Leswinene Ni Leswi Hoxeke: Leswi U Faneleke U Swi Hlawula
Milawu ya mahanyelo leyi u hlawulaka ku hanya hayona yi ta khumba leswi vutomi bya wena byi nga ta va xiswona. Yehovha Xikwembu wa swi tiva sweswo. Leswi hi swona swi endlaka a lava hi hanya hi milawu yakwe.
Yehovha u lava leswaku hi va ni vutomi byo rhula ni lebyi tsakisaka.
“Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku kongomisaka endleleni leyi u faneleke u famba hi yona. Loko wo yingisa swileriso swa mina! Ku rhula ka wena ku ta fana ni nambu ni ku lulama ka wena ku ta fana ni magandlati ya lwandle.”—Esaya 48:17, 18.
Leswi Xikwembu xi nga Muvumbi wa hina xa yi tiva ndlela leyinene leyi hi faneleke hi hanya hayona. Xi lava leswaku hi landzela nkongomiso wa xona hikuva wu ta hi vuyerisa. Loko hi landzelela nkongomiso wa Xikwembu hi nga tiyiseka leswaku swiboho leswi hi swi tekaka swi ta va leswinene. Mikarhi hinkwayo hi ta endla swiboho leswinene leswi nga ta hi tisela ku rhula ni ntsako.
Yehovha a nga lavi leswaku hi endla leswi hi nga tsandzekaka ku swi endla.
“Xileriso lexi ndzi ku lerisaka xona namuntlha a xi tiki naswona a xi le kule na wena.”—Deteronoma 30:11.
Ku hanya hi milawu ya Xikwembu swi nga lava hi cinca ndlela leyi hi ehleketaka kumbe ku endla swilo hayona. Hambiswiritano, Yehovha a nga lavi swo tala eka hina. Leswi a nga Muvumbi wa hina, wa swi tiva leswi hi kotaka ku swi endla. Loko hi ya hi tiva Yehovha, hi ta swi vona leswaku ‘swileriso swa yena a swi tiki.’—1 Yohane 5:3.
Yehovha u tshembisa ku pfuna lava hlawulaka ku hanya hi milawu yakwe.
“Mina, Yehovha Xikwembu xa wena, ndzi khoma voko ra wena ra xinene, Loyi a ku byelaka a ku, ‘U nga chavi. Ndzi ta ku pfuna.’”—Esaya 41:13.
Hi nga swi kota ku hanya hi milawu ya Yehovha hikuva u ta hi pfuna. U ta hi pfuna hi ku tirhisa Rito rakwe ku nga Bibele leri hi pfunaka ni ku hi nyika ntshembo.
Vanhu va timiliyoni emisaveni hinkwayo va kume leswaku ku hanya hi milawu ya Bibele swi antswise vutomi bya vona. Dyondza leswi engetelekeke hi switsundzuxo leswinene leswi u nga swi kumaka eBibeleni. U nga sungula hi ku kambisisa Broxara leyi sekeriweke eBibeleni leyi nge, Tiphine Hi Vutomi Hilaha Ku Nga Heriki! leyi kumekaka mahala eka jw.org. Yi ni tidyondzo leti landzelaka:
Yi Nga Ku Pfuna Njhani Bibele?
Bibele Yi Hi Nyika Ntshembo
Xana U Nga Yi Tshemba Bibele?
Loko u ri karhi u kambisisa Rito ra Xikwembu ku nga Bibele u ta swi xiya leswaku a yi hundzeriwanga hi nkarhi, yi ‘tshama yi tshembekile sweswi ni hilaha ku nga heriki.’ (Pisalema 111:8) Ku landzela milawu ya mahanyelo leyi nga eBibeleni i ndlela yo antswa leyi hi nga hanyaka hayona. Hambiswiritano, Xikwembu a xi nge hi sindzisi leswaku hi endla tano. (Deteronoma 30:19, 20; Yoxuwa 24:15) Hinkwerhu hi fanele hi tihlawulela.