Nkwama Lowu Hi Wu Tirhisaka Loko Hi Dyondzisa
1. Vakreste lava chumayelaka mahungu lamanene va fana njhani ni vatirhi lava nga ni vutshila?
1 Vatirhi lava nga ni vutshila va tirhisa switirho swo hambanahambana. Hambileswi switirho swin’wana va swi tirhisaka loko va endla mintirho yo karhi yo hlawuleka, switirho swin’wana va swi tirhisa nkarhi ni nkarhi. Vatirhi lava nga ni vutshila va tshama va ri na swona switirho leswi eminkwameni ya vona, naswona switirho swoleswo va kota ku swi tirhisa kahle. Bibele yi khutaza Mukreste un’wana ni un’wana leswaku a tikarhatela ku ya ensin’wini ni ku va “mutirhi la nga riki na nchumu wo khomiwa hi tingana ha wona.” (2 Tim. 2:15) Hi yihi buku ya nkoka swinene leyi kumekaka enkwameni wa hina? I Rito ra Xikwembu, ku nga xitirho xa nkoka lexi hi xi tirhiselaka ku ‘endla vanhu vadyondzisiwa.’ (Mat. 28:19, 20) Hikwalaho, hi fanele hi tikarhatela ku va ni vutshila eku “ri [tameleni] khwatsi rito ra ntiyiso.” Hambiswiritano, ku ni minkandziyiso yin’wana leyi hi yi tirhisaka nkarhi ni nkarhi leyi kumekaka enkwameni lowu hi wu tirhisaka loko hi dyondzisa, leyi Vakreste hinkwavo va faneleke va dyondza ku yi tirhisa hi vutshila leswaku va dyondzisa vanhu ntiyiso.—Swiv. 22:29.
2. Hi yihi minkandziyiso leyi hi yi tirhiselaka ku dyondzisa vanhu?
2 Minkandziyiso Leyi Hi Dyondzisaka Ha Yona: Handle ka Bibele, hi yihi minkandziyiso yin’wana leyi hi faneleke hi yi tirhisa? Wo sungula lowu hi nga na wona lowu hi wu tirhiselaka ku dyondzisa vanhu ntiyiso wa Bibele i buku leyi nge, Xana Bibele Yi Dyondzisa Yini Hakunene? Loko hi heta ku hlaya buku leyi ni xichudeni, hi tirhisa buku leyi nge, “Tihlayiseni eRirhandzwini Ra Xikwembu” leswaku hi xi dyondzisa ku tirhisa milawu leyi kongomisaka ya Bibele evuton’wini bya xona siku ni siku. Hikwalaho, hi fanele hi va ni vuswikoti byo tirhisa tibuku leti hatimbirhi. Hi fanele hi tlhela hi va ni tibroxara to karhi eminkwameni ya hina. Broxara leyi nge, Mahungu Lamanene Lama Humaka Eka Xikwembu! i wun’wana wa minkandziyiso ya nkoka yo sungula tidyondzo ta Bibele. Loko ensin’wini ya hina ku ri ni vanhu lava nga swi kotiki kahle ku hlaya kumbe lava vulavulaka ririmi rin’wana, leri ri nga ni minkandziyiso yi nga ri yingani kumbe ri nga riki na minkandziyiso, hi nga tirhisa broxara leyi nge, Yingisa Xikwembu Kutani U Hanya Hilaha Ku Nga Heriki. Broxara ya nkoka yo kongomisa swichudeni enhlengeletanweni hi leyi nge, I Vamani Lava Endlaka Ku Rhandza Ka Yehovha Namuntlha? Tivhidiyo leti pfunaka eku endleni ka vadyondzisiwa to tanihi leyi nge, Ha Yini U Fanele U Dyondza Bibele?, Ku Endliwa Yini eHolweni Ya Mfumo? ni leyi nge, Xana Xikwembu Xi Ni Vito? hi fanele hi dyondza ku ti tirhisa kahle na tona.
3. Minkandziyiso ya le nkarhini lowu taka ya Vutirheli Bya Hina Bya Mfumo yi ta hi pfuna leswaku hi endla yini?
3 Minkandziyiso ya le nkarhini lowu taka ya Vutirheli Bya Hina Bya Mfumo yi ta hi pfuna leswaku hi va ni vutshila eku tirhiseni ka minkandziyiso yi nga ri yingani, leyi hi yi tirhisaka swinene leyi kumekaka enkwameni lowu hi wu tirhisaka loko hi dyondzisa. Loko hi tikarhatela ku tirhisa minkandziyiso leyi hi vutshila, hi ta va hi yingisa ndzayo leyi huhuteriweke leyi nge: “Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava va ku yingisaka.”—1 Tim. 4:16.