Ndlela Leyi Vanhu A Va Rivaleriwa Hayona Loko Ku Nga Si Va Na Nkutsulo

Hi kota ku rivaleriwa swidyoho hikwalaho ka gandzelo ra nkutsulo leri Yesu a ri hakeleke hi ngati yakwe. (Efe. 1:7) Loko Bibele yi vulavula hi Yesu a nga si kutsula vanhu hi vutomi byakwe, yi ri: “Hi ku lehisa mbilu ka [Xikwembu] xi rivalele swidyoho leswi endliweke enkarhini lowu hundzeke.” (Rhom. 3:25) Xana Yehovha a a va rivalela njhani vanhu swidyoho swa vona ku nga si va ni nkutsulo handle ko va a tlula milawu yakwe?

Hi ku ya hi langutelo ra Yehovha, a swi fana niloko nkutsulo wu humesiwile endzhaku ko endla xiboho xo nyikela hi “n’wana” loyi a a ta ponisa vanhu lava nga ni ripfumelo. (Gen. 3:15; 22:18) Xikwembu a xi tiyiseka leswaku hi nkarhi lowu xi wu vekeke, N’wana wa xona loyi a tswariweke a ri swakwe a a ta nyikela hi vutomi byakwe hi ku swi rhandza leswaku byi va nkutsulo. (Gal. 4:4; Hev. 10:​7-10) Loko Yesu a ha ri laha misaveni, Yehovha u n’wi nyike matimba yo rivalela vanhu swidyoho swa vona hambiloko a nga si nyikela hi vutomi byakwe leswaku a kutsula vanhu. Yesu u kote ku rivalela vanhu lava a va ri ni ripfumelo swidyoho hikuva a a swi tiva leswaku gandzelo rakwe a ri ta kota ku swi funengeta.—Mat. 9:​2-6.