Landzela Ntila Wa Vaprofeta—Mikiya
1. Hi xihi xivutiso lexi Mikiya a nga ha vaka a anakanyisise ha xona, kambe ha yini ku chumayela kakwe ku nga vanga ka hava?
1 ‘Xana makumu ya mafambiselo lawa yo homboloka ma ta fika rini?’ Muprofeta Mikiya a nga ha va a anakanyisise hi xivutiso lexi fanaka ni lexi loko a ri karhi a chumayela rungula ra leswaku Yehovha u ta lovisa mfumo wa Israyele ni wa Yuda. Hambiswiritano, ku chumayela kakwe a ku vanga ka hava. Hi lembe ra 740 B.C.E., enkarhini lowu Mikiya a hanyeke ha wona, marito lawa Yehovha a ma vuleke malunghana ni muti wa Samariya ma hetisekile. (Mik. 1:6, 7) Endzhakunyana, hi lembe ra 607 B.C.E. muti wa Yerusalema wu lovisiwile. (Mik. 3:12) Hi nga n’wi tekelela njhani Mikiya tanihi leswi hi rindzeleke ku lovisiwa ka mafambiselo lawa yo homboloka ya swilo?
2. Hi nga ku kombisa njhani ku lehisa mbilu loko ha ha rindzele siku ra Yehovha naswona ha yini?
2 Lehisa Mbilu: Mikiya u tsale a ku: “Loko ku ri mina, ndzi ta tshama ndzi rindzele Yehovha. Ndzi ta kombisa moya wo rindza eka Xikwembu lexi xi ndzi ponisaka.” (Mik. 7:7) I ntiyiso leswaku Mikiya a nga tshamanga hi mavoko a rindzela leswaku makumu ma fika. U tshame a khomekile tanihi leswi a a ri muprofeta wa Yehovha. Loko ha ha rindzele siku ra Yehovha, hi fanele hi endla “swiendlo swo kwetsima swa ku tikhoma ni swiendlo swa ku tinyiketela loku nga ni vukwembu.” (2 Pet. 3:11, 12) Ku lehisa mbilu ka Yehovha ku endla leswaku vanhu va kuma nkarhi wa ku hundzuka. (2 Pet. 3:9) Hikwalaho, hi yingisa ndzayo ya Xikwembu ya leswaku hi tekelela ku lehisa mbilu ka vaprofeta.—Yak. 5:10.
3. Ha yini hi fanele hi kombela Yehovha leswaku a hi nyika moya wakwe lowo kwetsima?
3 Titshege Hi Matimba Ya Yehovha: Hambileswi Mikiya a a nyikiwe ntirho wo tika, a a titshege hi Yehovha leswaku a n’wi nyika matimba ya leswaku a kota ku ya emahlweni ni ntirho wakwe. (Mik. 3:8) Hi yona mhaka Rito ra Yehovha ri hi khutazaka ku titshega hi Xikwembu leswaku xi hi nyika matimba. Hi mbilu yo basa xi nyika lava karhaleke matimba leswaku va kota ku hetisisa vutihlamuleri lebyi xi va nyikeke byona. (Ps. 84:5, 7; Esa. 40:28-31) Xana swi tshame swi ku humelela loko u ri karhi u endla ntirho wo kwetsima? Xana minkarhi hinkwayo wa khongela eka Yehovha leswaku a ku pfuna hi matimba ya moya wakwe lowo kwetsima?—Luka 11:13.
4. Mikiya u hi vekele xikombiso xihi lexinene namuntlha hi ndlela leyi a a hanya ha yona?
4 Mikiya u rhangise ku endla ku rhandza ka Xikwembu evuton’wini bya yena hinkwabyo. A a tiyimisele ku tshama a tshembekile hambileswi a a hanya ni vanhu lava a va ri ni mahanyelo yo biha. Hilaha ku fanaka, ku tshembeka ka hina ka ringiwa siku ni siku. Kutani a hi tiyimiseleni ku “famba hi vito ra Yehovha Xikwembu xa hina hilaha ku nga riki na makumu, hi masiku.”—Mik. 4:5.