Hi Ni Malembe Ya Dzana Hi Twarisa Mfumo Wa Xikwembu!
1. Vanhu va Yehovha va khutaziwe ku endla yini kwalomu ka malembe ya dzana lama hundzeke?
1 “Vonani, Hosi ya fuma! N’wina mi vayimeri va yona. Hikwalaho, twarisani, twarisani, twarisani Hosi ni mfumo wa yona.” Hi marito wolawo lama khutazaka lama vuriweke hi Makwerhu Rutherford kwalomu ka dzana ra malembe lama hundzeke, vanhu va Yehovha va khutaziwe ku chumayela rungula ra Mfumo ekule ni le kusuhi. Swoleswo hi swi endlile. Ku fana ni Vakreste vo sungula, hi chumayele mahungu lamanene ya Mfumo “eka ntumbuluko hinkwawo lowu nga ehansi ka tilo.” (Kol. 1:23) Loko hi languta eka malembe ya dzana lama hundzeke, i yini leswi hi swi endleke leswaku hi twarisa Mfumo wa Xikwembu? Hi nga ya njhani emahlweni hi twarisa Mfumo wolowo tanihi leswi wu nga le kusuhi ni ku hlanganisa malembe ya 100 wu ri karhi wu fuma?
2. Minkandziyiso ya hina yi wu seketele njhani Mfumo wa Xikwembu?
2 Ku Anakanya Hi Leswi Endlekeke Enkarhini Lowu Hundzeke: Minkandziyiso ya hina yi ni makume ya malembe yi ri karhi yi vulavula hi Mfumo wa Xikwembu. Ku sukela hi 1939 magazini-nkulu wa hina wu ni vito leri nge: Xihondzo Xo Rindza Xi Huwelela Mfumo Wa Yehovha. Magazini lowu nkarhi na nkarhi wu vulavula hi Mfumo wa Xikwembu ni leswi wu nga ta swi endla. Magazini wa Xalamuka! na wona wu vulavula hi Mfumo wa Xikwembu tanihi wona ntsena lowu nga ta tlhantlha swiphiqo swa vanhu. Swa fanela leswi timagazini leti timbirhi ti hundzuluxeriwaka ni ku fambisiwa ku tlula timagazini hinkwato emisaveni hinkwayo!—Nhlav. 14:6.
3. Hi tihi tindlela tin’wana leti hi ti tirhiseke leswaku hi twarisa Mfumo?
3 Vanhu va Yehovha va tirhise tindlela to hambana-hambana ku twarisa Mfumo. Emalembeni ya khale, a hi tirhisa timovha leti nga ni swikurisa-marito, hi haxa eka xiya-ni-moya hi tlhela hi tirhisa tigramafoni leti rhwalekaka. Tindlela toleto to chumayela ti hi pfunile leswaku hi chumayela mahungu lamanene eka vanhu vo tala hi nkarhi lowu a ku ri ni vahuweleri va nga ri vangani va Mfumo. (Ps. 19:4) Emalembeni ya sweswinyana, hi endle leswaku rungula ra hina ri kumeka eka jw.org, xisweswo hi twarisa Mfumo eka vanhu va timiliyoni—ku katsa ni lava tshamaka ematikweni lawa ntirho wa hina wu siveriweke.
4. Hi tihi tindlela to hlawuleka leti hi ti tirhiseke?
4 Vanhu va Yehovha va tlhele va tirhisa tindlela to hlawuleka leswaku va twarisa rungula ra Mfumo. Hi xikombiso, ku sukela exikarhi ka va-1990, hi endle matshalatshala yo ndlandlamuxa ntirho wa hina wo chumayela hi yindlu ni yindlu hi ku chumayela etiphakeni ta mani na mani, etindhawini leti ku pakiwaka timovha ni le tindhawini ta mabindzu. Sweswinyana hi hlele matsima yo hlawuleka yo chumayela etindhawini ta mani na mani emadorobeni lamakulu emisaveni hinkwayo. Ku engetela kwalaho, mavandlha yo tala ma chumayela erivaleni ensin’wini ya wona ma tirhisa swigolonyana ni matafula yo veka tibuku lama vekiwaka emadorobeni etindhawini leti ku hundzaka vanhu vo tala. Entiyisweni, ntirho wa hina wo chumayela hi yindlu ni yindlu wa ha ri ndlela ya hina leyikulu yo chumayela hi Mfumo.—Mint. 20:20.
5. Vo tala va hina va ta pfulekeriwa hi nkarhi wo endla yini eka lembe lerintshwa ra ntirho?
5 Ku Languta eNkarhini Lowu Taka: Loko ku sungula lembe lerintshwa ra ntirho hi September, vo tala va ta teka vuphayona bya nkarhi hinkwawo. Xana na wena u nga byi teka? Loko u nga swi koti, xana u nga teka vuphayona bya nkarhinyana nkarhi na nkarhi? Ku nga khathariseki leswaku u ta swi kota ku phayona kumbe a wu nge swi koti, Yehovha u ta ku katekisa eka swilo swihi na swihi leswi u nga ta titsona swona leswaku u hlanganyela hi xitalo eku twariseni ka Mfumo.—Mal. 3:10.
6. Ha yini n’hweti ya October 2014 yi ta va yo hlawuleka?
6 Hi October 2014 Mfumo wa Xikwembu wu ta va wu ri ni malembe ya 100 wu ri karhi wu fuma. Swa fanela leswi nkandziyiso wa vanhu hinkwavo wa Xihondzo xo Rindza wa n’hweti yoleyo wu nga ta va wu vulavula hi Mfumo wa Xikwembu. Ha yini u nga tikarhateli ku fambisela vanhu vo tala swinene magazini lowu? Loko ha ha rindzele swa le nkarhini lowu taka, onge un’wana ni un’wana wa hina a nga ya emahlweni a “vula mahungu lamanene ya mfumo wa Xikwembu” eka vanhu hinkwavo lava nga ta yingisela.—Mint. 8:12.