Hinkwerhu eVandlheni A Hi Pfuneni Swichudeni Swa Bibele Leswaku Swi Khuvuriwa

1-2. I mani loyi a nga pfunaka xichudeni xa Bibele leswaku xi kota ku khuvuriwa?

AMY loyi a tshamaka eFiji, u ri: “A ndzi swi rhandza ngopfu leswi a ndzi swi dyondza eBibeleni. A ndzi swi tiva leswaku leswi ndzi swi dyondzaka i ntiyiso. Kambe lexi ndzi pfuneke leswaku ndzi kota ku khuvuriwa, i ku tihlanganisa ni vamakwerhu.” Eka Amy hi dyondza mhaka leyi ya nkoka: Vamakwerhu hinkwavo evandlheni, va nga swi kota ku pfuna xichudeni leswaku xi khuvuriwa.

² Hinkwerhu hi nga hoxa xandla eku kuriseni ka vandlha. (Efe. 4:16) Leilani loyi a nga phayona naswona a tshamaka eVanuatu u ri: “Ku vuriwa leswaku n’wana a hi wa un’we. Ndzi ehleketa leswaku swi tano ni hi ku endla vadyondzisiwa, i ndzhwalo wa vandlha ku pfuna munhu a amukela ntiyiso.” Vatswari, maxaka, vanghana ni mathicara va hoxa xandla eku kuriseni ka n’wana. Va endla tano hi ku n’wi khutaza ni ku n’wi dyondzisa swilo swa nkoka. Hilaha ku fanaka, hinkwerhu evandlheni hi nga vekela swichudeni swa Bibele xikombiso lexinene ni ku swi khutaza leswaku swi kota ku khuvuriwa.—Swiv. 15:22.

3. U dyondza yini eka leswi vuriweke hi Ana, Dorin na Leilani?

³ Hikwalahokayini makwerhu loyi a nga ni xichudeni xa Bibele a fanele a tsaka loko vamakwerhu van’wana va pfuna xichudeni xakwe? Twana leswi Ana loyi a nga phayona ro hlawuleka eMoldova a swi vulaka, u ri: “Munhu un’we a nge swi koti ku pfuna xichudeni xa Bibele lerova xi kala xi endla nhluvuko.” Dorin loyi na yena a nga phayona ro hlawuleka eMoldova, u ri: “Hakanyingi leswi vamakwerhu va swi vulaka swi pfuna xichudeni hi ndlela leyi a ndzi nga yi langutelanga.” Leilani, u boxa xivangelo xin’wana, u ri: “Ndlela ya rirhandzu leyi xichudeni xi khomiwaka hayona, yi ta xi pfuna xi swi vona leswaku hakunene hi vanhu va Yehovha.”—Yoh. 13:35.

4. Hi ta bula hi yini eka nhlokomhaka leyi?

⁴ U nga tivutisa, ‘Leswi xichudeni lexi xa Bibele xi nga riki xa mina ndzi nga xi pfuna njhani leswaku xi endla nhluvuko?’ A hi buleni hileswi hi nga swi endlaka loko hi fambe ni makwerhu eka xichudeni xakwe ni leswi hi nga swi endlaka loko se xi ta etinhlengeletanweni ta vandlha. Hi ta tlhela hi bula hi ndlela leyi vakulu va nga xi pfunaka hayona xichudeni leswaku xi kota ku khuvuriwa.

LOKO U FAMBE NI MAKWERHU EKA XICHUDENI XAKWE

5. I yini leswi u faneleke u swi endla loko u fambe ni makwerhu eka xichudeni xakwe?

⁵ Mudyondzisi hi yena loyi a nga ni vutihlamuleri byo pfuna xichudeni xakwe leswaku xi twisisa Rito ra Xikwembu. Loko a ku kombela leswaku u famba na yena eka xichudeni xakwe, titeke tanihi mupfuni wakwe. U fanele u n’wi seketela. (Ekl. 4:9, 10) U nga n’wi seketela njhani leswaku dyondzo yi famba kahle?

6. Loko u fambe ni makwerhu eka xichudeni xakwe, u nga ri tirhisa njhani tsalwa ra Swivuriso 20:18?

⁶ Lunghiselela. Sungula hi ku kombela mudyondzisi a ku chumbutela hi xichudeni xakwe. (Hlaya Swivuriso 20:18.) U nga n’wi vutisa leswi: “Xichudeni xa wena i munhu wa njhani? Mi dyondza nhlokomhaka yihi? U lava xi twisisa yini namuntlha? Xana ku na leswi ndzi faneleke ndzi swi vula ni ku swi endla kumbe leswi ndzi nga fanelangiki ndzi swi vula kumbe ku swi endla hi nkarhi wa dyondzo? Ndzi nga xi khutaza njhani? Hambileswi mudyondzisi a nga taka a nga ku byeli timhaka leti nga xihundla ta xichudeni xakwe kambe leswi a nga ta ku byela swona swi ta ku pfuna. Joy loyi a nga murhumiwa u bula hi timhaka to fana ni leti ni vanhu lava a fambaka na vona eka xichudeni xakwe. U ri: “Leswi swi pfuna vanhu lava ndzi fambaka na vona leswaku va tiva ndlela leyi va nga xi pfunaka hayona xichudeni.”

7. Hikwalahokayini hi fanele hi lunghiselela loko hi famba ni makwerhu eka xichudeni xakwe?

⁷ Loko u famba ni makwerhu eka xichudeni xakwe, lunghiselela kahle. (Ezra 7:10) Makwerhu Dorin loyi ku vulavuriweke ha yena eku sunguleni u ri: “Ndza tsaka loko makwerhu loyi ndzi fambaka na yena a lunghiselerile. Sweswo swi ta endla a kota ku xi pfuna kahle xichudeni.” Ku engetela kwalaho, xichudeni xi ta swi vona leswaku havumbirhi bya n’wina mi lunghiselerile naswona xi ta lava ku mi tekelela. Hambiloko u nga kumanga nkarhi lowu eneleke wo lunghiselela kambe ringeta ku kuma mongo wa mhaka leyi mi nga ta dyondza hayona.

8. U nga endla yini leswaku u kota ku fikelela mbilu ya xichudeni loko u khongela hi nkarhi wa dyondzo?

⁸ Leswi mi khongelaka loko mi sungula ni loko mi gimeta dyondzo, ehleketa hi leswi u nga ta swi vula loko u komberiwa ku khongela. Loko u endla tano, xikhongelo xa wena xi ta khumba mbilu ya xichudeni. (Ps. 141:2) Hanae loyi a tshamaka eJapani, a nga swi rivali swikhongelo swa makwerhu wa xisati loyi a a famba ni mudyondzisi wakwe loko va ya dyondza Bibele. U ri: “Ndzi swi xiyile leswaku u rhandza Yehovha, na mina a ndzi lava ku fana na yena. Ndzi tlhele ndzi vona leswaku wa ndzi rhandza hakunene loko ndzi twa a boxa vito ra mina loko a khongela.”

9. Hi ku ya hi Yakobo 1:19, u nga n’wi pfuna njhani makwerhu loko u fambe na yena eka xichudeni xakwe?

⁹ Seketela mudyondzisi hi nkarhi wa dyondzo. Omamuyovbi wa le Nigeria, loyi a nga phayona ro hlawuleka u ri: “Museketeri lonene u rhiya ndleve loko ku dyondziwa. Hambileswi a nga ta pfa a vula swo karhi kambe a nga vulavuli ngopfu, wa swi xiya leswaku i vutihlamuleri bya mudyondzisi ku dyondzisa xichudeni xakwe.” U nga vulavula loko swi te yini naswona i yini leswi u nga swi vulaka? (Swiv. 25:11) Rhiya ndleve loko mudyondzisi ni xichudeni va ri karhi va vulavula. (Hlaya Yakobo 1:19.) Sweswo swi ta ku pfuna u kota ku vula leswi nga pfunaka xichudeni. Kambe u fanele u va ni vuxiyaxiya. Hi xikombiso, u nga vulavuli ngopfu, u nga ngheni mudyondzisi enon’wini naswona u nga sunguli mhaka yin’wana. Kandziyisa mhaka leyi mi yi dyondzaka hi ku vula swo karhi, u tirhisa xikombiso kumbe xivutiso kambe u nga lehisi. Kambe loko u nga ri na xo xi vula, bumabumela xichudeni u tlhela u xi komba leswaku wa xi rhandza. Loko u endla tano, u ta xi pfuna xi endla nhluvuko.

10. Xichudeni xi nga pfuneka njhani loko u xi chumbutela hi vutomi bya wena?

¹⁰ Xi chumbutele hi vutomi bya wena. U nga xi chumbutela ndlela leyi u wu kumeke hayona ntiyiso, ndlela leyi u swi hluleke hayona swiphiqo kumbe ndlela leyi Yehovha a ku pfuneke hayona. (Ps. 78:4, 7) Sweswo swi nga pfuna xichudeni. Swi nga xi tiyisa ni ku xi pfuna xi lava ku khuvuriwa. Swi nga tlhela swi xi pfuna xi kota ku tiyisela ndzingo lowu xi langutaneke na wona. (1 Pet. 5:9) Gabriel loyi a tshamaka eBrazil naswona a nga phayona, u tsundzuka ndlela leyi a pfunekeke hayona loko a dyondzisiwa Bibele. U ri: “Loko ndzi twa hi ta vutomi bya vamakwerhu, ndzi swi xiyile leswaku Yehovha wa swi vona swiphiqo leswi hi langutanaka na swona. Loko va swi kotile ku hlula swiphiqo sweswo, na mina ndzi nga swi kota.”

LOKO XICHUDENI XI TA ETINHLENGELETANWENI TA VANDLHA

11-12. Hikwalahokayini hi fanele hi xi amukela hi mandla mambirhi xichudeni loko xi ta etinhlengeletanweni ta vandlha?

¹¹ Leswaku xichudeni xi kota ku khuvuriwa, xi fanele xi va kona etinhlengeletanweni ta vandlha nkarhi na nkarhi. (Hev. 10:24, 25) Mudyondzisi wa xona u ta xi rhamba leswaku xi ta etinhlengeletanweni ta vandlha. Loko xi ta, hinkwerhu a hi endleni xi tsakela ku va kona nkarhi na nkarhi eHolweni. Hi nga swi endla njhani leswi?

¹² Xi endle xi titwa xi amukelekile. (Rhom. 15:7) Loko xi titwa xi ri ekaya, xi ta tsakela ku va kona etinhlengeletanweni ta vandlha nkarhi na nkarhi. Xi xewete hi ndlela ya rirhandzu u tlhela u xi tivisa eka van’wana. U nga tibyeli leswaku ku na loyi xi fambaka na yena, swi nga endleka mudyondzisi wa xona a letile kumbe a khomekile hi swin’wana eHolweni. Xi yingisele kahle loko xi vulavula, u tlhela u xi komba leswaku xi amukelekile. U ehleketa leswaku loko u xi amukela hi rirhandzu, xi ta titwa njhani? Twana leswi vuriwaka hi Dmitrii, loyi a ha ku khuvuriwaka eka malembe ma nga ri mangani lama hundzeke naswona a nga nandza wa vutirheli. Loko a tsundzuka siku ro sungula leri a yeke eHolweni ha rona, u ri: “A ndzi yime ehandle ka Holo ndzi chuhile, hi loko makwerhu un’wana a fika a ndzi teka a nghena na mina endzeni. Ndzi pfuxeriwe hi vanhu vo tala swinene. Sweswo swi ndzi hlamarisile. A ndzi tsake ngopfu lerova a ndzi navela onge hi ngo tshama hi ri etinhlengeletanweni ta vandlha siku ni siku. Leswi ndzi swi voneke, a ndzi nga si tshama ndzi swi vona!”

13. Ndlela leyi u tikhomaka hayona yi nga xi pfuna njhani xichudeni?

¹³ Tikhome kahle. Ndlela leyi u tikhomaka hayona yi nga endla xichudeni xi swi vona leswaku hakunene xi kume ntiyiso. (Mat. 5:16) Vitalii loyi a nga phayona eMoldova, u ri: “Ndzi tsakisiwe hi matikhomelo ya van’wana evandlheni. Leswi swi endle ndzi swi vona leswaku hakunene Timbhoni ta Yehovha ti gandzela Xikwembu xa ntiyiso.”

14. Xikombiso xa wena lexinene xi nga xi pfuna njhani xichudeni leswaku xi khuvuriwa?

¹⁴ Leswaku xichudeni xi kota ku khuvuriwa, xi fanele xi tirhisa leswi xi swi dyondzaka. Kambe sweswo a swi olovi. Hambiswiritano, loko xi ku vona u hanya hi leswi Bibele yi swi dyondzisaka, xi ta lava ku ku tekelela. (1 Kor. 11:1) Twana leswi endlekeleke Hanae, loyi ku vulavuriweke ha yena eku sunguleni. U ri: “Vamakwerhu a va hanya hi swilo leswi a va ndzi dyondzisa swona. Ndzi dyondze ku rhandza vanhu van’wana, ku va khutaza ni ku va rivalela. Mikarhi hinkwayo a va vulavula kahle hi vanhu van’wana. Na mina a ndzi lava ku fana na vona.”

15. Hi ku ya hi Swivuriso 27:17, hikwalahokayini hi fanele hi endla vunghana ni xichudeni lexi taka etinhlengeletanweni ta vandlha?

¹⁵ Vana munghana wa xichudeni. Loko xichudeni xi ta etinhlengeletanweni ta vandlha, xi tshinelele. (Filp. 2:4) Tinyike nkarhi wo vulavula na xona. Xi bumabumele hileswi xi tikarhatelaka ku tirhisa leswi xi swi dyondzaka, u tlhela u xi rungurisa hi ta vutomi bya xona kambe tivonele leswaku u nga xi vutisi timhaka leti nga ku laviki. Leswi swi ta endla leswaku mi sungula ku va vanghana. Loko u va munghana wa xichudeni, u ta kota ku xi pfuna leswaku xi khuvuriwa. (Hlaya Swivuriso 27:17.) Sweswi hi vulavulaka, Hanae i phayona. Loko a vulavula hi nkarhi lowu a sunguleke ku ya etinhlengeletanweni ta vandlha ha wona, u ri: “Ku va ni vanghana evandlheni, swi endle ndzi nga swi naveli ku lovha etinhlengeletanweni teto, hambiloko ndzi karhele a ndzi ya. A ndzi va rhandza ngopfu vanghana va mina lavantshwa naswona sweswo swi endle ndzi kota ku tshika vanghana va mina va khale lava nga hanyiki hi Matsalwa. Leswi a ndzi lava ku va ni vuxaka lebyinene na Yehovha ni vamakwerhu, ndzi teke xiboho xo khuvuriwa.”

16. I yini swin’wana leswi u nga swi endlaka leswaku u pfuna xichudeni xi titwa xi ri ekaya loko xi ri evandlheni?

¹⁶ Loko xichudeni xi tikarhatela ku va kona evandlheni, xi endle xi titwa xi ri ekaya. U nga endla tano hi ku xi komba malwandla. (Hev. 13:2) Loko Denis loyi a tshamaka eMoldova a tsundzuka nkarhi lowu a ha ri xichudeni xa Bibele, u ri: “Vamakwerhu a va tshamela ku hi rhamba ni nsati wa mina hi ya tihungasa na vona. A va hi byela ndlela leyi Yehovha a va pfuneke hayona. Sweswo swi hi khutazile. Swi hi endle hi lava ku tirhela Yehovha hi timbilu ta hina hinkwato ni ku hi tiyisekisa leswaku hi ta tiphina hi vutomi loko hi endla tano.” Loko xichudeni xa Bibele xi va muhuweleri, famba na xona ensin’wini. Diego loyi a nga muhuweleri eBrazil, u ri: “Vamakwerhu vo tala a va famba na mina ensin’wini. Sweswo swi endle ndzi va tiva kahle. Leswi ndzi swi dyondzeke eka vona, swi endle ndzi va ni vuxaka lebyinene na Yehovha na Yesu.”

VAKULU VA NGA PFUNA NJHANI?

17. Vakulu va nga swi pfuna njhani swichudeni swa Bibele?

¹⁷ Tinyikeni nkarhi wo va ni swichudeni swa Bibele. N’wina vakulu, loko mi khathala hi swichudeni mi ta swi pfuna leswaku swi khuvuriwa. Tinyikeni nkarhi wo vulavula na swona loko swi ta etinhlengeletanweni ta vandlha. Swi ta tsaka ngopfu loko mi swi vitana hi mavito loko swi lava ku hlamula. Tinyikeni nkarhi wo famba ni vamakwerhu loko va ya dyondzisa swichudeni swa vona. Loko mi endla tano, mi ta pfuna swichudeni hi ndlela leyi a mi nga yi langutelanga. Jackie loyi a nga phayona naswona a tshamaka eNigeria, u ri: “Swichudeni swo tala swa hlamala loko swi twa leswaku makwerhu loyi ndzi teke na yena loko ndzi ta swi dyondzisa i nkulu. Xichudeni xin’wana xi te: ‘Mufundhisi wa hina a nge swi endli swo fani ni leswi. U endzela swigwili ntsena leswi nga ta n’wi nyika mali!’” Sweswi xichudeni xexo xi va kona etinhlengeletanweni ta vandlha.

18. Vakulu va nga wu endla njhani ntirho lowu va nyikiweke wona lowu boxiweke eka Mitirho 20:28?

¹⁸ Khutazani vahuweleri mi tlhela mi va letela. Vakulu mi ni vutihlamuleri lebyikulu byo pfuna vahuweleri va va vachumayeri lava nga ni vutshila ni leswaku va va vadyondzisi lavanene. (Hlaya Mitirho 20:28.) Loko makwerhu a ku kombela leswaku u dyondzisa xichudeni xakwe hileswi a chavaka ku xi dyondzisa loko a ri na wena, xi dyondzise. Jackie loyi a boxiweke eku sunguleni, u ri: “Nkarhi ni nkarhi vakulu va ndzi vutisa leswaku swichudeni swa mina swi njhani. Loko ndzi pfa ndzi langutana ni mitlhontlho loko ndzi dyondzisa swichudeni swa mina, va ndzi pfuna.” Vakulu va ta endla matshalatshala yo khutaza ni ku pfuna vamakwerhu leswaku va kota ku tiyisela. (1 Tes. 5:11) Jackie u ri: “Ndza tsaka loko vakulu va ndzi khutaza ni ku vula leswaku va wu tlangela ntirho wa mina. Marito ya vona ma ndzi timula ku fana ni mati yo titimela loko ku hisa. Ndza tsaka loko va ndzi bumabumela naswona swi endla ndzi swi xiya leswaku ntirho lowu ndzi wu endlaka wo dyondzisa vanhu Bibele i wa nkoka.”—Swiv. 25:25.

19. Hi wihi ntsako lowu hinkwerhu hi nga na wona?

¹⁹ Hambiloko sweswi hi nga ri na xona xichudeni xa Bibele kambe hi nga swi kota ku pfuna van’wana va khuvuriwa. Hambileswi ku nga riki hina hi dyondzisaka kambe loko hi lunghiselele kahle hi ta swi kota ku seketela n’wini wa xichudeni hi nkarhi wa dyondzo. A hi veni vanghana va swichudeni loko swi ta eHolweni, hi tlhela hi swi vekela xikombiso lexinene. Vakulu khutazani swichudeni hi ku tinyika nkarhi wo vulavula na swona, mi tlhela mi tiyisa vadyondzisi va swona hi ku va bumabumela ni ku va letela. Mawaku ku tsakisa ka swona, ku tiva leswaku hinkwerhu hi nga hoxa xandla eku pfuneni ka xichudeni leswaku xi rhandza ni ku tirhela Tata wa hina Yehovha!