Tekelelani Xikombiso Xa Vaprofeta—Habakuku
1. Ha yini minkarhi yin’wana hi nga ha titwaka ku fana na muprofeta Habakuku?
1 Loko hi ri karhi hi langutana ni xiyimo xa misava leyi lexi nyanyaka ku biha, hi nga ha titwa ku fana na Habakuku, loyi a vutiseke Yehovha a ku: “Ha yini u ndzi endla ndzi vona leswo biha, naswona u tshamela ku languta ku karhateka?” (Hab. 1:3; 2 Tim. 3:1, 13) Loko hi anakanyisisa hi rungula ra Habakuku ni ku tshembeka kakwe swi ta hi pfuna loko ha ha rindzele siku ra Yehovha ra vuavanyisi.—2 Pet. 3:7.
2. Hi nga swi kombisa njhani leswaku hi tshembekile namuntlha?
2 Tshama U Tshembekile: Ematshan’weni yo hetiwa matimba hi xiyimo xakwe xo biha, Habakuku u ye emahlweni a va ni vuxaka lebyinene ni Xikwembu. (Hab. 2:1) Yehovha u tiyisekise muprofeta loyi leswaku rito Rakwe a ri ta hetiseka hi nkarhi lowu faneleke nileswaku “loyi a lulameke, u ta hambeta a hanya hikwalaho ka vutshembeki byakwe.” (Hab. 2:2-4) Kambe sweswo swi vula yini eka Vakreste lava hanyaka enkarhini wa makumu? Xa nkoka swinene i ku tshemba leswaku makumu ma ta fika ku nga ri ku vilerisiwa hi leswaku ma ta fika rini. Ripfumelo ri endla leswaku hi tshama hi rindzile ni leswaku hi rhangisa ntirho wo chumayela.—Hev. 10:38, 39.
3. Ha yini hi fanele hi endla leswi nga ematimbeni ya hina leswaku hi tshama hi tsakile loko hi tirhela Yehovha?
3 Tirhela Yehovha U Tsakile: Ripfumelo ra hina ri ta ringiwa loko Gogo wa Magogo a hlasela vanhu va Yehovha. (Ezek. 38:2, 10-12) Nyimpi yi endla leswaku ku nga vi na ku rhula, hambi ku ri eka lava hluleke. Swakudya swi nga ha kayivela, vanhu va nga ha lahlekeriwa hi tindlu ta vona naswona va nga ha phutseriwa hi nguvu ya vusiwana. Xana hi ta endla yini loko hi langutana ni swiyimo swo tika? Habakuku a a swi languterile ku langutana ni swiyimo swo tika, kutani u endle xiboho xo tirhela Yehovha a tsakile. (Hab. 3:16-19) “Ntsako wa Yehovha” wu ta tlhela wu hi pfuna leswaku hi tiyisela miringo leyi hi nga ta langutana na yona enkarhini lowu taka.—Neh. 8:10; Hev. 12:2.
4. Hi wihi ntsako lowu hi nga wu kumaka sweswi ni le nkarhini lowu taka?
4 Lava Yehovha a nga ta va ponisa esikwini rakwe ra vuavanyisi leri taka va ta ya emahlweni va dyondzisiwa ndlela leyi a lavaka leswaku va hanya ha yona. (Hab. 2:14) Lava nga ta pfuxiwa na vona va ta dyondza hi Yehovha. Ni sweswi, onge hi nga tirhisa nkarhi wun’wana ni wun’wana lowu hi wu kumaka leswaku hi vulavula hi Yehovha ni hi mintirho yakwe leyinene!—Ps. 34:1; 71:17.