Tekelela Ndlela leyi Yehovha Na Yesu Va Ehleketaka Hayona

1-2. Xana swi katsa yini ku rhandza Yehovha naswona Yesu u swi endle njhani sweswo?

“U FANELE u rhandza Yehovha Xikwembu xa wena hi mbilu ya wena hinkwayo, hi vutomi bya wena hinkwabyo, hi matimba ya wena hinkwawo ni hi mianakanyo ya wena hinkwayo.” (Luka 10:27) Yesu u vule leswaku lexi hi xona xileriso xa nkoka swinene eka Nawu wa Muxe. Xiya leswaku ndlela leyi hi rhandzaka Yehovha hayona yi katsa leswi nga etimbilwini ta hina, ku nga ku navela ka hina ni ndlela leyi hi titwaka hayona. Yi tlhela yi katsa ku tinyiketela ni matimba ya hina. Hambiswiritano, ku rhandza Yehovha swi tlhela swi katsa mianakanyo ya hina, ku nga ndlela leyi hi langutaka swilo hayona. I ntiyiso leswaku a hi nge pfuki hi yi twisise hi ku helela ndlela leyi Yehovha a ehleketaka hayona. Kambe loko hi dyondza ku “anakanya ku fana na Kreste” hi ta yi twisisa kahle ndlela leyi Xikwembu xi ehleketaka hayona hikuva Yesu u yi tekelele hi ku helela ndlela leyi Tata wakwe a ehleketaka hayona.—1 Kor. 2:16.

² Yesu a a rhandza Yehovha hi mianakanyo yakwe hinkwayo. A a swi tiva leswaku Xikwembu a xi lava a endla yini naswona a a tiyimisele ku endla ku rhandza ka xona hambileswi ku endla tano a swi vula leswaku a a ta xaniseka hikwalaho ka leswi lulameke. Leswi a a tiyimisele ku endla ku rhandza ka Tata wakwe, Yesu a nga pfumelelanga nchumu xi n’wi sivela ku endla tano.

3. Muapostola Petro u dyondze yini eka Yesu naswona Petro u khutaze Vakrestekulobye leswaku va endla yini? (1 Petro 4:1)

³ Petro ni vaapostola lavan’wana va ve ni nkateko wo va na Yesu ni ku twisisa ndlela leyi a a ehleketa hayona. Loko Petro a tsale papila rakwe ro sungula leri huhuteriweke, u khutaze Vakreste leswaku va hloma hi mianakanyo leyi fanaka ni ya Kreste. (Hlaya 1 Petro 4:1.) Petro u tirhise xiga xa le vusocheni loko a tsala a ku: “Hlomani.” Kutani loko Vakreste va dyondza ku anakanya ku fana na Yesu, va ta kota ku lwisana ni ku navela ku endla leswo biha ku katsa ni misava leyi fumiwaka hi Sathana.—2 Kor. 10:​3-5; Efe. 6:12.

4. Hi ta dyondza yini eka nhlokomhaka leyi?

⁴ Hi ta dyondza ndlela leyi Yesu a a anakanya hayona kutani hi vona leswaku hi nga n’wi tekelela njhani. Hi ta tlhela hi dyondza ku (1) tekelelaka ndlela leyi Yehovha a ehleketaka hayona ku nga leswi nga ta hi pfuna hi va ni mianakanyo leyi fanaka, (2) hi titsongahata ni (3) ku va ni miehleketo yo hluteka hi ku titshega hi Yehovha hi xikhongelo.

TEKELELA NDLELA LEYI YEHOVHA A EHLEKETAKA HAYONA

5. Hi le ka xiyimo xihi laha Petro a tsandzekeke ku anakanya ku fana na Yehovha?

⁵ Ku ve ni nkarhi lowu Petro a nga yi tekelelangiki ndlela leyi Yehovha a ehleketaka hayona eka timhaka to karhi. Yesu u byele vaapostola vakwe leswaku a a ta ya eYerusalema, a nyiketiwa eka varhangeri va vukhongeri, a xanisiwa ni ku tlhela a dlayiwa. (Mat. 16:21) Swi nga endleka Petro a a nga swi twisisi leswaku hikwalahokayini Yehovha a a ta swi pfumelela leswaku Yesu loyi Vaisrayele a va tshembele eka yena, tlhelo Mesiya la tshembisiweke a dlayiwa. (Mat. 16:16) Hikwalaho Petro u kokele Yesu etlhelo kutani a ku: “Titsetselele, Hosi; khombo leri ri nga ka ri nga ku weli nikatsongo.” (Mat. 16:22) Petro a a nga pfumelelani na yena Yesu emhakeni leyi hikuva a a nga ehleketi ku fana na Yehovha.

6. Xana Yesu u swi kombise njhani leswaku a a anakanya ku fana na Yehovha?

⁶ Yesu a a anakanya ku fana ni Tata wakwe wa le tilweni. Yesu u byele Petro a ku: “Yana endzhaku ka mina Sathana! U xikhunguvanyiso eka mina, hikuva u ehleketa ku fana ni vanhu ku nga ri Xikwembu.” (Mat. 16:23) Swi nga endleka Petro a lemukise Yesu hi xikongomelo lexinene kambe Yesu u xi bakanyile xilemukiso xexo. Hi dyondza swo karhi emhakeni leyi. Yehovha a a nga swi lavi leswaku Yesu a titsetselela. Leswi swi dyondzise Petro ndlela leyi swi nga swa nkoka hayona ku anakanya ku fana ni Xikwembu.

7. Petro u swi kombise njhani leswaku a a lava ku cinca ndlela leyi a ehleketa hayona yi fana ni ndlela leyi Yehovha a ehleketaka hayona? (Vona xifaniso.)

⁷ Eku heteleleni Petro u kombise leswaku a a swi lava ku dyondza ku anakanya ku fana na Yehovha. Se a ku ri nkarhi wa leswaku vanhu lava nga riki Vayuda lava a va nga yimbanga va va xiphemu xa vanhu va Xikwembu. Petro a a nyikiwe xiavelo xo chumayela Korneliyo loyi a a nga ri Muyuda, loyi a ta va un’wana wa vanhu vo sungula eka ntlawa lowu wa vagandzeri. Leswi Vayuda a va nga tirhisani ni vanhu lava nga riki Vayuda, a swi hlamarisi leswi Petro a a fanele a pfuniwa leswaku a kota ku endla xiavelo xakwe. Loko Petro a twisise ku rhandza ka Xikwembu hi mhaka leyi, u cince langutelo rakwe. Hikwalaho ka sweswo a nga “kanakananga” loko a rhumiwa. (Mit. 10:​28, 29) U chumayele Korneliyo ni ndyangu wakwe kutani va khuvuriwa.—Mit. 10:​21-23, 34, 35, 44-48.

8. Hi nga swi kombisa njhani leswaku hi ehleketa ku fana na Yehovha? (1 Petro 3:8)

⁸ Endzhaku ka malembe, Petro u khutaze Vakrestekulobye ku va ni “mianakanyo leyi fanaka.” (Hlaya 1 Petro 3:8.) Tanihi vanhu va Yehovha, hi nga va ni mianakanyo leyi fanaka loko hi tekelela ndlela leyi Yehovha a anakanyaka hayona hilaha swi boxiweke hakona eRitweni rakwe. Hi xikombiso, Yesu u khutaze valandzeri vakwe leswaku va rhangisa Mfumo evuton’wini bya vona. (Mat. 6:33) Hikwalaho, makwerhu wo karhi evandlheni ra n’wina a nga ha hlawula ku nghenela ntirho wa nkarhi hinkwawo hileswi a lavaka ku rhangisa Mfumo. Ematshan’weni yo n’wi byela leswaku a titsetselela, hi fanele hi n’wi khutaza hikwalaho ka xiboho lexi a xi tekeke hi tlhela hi n’wi seketela.

TITSONGAHATE

9-10. Yesu u swi kombise njhani leswaku wa titsongahata swinene?

⁹ Hi vusiku byo hetelela a nga si dlayiwa, Yesu u dyondzise Petro ni vaapostola lavan’wana dyondzo ya nkoka loko swi ta emhakeni yo titsongahata. Yesu u rhume Petro na Yohane ku ya lunghiselela swakudya leswi a a ta dya na vona ro hetelela a nga si fa. Swin’wana swa swilo leswi a va fanele va tiyiseka leswaku swi kona, i xo hlambela eka xona ni mathawula leswaku vaendzi va ta kota ku hlambisiwa milenge va nga si dya. Kambe i mani loyi a a ta titsongahata a hlambisa van’wana milenge loko nkarhi wu fika?

¹⁰ Handle ko kanakana, Yesu u endle ntirho wolowo wa xiyimo xa le hansi leswi kombiseke leswaku wa titsongahata swinene. U endle ntirho lowu hi ntolovelo a wu endliwa hi nandza naswona sweswo swi va hlamarise ngopfu vaapostola vakwe. Yesu u hluvule xiambalo xakwe xa le handle, a boha thawula emasengeni, a chela mati exibyeni kutani a sungula ku va hlambisa milenge. (Yoh. 13:​4, 5) Swi nga va swi teke nkarhi ku hlambisa milenge ya vaapostola hinkwavo va 12 ku katsa na Yudasi loyi a a ta n’wi xavisa. Hambiswiritano, Yesu u wu endlile ntirho wolowo. Hiloko Yesu a va byela a ku: “Xana ma swi twisisa leswaku hikwalaho ka yini ndzi mi hlambise milenge? Mi ndzi vitana ‘Mudyondzisi’ ni ‘Hosi’ naswona mi tiyisile hikuva ndzi yena. Hikwalaho, loko mina hambileswi ndzi nga Hosi ni Mudyondzisi ndzi mi hlambise milenge, na n’wina mi fanele mi hlambisana milenge.”—Yoh. 13:​12-14.

11. Petro u swi kombise njhani leswaku u dyondze ku titsongahata? (1 Petro 5:5) (Nakambe vona xifaniso.)

¹¹ Petro u dyondze ku titsongahata eka Yesu. Endzhaku ka loko Yesu a tlhelele etilweni, Petro u endle singita ro horisa wanuna loyi a tswariweke a lamarile. (Mit. 1:​8, 9; 3:​2, 6-8) A swi kanakanisi leswaku singita leri ri hlamarise vanhu vo tala. (Mit. 3:11) Xana Petro a a ta titlhoma tinsiva tanihi leswi a a huma eka ndhavuko lowu vanhu va kona va khathalaka ngopfu hi swikhundlha ni ku dzunisiwa? Doo! Ematshan’weni ya ku va a pfumela loko a dzunisiwa, hi ku titsongahata Petro u yise ku dzuneka eka Yehovha na Yesu hi ku vula a ku: “U hanyisiwe hi vito ra Yesu ni hikwalaho ka ripfumelo ra hina eka vito rakwe.” (Mit. 3:​12-16) Marito lama Petro a ma tirhiseke loko a tsalela Vakreste papila mayelana ni ku titsongahata, ma hi tsundzuxa ndlela leyi Yesu a boheke thawula emasengeni yakwe kutani a hlambisa vaapostola vakwe milenge hayona.—Hlaya 1 Petro 5:5.

12. Ku fana na Petro, hi nga swi kombisa njhani leswaku ha titsongahata?

¹² Hi nga tekelela xikombiso xa Petro hi ku va hi titsongahata. Tsundzuka leswaku munhu a nga swi kombisi hi marito ntsena leswaku wa titsongahata. Rito leri Petro a ri tirhiseke loko a hlamusela ku titsongahata ri kombisa leswaku ku titsongahata swi katsa ndlela leyi hi titekaka hayona ni ndlela leyi hi tekaka van’wana hayona. Hi endlela van’wana swilo leswinene ku nga ri hileswi hi lavaka ku tekeriwa enhlokweni kambe hileswi hi rhandzaka Yehovha ni vanhu. Hi kombisa leswaku ha titsongahata loko hi tirhela Yehovha ni vamakwerhu hi tsakile hilaha hi nga kotaka hakona, swi nga ri na mhaka leswaku vanhu va swi vona kumbe doo!—Mat. 6:​1-4.

VANANI NI “MIEHLEKETO YO HLUTEKA”

13. Hlamusela leswi katsaka swona ku va ni “miehleketo yo hluteka.”

¹³ Swi katsa yini ku va ni “miehleketo yo hluteka”? (1 Pet. 4:7) Mukreste loyi a nga ni miehleketo yo hluteka u tikarhatela ku endla swiboho leswinene, leswi kombisaka leswaku u anakanya ku fana na Yehovha. Mukreste wo tano wa swi tiva leswaku a wu kona nchumu lowu nga wa nkoka ngopfu evuton’wini ku tlula vuxaka byakwe na Yehovha. A nga titeki a tlakukile eka van’wana hikuva wa swi tiva leswaku swi kona leswi a nga swi tiveki. Nakambe u kombisa leswaku u titshega hi Xikwembu hi ku va nkarhi ni nkarhi a khongela eka xona.a

14. Hi le ka xiendlakalo xihi laha Petro a tsandzekeke ku titshega hi Yehovha?

¹⁴ Hi vusiku byo hetelela Yesu a nga si dlayiwa, u lemukise vadyondzisiwa vakwe a ku: “Hinkwenu ka n’wina mi ta khunguvanyeka hikwalaho ka mina vusiku bya namuntlha.” Hi ku titshemba, Petro u hlamule a ku: “Hambiloko hinkwavo vo khunguvanyeka hikwalaho ka wena, mina a ndzi nge pfuki ndzi khunguvanyekile!” Hi vusiku byebyo, Yesu u tsundzuxe vadyondzisiwa vakwe a ku: “Tshamani mi rindzile mi ya emahlweni mi khongela.” (Mat. 26:​31, 33, 41) Loko Petro a a lo yingisa xitsundzuxo xexo, a a ta va a nga n’wi landzulanga Yesu. Ku ri na sweswo, Petro u landzule N’wini wakwe naswona u tisorile swinene.—Mat. 26:​69-75.

15. Yesu u swi kombise njhani leswaku u ni miehleketo yo hluteka hi vusiku byo hetelela a nga si dlayiwa?

¹⁵ Yesu u titshege hi Yehovha hilaha ku heleleke. Hambileswi Yesu a a nga ri na xidyoho, u khongele hi ku phindhaphindha naswona sweswo swi n’wi pfunile leswaku a va ni xivindzi xo endla leswi Yehovha a a lava leswaku a swi endla. (Mat. 26:​39, 42, 44; Yoh. 18:​4, 5) A swi kanakanisi leswaku ku va Petro a vone Yesu a titshega hi xikhongelo, sweswo swi endle leswaku na yena a endla hilaha ku fanaka.

16. Petro u swi kombise njhani leswaku se a a ri ni miehleketo yo hluteka? (1 Petro 4:7)

¹⁶ Hi ku famba ka nkarhi, Petro u titshege hi Yehovha hi xikhongelo. Endzhaku ka loko Yesu a pfuxiwile, u tiyisekise Petro ni vaapostola lavan’wana leswaku a va ta kuma moya wo kwetsima leswaku va kota ku endla ntirho wo chumayela. Hambiswiritano, Yesu u va byele leswaku va rindza eYerusalema kukondza sweswo swi endleka. (Luka 24:49; Mit. 1:​4, 5) Xana Petro u endle yini loko a ha rindzile? Yena ni Vakreste lavan’wana “a va phikelela exikhongelweni.” (Mit. 1:​13, 14) Hi ku famba ka nkarhi, loko Petro a tsala papila rakwe ro sungula u khutaze Vakrestekulobye leswaku va va ni miehleketo leyi hlutekeke ni ku khongela eka Yehovha. (Hlaya 1 Petro 4:7.) Petro u dyondze ku titshega hi Yehovha naswona u ve phuphu ya vandlha.—Gal. 2:9.

17. Xana hi fanele hi endla yini swi nga ri na mhaka vuswikoti lebyi hi nga na byona? (Nakambe vona xifaniso.)

¹⁷ Leswaku hi va ni miehleketo yo hluteka, nkarhi ni nkarhi hi fanele hi khongela eka Yehovha. Ha swi xiya leswaku hi fanele hi ya emahlweni hi khongela eka Yehovha swi nga ri na mhaka leswaku hi ni vuswikoti bya njhani. Hikwalaho, loko hi fanele hi endla swiboho swa nkoka, hi khongela eka Yehovha leswaku a hi kongomisa hi ri karhi hi tshemba leswaku wa swi tiva leswi hi faneleke.

18. Hi nga yi tekelela njhani ndlela leyi Yehovha a ehleketaka hayona?

¹⁸ Ha swi tlangela leswi Yehovha a hi vumbeke hi ri ni vuswikoti byo tekelela vumunhu byakwe. (Gen. 1:26) I ntiyiso leswaku a hi nge swi koti ku tekelela Yehovha kwatsaa! (Esa. 55:9) Ku fana na Petro, hi nga dyondza ku ehleketa hi ndlela leyi Yehovha a ehleketaka hayona. A hi yeni emahlweni hi tekelela ndlela leyi Xikwembu xi ehleketaka hayona, hi titsongahata ni ku va ni miehleketo yo hluteka.