Xana Xikwembu Xa Swi Twa Swikhongelo Swa Hina?

XIKWEMBU XA HI TWA.

“Wena Mutwi wa xikhongelo, vanhu hinkwavo va ta ta eka wena.”—Pisalema 65:2.

Van’wana va khongela hikuva va vula leswaku swi va thova mbilu, hambileswi va nga tshembiki leswaku Xikwembu xa va twa. Xikhongelo xi hi pfuna hi swo tala, a xo hi pfuna ku langutana ni swiphiqo swa hina ntsena. Bibele yi hi tiyisekisa leswaku “Yehovhaa u le kusuhi ni hinkwavo lava n’wi vitanaka, eka hinkwavo lava n’wi vitanaka hi ntiyiso. . . . U twa xirilo xa vona xo kombela ku pfuniwa.”—Pisalema 145:18, 19.

Hi nga tiyiseka leswaku Yehovha Xikwembu wa swi twa swikhongelo swa malandza yakwe. U te: “Mi ta ndzi vitana, mi ta, mi tlhela mi khongela eka mina naswona ndzi ta mi yingisa.”—Yeremiya 29:12.

XIKWEMBU XI LAVA U VULAVULA NA XONA HI XIKHONGELO.

“Mi phikelela exikhongelweni.”—Varhoma 12:12.

Bibele yi hi khutaza ku ya “emahlweni [hi] khongela” ni ku “hamba [hi] khongela nkarhi hinkwawo.” Swi le rivaleni leswaku Yehovha Xikwembu u lava leswaku hi n’wi khongela.—Matewu 26:41; Vaefesa 6:18.

Hikwalaho ka yini Xikwembu xi lava hi khongela? Hi xikombiso: Mutswari u tsaka ngopfu loko a twa xifanyetana xakwe xi ku: “Papa ndzi kombela u ndzi pfuna.” Swi nga ha endleka papa loyi a swi tiva leswi n’wana a swi lavaka kumbe ndlela leyi a titwaka ha yona, kambe loko a n’wi twa a vula sweswo, wa swi vona leswaku n’wana wakwe wa n’wi tshemba naswona wa n’wi rhandza. Na hina loko hi vulavula na Yehovha Xikwembu hi xikhongelo, hi n’wi komba leswaku ha n’wi tshemba naswona hi lava ku va ni vuxaka na yena.—Swivuriso 15:8; Yakobo 4:8.

XIKWEMBU XA KHATHALA SWINENE HA WENA.

“Mi lahlela ku vilela ka n’wina hinkwako eka xona, hikuva xa khathala hi n’wina.”—1 Petro 5:7.

Xikwembu xi lava hi vulavula na xona hi xikhongelo hikuva xa hi rhandza naswona xa khathala hi hina. Xa ma tiva maxangu ya hina ni leswi nga hi dyisiki byi rhelela naswona xi lava ku hi pfuna.

Hosi Davhida u kombele mpfuno eka Yehovha Xikwembu hi xikhongelo, a tlhela a n’wi byela leswi a a swi ehleketa ni ndlela leyi a a titwa ha yona. (Pisalema 23:1-6) Xana Xikwembu a xi titwa njhani hi Davhida? A xi n’wi rhandza naswona xi yingise swikhongelo swakwe swo tala. (Mitirho 13:22) Hilaha ku fanaka, Xikwembu xi yingisa swikhongelo swa hina hikuva xa khathala hi hina.

“NDZA N’WI RHANDZA YEHOVHA HIKUVA U TWA RITO RA MINA”

Lama i marito lama vuriweke hi un’wana wa mutsari wa buku ya tipisalema eBibeleni. A a tshemba leswaku Xikwembu xa swi twa swikhongelo swa yena naswona sweswo swi n’wi pfunile. Swi endle leswaku a titwa a ri munghana wa Xikwembu a tlhela a kota ku tiyisela swiphiqo evuton’wini.—Pisalema 116:1-9.

Loko hi tiyiseka leswaku Xikwembu xa swi twa swikhongelo swa hina, a hi nge tshiki ku khongela. Xiya ntokoto wa Pedro, loyi a tshamaka en’walungu wa Spain. Jaha rakwe leri a ri ri ni malembe ya 19 ri lovile loko ri kuma mhangu ya movha. Pedro u phofulele Xikwembu ndlela leyi a a titwa ha yona a tlhela a xi kombela leswaku xi n’wi chavelela ni ku tlhela xi n’wi seketela. Ku endleke yini? Pedro u ri: “Yehovha u swi hlamurile swikhongelo swa mina hi ku tirhisa Vakrestekulorhi, lava a va ta va ta hi seketela ni ku tlhela va hi chavelela mina ni nsati wa mina.”

I ntiyiso leswaku xikhongelo a xi endlanga leswaku n’wana wa vona a pfuka, kambe xi n’wi pfunile Pedro ni ndyangu wakwe. Loko nsati wakwe María Carmen a tsundzuka mhaka leyi u ri: “Xikhongelo xi ndzi pfune leswaku ndzi kota ku tiyisela gome leri a ndzi ri na rona. A ndzi swi tiva leswaku Yehovha Xikwembu wa ndzi twa hikuva a ndzi titwa ndzi phyuphyile endzhaku ko khongela.”

Bibele ni mitokoto ya vanhu vo tala yi swi veka erivaleni leswaku Xikwembu xa swi yingisa swikhongelo. Kambe swi kona swikhongelo leswi Xikwembu xi nga swi yingisiki. Hikwalaho ka yini Xikwembu xi hlamula swikhongelo swin’wana ivi xi nga swi hlamuli swin’wana?