Rirhandzu Ra Wena A Ri Ye eMahlweni Ri Kula

1. U dyondze yini loko u sungula ku dyondza Bibele?

XANA wa ha tsundzuka loko u sungula ku dyondza Bibele? Swi nga ha va swi ku hlamarisile loko u tiva leswaku Xikwembu xi ni vito. Kumbexana u te hefu, loko u tiva leswaku Xikwembu a xi xanisi vanhu etiheleni. A swi kanakanisi leswaku swi ku tsakisile ku tiva leswaku u ta tlhela u vona maxaka ya wena lama feke ni ku hanya na wona eparadeyisini kwala misaveni.

2. Ku engetela eka ku dyondza ntiyiso wa le Bibeleni, i yini swin’wana leswi u swi antswiseke loko u ri karhi u dyondza? (Vaefesa 5:1, 2)

² Loko u ya emahlweni u ri karhi u dyondza Rito ra Xikwembu, ndlela leyi u rhandzaka Yehovha hayona yi ye yi kula. Rirhandzu rolero ri endle leswaku u tirhisa leswi u swi dyondzaka. U endle swiboho leswinene leswi fambisanaka ni milawu ya Bibele. U cince vumunhu ni mahanyelo ya wena hileswi a wu lava ku tsakisa Xikwembu. Ku fana ni n’wana la tekelelaka mutswari wakwe la nga ni rirhandzu, na wena u tekelele Tata wa wena wa le tilweni.—Hlaya Vaefesa 5:1, 2.

3. Hi swihi swivutiso leswi hi nga tivutisaka swona?

³ Hi nga tivutisa leswi: ‘Xana ndzi rhandza Yehovha swinene sweswi ku tlula eku sunguleni loko ndzi va Mukreste? Ku sukela loko ndzi khuvuriwile, xana ndlela leyi ndzi ehleketaka ni ku endla swilo hayona yi fana ni ya Yehovha ngopfungopfu loko swi ta eka ku rhandza vamakwerhu?’ Loko ku ve “rirhandzu leri a wu ri na rona eku sunguleni” ri horile hi ndlela yo karhi, u nga heli matimba. Vakreste vo sungula na vona va tshame va humeleriwa hi nchumu lowu fanaka. Yesu a nga va helelanga mbilu, na hina a nge hi heleli mbilu. (Nhlav. 2:4, 7) Wa swi tiva leswaku hi nga tlhela hi va ni rirhandzu leri a hi ri na rona loko hi sungula ku dyondza ntiyiso.

4. Hi ta bula hi yini eka nhlokomhaka leyi?

⁴ Eka nhlokomhaka leyi, hi ta bula hi leswi hi nga swi endlaka leswaku hi ya emahlweni hi rhandza Yehovha ni vanhu. Hi ta dyondza hi mikateko yin’wana leyi hina ni van’wana hi nga ta yi kuma loko hi ya emahlweni hi rhandza Yehovha ni vamakwerhu.

YANA EMAHLWENI U RHANDZA YEHOVHA SWINENE

5-6. Hi yihi mitlhontlho leyi muapostola Pawulo a langutaneke na yona loko a ri karhi a chumayela kambe i yini leswi n’wi pfuneke leswaku a ya emahlweni a tirhela Yehovha?

⁵ Muapostola Pawulo u tiphinile hi ku tirhela Yehovha kambe a ku ri ni swihinga swo tala leswi a a fanele a swi hlula. Mikarhi yo tala Pawulo a a fanele a famba mpfhuka wo leha naswona a swi nga olovi ku endla tano emikarhini yoleyo. Eka maendzo wolawo, mikarhi yin’wana Pawulo a a ri “emakhombyeni ya milambu” ni le “makhombyeni ya swigevenga.” Mikarhi yin’wana a a pfa a biwa hi vakaneti. (2 Kor. 11:23-27) Nakambe mikarhi yin’wana, Vakrestekulobye va Pawulo a va nga ma tlangeli matshalatshala yakwe yo va pfuna.—2 Kor. 10:10; Filp. 4:15.

⁶ I yini leswi pfuneke Pawulo leswaku a ya emahlweni a tirhela Yehovha? Pawulo u dyondze swo tala hi vumunhu bya Yehovha eMatsalweni ni le ka leswi n’wi endlekeleke. Yehovha Xikwembu a a rhandza Pawulo naswona Pawulo a a nga swi kanakani sweswo. (Rhom. 8:38, 39; Efe. 2:4, 5) Sweswo swi endle leswaku Pawulo a rhandza Yehovha swinene. Pawulo u kombise leswaku u rhandza Yehovha ‘hi ku tirhela vakwetsimi naswona u ye emahlweni a va tirhela.’—Hev. 6:10.

7. Hi yihi ndlela yin’wana leyi nga hi pfunaka hi ya hi rhandza Yehovha swinene?

⁷ Ndlela leyi hi rhandzaka Xikwembu hayona hi nga kula loko hi tikarhatela ku dyondza Rito ra xona. Loko u ri karhi u hlaya Bibele, ringeta ku xiya leswi mhaka yo karhi yi ku dyondzisaka swona hi Yehovha. Tivutise: ‘Xana mhaka leyi yi swi kombisa njhani leswaku Yehovha wa ndzi rhandza? Hi swihi swivangelo leswi ndzi swi kumaka emhakeni leyi leswi endlaka ndzi ya ndzi rhandza Yehovha?’

8. Xikhongelo xi nga hi pfuna njhani leswaku ndlela leyi hi rhandzaka Xikwembu hayona yi kula?

⁸ Ndlela yin’wana leyi nga hi pfunaka hi rhandza Yehovha swinene i ku va nkarhi ni nkarhi hi n’wi phofulela ta le mbilwini hi xikhongelo. (Ps. 25:4, 5) Kutani Yehovha u ta swi hlamula swikhongelo swa hina. (1 Yoh. 3:21, 22) Khanh, makwerhu waxisati wa le Asia u ri: “Eku sunguleni, a ndzi rhandza Yehovha hileswi ndzi dyondzeke ha yena kambe rirhandzu rero ri ye ri kula loko ndzi vona ndlela leyi a a swi hlamula hayona swikhongelo swa mina. Leswi swi endle leswaku ndzi lava ku endla leswi n’wi tsakisaka.”b

NDLELA LEYI U RHANDZAKA VAN’WANA HAYONA A YI KULE

9. Timotiya u swi kombise njhani leswaku a a antswisa ndlela leyi a a rhandza van’wana hayona?

⁹ Endzhaku ka malembe yo tala Pawulo a ri Mukreste, u hlangane na muntshwa la vuriwaka Timotiya loyi a a ri ni ndhuma leyinene. Timotiya a a rhandza Yehovha ku katsa na vanhu. Pawulo u byele Vafilipiya a ku: “A ndzi na un’wana la fanaka na [Timotiya] loyi a nga ta mi khathalela hi mbilu hinkwayo.” (Filp. 2:20) Eka ndzimana leyi, Pawulo a nga vulavulanga hi vuswikoti bya Timotiya byo hlela swilo kumbe ku va a ri xivulavuri lexinene kambe u tsakisiwe hi ndlela leyi Timotiya a a va rhandza hayona vamakwerhu. Swi le rivaleni leswaku mavandlha lama Timotiya a a ma endzela, a ma swi langutela emahlweni ku tlhela ma endzeriwa hi yena.—1 Kor. 4:17.

10. Xana Anna ni nuna wakwe va swi kombise njhani leswaku va rhandza vamakwavo?

¹⁰ Na hina hi lava tindlela to pfuna vamakwerhu. (Hev. 13:16) Twana ntokoto wa Anna loyi hi buleke ha yena eka nhlokomhaka leyi hundzeke. Endzhaku ka loko ku ve ni xidzedze lexikulu, yena ni nuna wakwe va vhakele ndyangu lowu nga Timbhoni naswona va kume leswaku xidzedze xi onhe lwangu ra yindlu ya vona. Hikwalaho ka xidzedze lexi, ndyangu lowu a wu nga ha ri ni swiambalo leswi baseke. Anna u ri: “Hi teke swiambalo swa vona hi ya swi hlantswa ivi hi va tlherisela swona swi ayiniwile ni ku petsiwa. Eka hina a swi nga vuli nchumu kambe swi endle leswaku hi va vanghana lavakulu ku ta fikela ninamuntlha.” Ndlela leyi Anna ni nuna wakwe va va rhandzaka hayona vamakwerhu yi endle leswaku va va pfuna.—1 Yoh. 3:17, 18.

11. (a) Van’wana va nga ha endla yini loko va vona hi kombisa rirhandzu? (b) Hi ku ya hi Swivuriso 19:17, xana Yehovha u endla yini loko hi kombisa van’wana rirhandzu?

¹¹ Loko hi va ni musa ni ku rhandza vanhu, mikarhi yo tala va swi xiya leswaku hi le ku ringeteni ka ku tekelela ndlela leyi Yehovha a ehleketaka ni ku endla swilo hayona. Va nga ha tlangela ndlela ya musa leyi hi va khomaka hayona hambiloko va nga hi byeli. Khanh loyi se hi buleke ha yena, a nga va rivali lava nga tshama va n’wi pfuna. U ri: “Ndzi va khensa swinene vamakwerhu hinkwavo vaxisati lava a va famba na mina ensin’wini. A va ndzi landza ekaya, va ndzi rhamba eswakudyeni ni ku tlhela va ndzi vuyisa ekaya ndzi hlayisekile. Se ndza swi xiya leswaku ku endla sweswo a ku nga ri matlangwana. A va endla tano hikwalaho ka rirhandzu.” I ntiyiso leswaku a hi vanhu hinkwavo lava nga ta hi khensa loko hi va komba musa. Khanh u vula leswi hi lava nga n’wi pfuna: “Ndzi navela ku va hakela hikwalaho ka musa lowu va ndzi kombiseke wona kambe a ndzi ku tivi lomu va tshamaka kona sweswi. Hambiswiritano, Yehovha wa ku tiva naswona ndzi khongelela leswaku a ndzi hakelela vona.” Khanh u tiyisile. Yehovha u vona hambi ku ri swilo switsongo leswi hi swi endlaka ku kombisa van’wana musa. U swi teka ku ri gandzelo ra risima ni xikweleti lexi a nga ta xi hakela.—Hlaya Swivuriso 19:17.

12. Vamakwerhu vaxinuna va nga swi kombisa njhani leswaku va ri rhandza vandlha? (Nakambe vona swifaniso.)

¹² Loko u ri makwerhu waxinuna, xana u nga swi kombisa njhani leswaku wa va rhandza van’wana ni ku va pfuna? Makwerhu la ha riki muntshwa la vuriwaka Jordan u vutise nkulu leswaku a nga endla yini swin’wana ku pfuna vandlha. Nkulu yoloye u n’wi bumabumerile hi leswi se a koteke ku swi antswisa ni ku tlhela a n’wi nyika swiringanyeto leswi nga n’wi pfunaka ku endla swo tala. Hi xikombiso, u byele Jordan leswaku a hatla a fika eHolweni ya Mfumo leswaku a kota ku xeweta vamakwerhu, a hlamula etidyondzweni, a chumayela nkarhi ni nkarhi ni ntlawa wakwe wa nsimu ni ku lava tindlela to pfuna van’wana. Loko Jordan a tirhise swiringanyeto leswi a nyikiweke swona hi nkulu, u dyondze ku va ni vutshila ni ku tlhela a ya a va rhandza swinene vamakwerhu. Jordan u dyondze leswaku loko makwerhu a va nandza wa vutirheli, a hi kona a sungulaka ku pfuna van’wana kambe u ya emahlweni a va pfuna.—1 Tim. 3:8-10, 13.

13. Rirhandzu ri n’wi pfune njhani makwerhu loyi a vuriwaka Christian leswaku a tlhela a fanelekela ku va nkulu?

¹³ Ku vuriwa yini loko u tshame u va nandza wa vutirheli kumbe nkulu? Yehovha a nga yi rivali mitirho leyi u tshameke u yi endla hikwalaho ka rirhandzu. (1 Kor. 15:58) Nakambe wa ri vona rirhandzu leri u yaka emahlweni u ri kombisa. Makwerhu la vuriwaka Christian u twe ku vava loko a nga ha vi nkulu. Kambe u ri: “Ndzi tibyele leswaku ndzi ta endla hinkwaswo leswi ndzi nga swi kotaka leswaku ndzi tirhela Yehovha hikwalaho ka leswi ndzi n’wi rhandzaka hambi ndzi nkulu kumbe e-e.” Hi ku famba ka nkarhi u tlhele a hlawuriwa ku va nkulu. Christian u ri: “A swi ndzi chuhisa ku tlhela ndzi va nkulu. Kambe ndzi tibyele leswaku loko Yehovha hikwalaho ka musa wakwe a ndzi pfumelela leswaku ndzi tlhela ndzi va nkulu, ndzi ta hetisisa vutihlamuleri bya mina hikwalaho ka leswi ndzi rhandzaka yena ni vamakwerhu.”

14. U dyondza yini eka leswi vuriweke hi makwerhu waxisati wa le Georgia?

¹⁴ Malandza ya Yehovha ma tlhela ma rhandza ni vanhu lava nga n’wi gandzeriki. (Mat. 22:37-39) Hi xikombiso, makwerhu waxisati Elena wa le Georgia u ri: “Xivangelo xin’we lexi a xi ndzi endla ndzi chumayela hileswi a ndzi rhandza Yehovha. Kambe loko ndzi ya ndzi rhandza Tata wa mina wa le tilweni, ndzi ye ndzi rhandza ni vanhu. Ndzi ringete ku ehleketa hi swiphiqo leswi vanhu va nga na swona ni mabulo lama nga va khumbaka timbilu. Loko ndzi ya ndzi ehleketa hi vona hi ndlela leyi, ndzi ye ndzi lava ku va pfuna.”—Rhom. 10:13-15.

MIKATEKO LEYI HI YI KUMAKA LOKO HI RHANDZA VAN’WANA

15-16. Hi yihi mikateko leyi hi yi kumaka loko hi rhandza vanhu hilaha swi kombisiweke hakona eka swifaniso?

¹⁵ Loko hi komba vamakwerhu rirhandzu, a hi vona ntsena va vuyeriwaka. Endzhaku ka loko ntungu wa COVID-19 wu sungurile, makwerhu Paolo ni nsati wakwe va pfune vamakwerhu vo tala vaxisati lava dyuhaleke leswaku va kota ku chumayela hi ku tirhisa tifoni, ti-tablet kumbe tikhompyuta ta vona. Makwerhu un’wana waxisati loyi eku sunguleni a swi n’wi tikela ku tirhisa xitirhisiwa xakwe u hetelele a swi kotile. U kote ku xi tirhisa leswaku a rhamba maxaka yakwe eXitsundzuxweni. Maxaka yakwe ya 60 ma kote ku va kona hi ku tirhisa endlelo ra vhidiyo! Makwerhu waxisati swin’we ni maxaka yakwe hinkwawo va vuyeriwile hikwalaho ko pfuniwa hi Paolo ni nsati wakwe. Hi ku famba ka nkarhi, makwerhu waxisati u tsalele Paolo a ku: “Ha khensa leswi mi dyondzisaka hina vadyuhari. A ndzi nge pfuki ndzi yi rivarile ndlela leyi Yehovha a hi khathalelaka hayona ni matshalatshala ya n’wina mi nga heli mbilu.”

¹⁶ Mitokoto yo fana ni leyi yi dyondzise Paolo dyondzo ya nkoka swinene. U dyondze leswaku ku kombisa rirhandzu i swa nkoka swinene ku tlula ku va ni vutivi kumbe vuswikoti. U ri: “Ndzi tshame ndzi va mulanguteri wa muganga. Namuntlha ndza swi xiya leswaku hambileswi vahuweleri swi nga endlekaka va yi rivele mivulavulo ya mina, a va wu rivali mpfuno lowu ndzi nga tshama ndzi va nyika wona.”

17. I vamani van’wana lava nga ta vuyeriwa loko hi kombisa rirhandzu?

¹⁷ Loko hi kombisa van’wana leswaku ha va rhandza na hina ha vuyeriwa hi tindlela leti hi nga ti ehleketiki. Jonathan wa le New Zealand u swi tokotile leswi. Hi Mugqivela wun’wana nindzhenga laha dyambu a ri hisa swinene, u vone phayona ri ri karhi ri chumayela exitarateni. Jonathan u endle xiboho xo hamba a tirha ni phayona leri hi Mugqivela nindzhenga. Loko hi nkarhi wolowo a endla leswi, a a nga ehleketi leswaku na yena a swi ta n’wi vuyerisa. Jonathan u ri: “Hi nkarhi wolowo a ndzi nga yi rhandzi nsimu. Kambe loko ndzi ri karhi ndzi yingisela ndlela leyi phayona leri a ri chumayela hayona ni ku vona ndlela leyi a ri humelela hayona entirhweni lowu, sweswo swi endle leswaku na mina ndzi sungula ku wu rhandza ntirho lowu. Ndzi tlhele ndzi kuma munghana loyi a ndzi pfuneke leswaku ndzi ya ndzi antswisa ndlela leyi ndzi n’wi gandzelaka hayona Yehovha, ndzi rhandza nsimu ni ku tshinela eka Yehovha.”

18. Yehovha u lava leswaku hi endla yini?

¹⁸ Yehovha u lava leswaku hi ya hi rhandza yena ni vanhu swinene. Hilaha hi dyondzeke hakona, hi nga ya hi rhandza Yehovha hi ku hlaya Rito rakwe ni ku anakanyisisa ha rona ni ku khongela eka yena nkarhi ni nkarhi. Loko hi pfuna vamakwerhu, hi ta ya hi va rhandza swinene. Loko rirhandzu ra hina ri ya ri kula, hi ta ya hi tshinela swinene eka Yehovha ni le ka vamakwerhu naswona hi ta va vanghana hilaha ku nga heriki!