MAHANYELO YA VAKRESTE
Tiphine Hi Ntirho Wo Chumayela Mahungu Lamanene
Xana swi tshame swi ku tikela ku chumayela? Vo tala va hina swi tshame swi va tano. Ha yini? Swi nga ha endleka hi tshame hi langutana ni ku xanisiwa ni ku va vanhu va nga ri tsakeli rungula ensin’wini ya hina kumbe hi chava ku chumayela vanhu lava hi nga va tiviki. Swi le rivaleni leswaku swilo leswi, swi nga hi hetela ntsako. Nilokoswiritano, hi gandzela Xikwembu lexi tsakeke lexi lavaka leswaku hi xi tirhela hi tsakile. (Ps 100:2; 1Tm 1:11) Hi swihi swivangelo swinharhu leswi endlaka hi tiphina hi ntirho wo chumayela?
Xo sungula, hi chumayela rungula leri nyikaka vanhu ntshembo. Hambileswi vanhu va nga ha riki na ntshembo, hi nga fikelela timbilu ta vona hi “mahungu lamanene ya leswo antswa.” (Esa 52:7) Loko u nga si ya eku chumayeleni, anakanyisisa hi mikateko leyi nga ta tisiwa hi Mfumo wa Xikwembu laha misaveni.
Xa vumbirhi, mahungu lamanene lawa hi ma chumayelaka ma endla leswaku vanhu va va ni mahanyelo lamanene ni ku va ni vuxaka ni Xikwembu. Va dyondza ku tshika mikhuva yo biha leswaku va kuma lunghelo ro hanya hilaha ku nga heriki. (Esa 48:17, 18; Rhm 1:16) Hi tihlo ra mianakanyo a hi tivoneni hi ri karhi hi endla ntirho wo ponisa vanhu. Hambileswi vanhu van’wana va nga laviki ku ponisiwa, hi ya emahlweni hi lavisisa lava swi lavaka.—Mt 10:11-14.
Xa vunharhu lexi nga xa nkoka swinene, ntirho wa hina wo chumayela wu yisa ku dzuneka eka Yehovha. Wa wu tlangela ntirho wa hina wo chumayela. (Esa 43:10; Hv 6:10) Ku engetela kwalaho, u hi nyika moya wo kwetsima leswaku hi ta kota ku hetisisa ntirho lowu. Hikwalaho, kombela Yehovha a ku nyika ntsako, tanihi leswi ku nga mbhandzu wa moya lowo kwetsima. (Ga 5:22) Hi ku pfuniwa hi yena, hi nga swi kota ku hlula ku chava loku hi nga na kona kutani hi chumayela hi xivindzi. (Min 4:31) Kutani, ku nga khathariseki leswaku vanhu va angula njhani ensin’wini ya hina, hi ta tiphina hi xiavelo xa hina xo chumayela.—Ezk 3:3.
Hi rihi langutelo leri u tsakelaka ku va na rona ensin’wini? U nga tshama u ri ni ntsako hi ndlela yihi?
HLALELA VHIDIYO LEYI NGE, KUMA NTSAKO HI KU DYONDZA NI KU ANAKANYISISA, KUTANI U HLAMULA SWIVUTISO LESWI LANDZELAKA:
Ha yini hi fanele hi tinyika nkarhi wo dyondza, hambiloko nh’weti ni nh’weti hi heta tiawara to tala hi ri karhi hi chumayela?
Hi nga n’wi tekelela hi ndlela yihi Mariya?
Xana hi rini laha u tinyikaka nkarhi wo anakanyisisa hi Rito ra Xikwembu?
I yini lexi endlaka u tiphina loko u ri karhi u chumayela mahungu lamanene?