“Kunene misava yi ta humesa swimila swa yona; Xikwembu, Xikwembu xa hina xi ta hi katekisa.”—PISALEMA 67:6

U Nga Tiphina Hi Mikateko Ya Muvumbi Hilaha Ku Nga Heriki

Xikwembu xi tshembise muprofeta Abrahama leswaku un’wana wa vatukulu vakwe u ta tisa mikateko eka “tinxaka hinkwato ta misava.” (Genesa 22:18) A ku ta va mani munhu yoloye?

Kwalomu ka malembe ya 2 000 lama hundzeke, Xikwembu xi nyike Yesu, loyi a ri ntukulu wa Abrahama matimba yo endla masingita yo tala. Masingita wolawo ma kombise leswaku xitshembiso lexi endliweke na Abrahama a xi ta hetiseka hi ku tirhisa Yesu.—Vagalatiya 3:14.

Masingita lawa Yesu a ma endleke ma pfune vanhu va kota ku swi xiya leswaku a ku ri yena la hlawuriweke hi Xikwembu ku katekisa vanhu naswona ma tlhele ma kombisa ndlela leyi Xikwembu a xi ta n’wi tirhisa ha yona ku endla leswaku vanhu hinkwavo va katekisiwa hilaha ku nga heriki. Xiya ndlela leyi masingita ya Yesu ma kombiseke vumunhu byakwe ha yona.

Musa—Yesu u hanyise lava vabyaka.

Siku rin’wana, munhu loyi a ri na nhlokonho u kombele Yesu leswaku a n’wi hanyisa. Yesu u n’wi khumbile ivi a ku: “Ndza swi lava,” hi ku hatlisa nhlokonho yi nyamalala.—Marka 1:40-42.

Ku hanana—Yesu u phamele vanhu lava a va ri ni ndlala.

Yesu a nga lavi leswaku vanhu va khomiwa hi ndlala. Ku nga ri kan’we ntsena u phamele ntshungu hi singita hi ku endla leswaku xinkwa xitsongo xi tala, ni tinhlampfi titsongo ti tala. (Matewu 14:17-21; 15:32-38) Va dye va xurha ku tlhela ku sala swakudya swo tala.

Ntwelavusiwana—Yesu u pfuxe lava feke.

‘Hi ku susumetiwa hi ntwelavusiwana,’ Yesu u pfuxe jaha ra noni leyi a ku nga ha ri na munhu loyi a yi khathalela.—Luka 7:12-15.

MIKATEKO YA HILAHA KU NGA HERIKI KWALA MISAVENI

Yesu u swi veke erivaleni leswaku Xikwembu xi ni matimba yo katekisa vanhu. Ku nga ri khale, loko Yesu a vuya hilaha a tshembiseke hakona, Lowa Matimba Hinkwawo u ta n’wi tirhisa ku endla masingita lamakulu emisaveni hinkwayo!

Xana vutomi byi ta va njhani loko Xikwembu xi hetisisa xitshembiso lexi xi xi tshembiseke Abrahama? Lava va rhandzaka Xikwembu va tlhela va xi yingisa “va ta dya ndzhaka ya misava” naswona “va ta kuma ntsako lowu heleleke eku rhuleni lokukulu.” (Pisalema 37:11) “Rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.

Mayana nkateko wonghasi wa ku hanya hi ku rhula hilaha ku nga heriki la misaveni! Leswaku u dyondza leswi engetelekeke mayelana ni mikateko leyi hi nga ta yi kuma loko se ku fuma Xikwembu, nghena eka www.jw.org/ts.