyisa leswaku hi hambeta hi ‘hlayisa ripfalo lerinene’ swi tlhela swi hi pfuna ku papalata mintlhamu yo rhandza ntsako lowu tisiwaka hi misava ya Sathana.—1 Pet. 3:16.