I Yini Lexi Hi Susumetelaka Ku Chumayela?

1. Leswaku hi ya ensin’wini, i vamani lava hi faneleke hi va rhandza?

¹ Ku chumayela mahungu lamanene ya Mfumo wa Xikwembu i ntirho wa nkoka swinene lowu hi nga wu endlaka namuntlha. Hakunene, hi ntirho lowu, hi kombisa ku yingisela milawu yimbirhi leyikulu, ku nga ku rhandza Yehovha ni ku rhandza warikwenu. (Mar. 12:29-31) Rirhandzu i mfanelo ya nkoka leyi hi susumetelaka ku chumayela hi ku hiseka.—1 Yoh. 5:3.

2. Ku chumayela ka hina ku swi kombisa njhani leswaku hi rhandza Yehovha?

² Ku Rhandza Yehovha: Ku rhandza Yehovha, munghana wa hina la rhandzekaka, swi hi susumetela ku va hi n’wi lwela. Sathana u ni malembe ya kwalomu ka 6 000 a ri karhi a hehla Yehovha. (2 Kor. 4:3, 4) Hikokwalaho, vanhu va tshemba leswaku Xikwembu xi xupula vadyohi hi ku va hisa etiheleni, va vula leswaku i vunharhu-un’we ni leswaku a xi khathali hi vanhu. Vo tala va gimeta hileswaku a xi kona. Hi lava leswaku vanhu va tiva ntiyiso malunghana ni Tata wa hina wa le tilweni ku nga, Yehovha. Ku gingiriteka ka hina ensin’wini ku n’wi endla a tsaka swinene naswona ku heta Sathana matimba.—Swiv. 27:11; Hev. 13:15, 16.

3. Xana vutirheli bya hina byi swi kombisa njhani leswaku hi rhandza warikwenu?

³ Ku Rhandza Warikwenu: Nkarhi na nkarhi loko hi chumayela munhu, hi kombisa leswaku ha n’wi rhandza. Eminkarhini leyi ya mangava, vanhu va swi tsakela swinene ku twa mahungu lamanene. Vo tala va fana ni Vaninivha hi nkarhi wa Yonasi lava a “va nga ku tiviki nikatsongo ku hambana exikarhi ka voko ra vona ra xinene ni ra ximatsi.” (Yon. 4:11) Vutirheli bya hina byi dyondzisa vanhu ku hanya vutomi lebyinene ni ku tsaka. (Esa. 48:17-19) Byi va nyika ntshembo. (Rhom. 15:4) Loko va yingisa naswona va hanya hi ku pfumelelana ni leswi va swi dyondzaka, va “ta ponisiwa.”—Rhom. 10:13, 14.

4. I yini lexi Yehovha a nga ta ka a nga xi rivali?

⁴ Vana lavanene a va fanelanga va kombisa ku rhandza vatswari va vona hi nkarhi wo karhi ntsena. Va va rhandza minkarhi hinkwayo. Hilaha ku fanaka, loko hi rhandza Xikwembu ni warikwenu swinene, swi ta hi susumetela ku xalamukela minkarhi leyi nga hi pfulekelaka ku chumayela, ku nga ri ku chumayela hi minkarhi leyi hi tivekeleke yona ntsena. Hi ta hambeta hi chumayela handle ko rhutela. (Mint. 5:42) Yehovha a nge ri rivali rirhandzu ro tano.—Hev. 6:10.