Landzela Ntila Wa Vaprofeta—Nahume
1. Hi dyondza yini ebukwini ya Nahume?
1 Marhumbi ya muti wa Ninivha wa khale i vumbhoni bya leswaku Yehovha wa tirihisela eka valala va Yena ni leswaku hambi ku ri valala lava nga ni tihanyi a va nge swi koti ku lwa na Yena, hilaha Nahume a profeteke hakona. (Nah. 1:2, 6) Loko hi byi kambisisa hi vukheta vuprofeta bya Nahume hi nga dyondza swo karhi leswi hi nga swi tirhisaka loko hi ri ensin’wini.
2. Hi nga endlisa ku yini leswaku rungula ra hina ri va leri khutazaka?
2 Chavelela Vanhu U Tlhela U Va Nyika Ntshembo: Loko u yi hlaya ro sungula, buku ya Nahume yi tikomba yi vulavula ntsena hi ku lovisiwa ka muti wa Ninivha, ntsindza wa khale wa Vaasiriya lava a va tikukumuxa. (Nah. 1:1; 3:7) Hambiswiritano, xitiviso xolexo a xi ri mahungu lama tsakisaka eka vanhu va Yehovha. Nahume, loyi vito rakwe ri vulaka “Muchaveleri,” u tiyisekise Vayuda-kulobye leswaku valala va vona a va ta lovisiwa ku nga ri khale. Nahume u tlhele a tiyisekisa leswaku Yehovha i “khokholo esikwini ra maxangu.” (Nah. 1:7) Loko hi ri karhi hi chumayela, na hina hi byela van’wana mahungu lamanene hi tlhela hi va khutaza ku lava vutumbelo eka Yehovha.—Nah. 1:15.
3. Hi nga n’wi tekelela njhani Nahume loko hi tirhisa swikombiso kumbe swifaniso?
3 Tirhisa Swikombiso Ni Swifaniso: Yehovha u huhutele Nahume leswaku a fanisa ku lovisiwa ka muti wa Ninivha ni ka muti wa Tebesi (No-amoni) lowu a wu ri aEgipta, lowu lovisiweke hi Vaasiriya enkarhini lowu hundzeke. (Nah. 3:8-10) Loko hi ri karhi hi byela vanhu hi ku lovisiwa ka mafambiselo lawa yo homboloka ya swilo, hi nga kandziyisa vuprofeta bya le Bibeleni lebyi kombisaka leswaku Yehovha u swi hetisisa hinkwaswo leswi a swi vuleke. Hi xikombiso, loko Vababilona ni Vameda va ta lwa ni muti wa Ninivha hi 632 B.C.E., mpfula leyikulu yi endle leswaku Nambu wa Tigri wu khapakhapa, ivi wu wisa xiphemu xin’wana xa marhangu ya muti wolowo lawa a swi nga koteki ku nghena eka wona. Muti wa Ninivha wu hatle wu tekiwa hilaha Yehovha a profeteke hakona.—Nah. 1:8; 2:6.
4. Hi nga yi veka njhani mhaka erivaleni yi tlhela yi twisiseka loko hi ri ensin’wini?
4 Veka Mhaka Ya Wena eRivaleni Naswona Yi Twisiseka: Nahume u yi hlamusele kahle mhaka ya yena a tlhela a yi endla yi khumba mbilu. Tinhla ta yena a ti ri erivaleni. (Nah. 1:14; 3:1) Hilaha ku fanaka, hi lava ku tirhisa ririmi leri twisisekaka hi ku olova. (1 Kor. 14:9) Eka riendzo ra wena ro sungula, xi hlamusele kahle xikongomelo xa riendzo ra wena. Loko u ri karhi u dyondza Bibele ni vanhu, va pfune leswaku va va ni ripfumelo eka Yehovha ni le ka Rito ra yena naswona va twisisa ndlela leyi rungula leri ri tirhaka ha yona eka vona.—Rhom. 10:14.
5. Hi xihi xitiyisekiso lexi hi xi kumaka eka vuprofeta bya Nahume?
5 Nahume u swi kombise kahle ebukwini ya Bibele leyi vitaniwaka hi vito ra yena, leswaku a a tiyiseka leswaku leswi Yehovha a swi vuleke swi ta hetiseka. Tanihi leswi makumu ya mafambiselo ya Sathana ma nga le kusuhi, hi chaveleriwa hi xihlambanyo lexi lexi humaka eka Xikwembu: “Maxangu a ma nge vi kona ra vumbirhi.”—Nah. 1:9.