NHLOKOMHAKA LEYI DYONDZIWAKA YA VU 26
RISIMU 123 Ku Titsongahatela Nkongomiso Wa Xikwembu
Hi Ku Titsongahata, Amukela Leswi U Nga Swi Tiviki
“A hi nge pfuki hi twisise Lowa Matimba Hinkwawo.”—YOBO 37:23.
LESWI HI NGA TA SWI DYONDZA
Hambiloko hi nga tivi swilo hinkwaswo leswi nga ta endleka enkarhini lowu taka, hi nga swi kota ku tiyisela mitlhontlho loko hi dzikisa mianakanyo eka leswi hi swi tivaka hi tlhela hi tshemba Yehovha.
1. Xana Yehovha u hi nyike vuswikoti byo endla yini naswona hikwalahokayini?
HIKWALAHOKAYINI Yehovha a hi vumbe hi ri ni vuswikoti byo ehleketa, byo dyondza, byo twisisa ni byo tirhisa leswi hi swi dyondzaka? Hikuva u lava leswaku ‘hi va ni vutivi hi yena’ ni ku endla swiboho swa vutlhari loko hi ri karhi hi n’wi tirhela.—Swiv. 2:1-5; Rhom. 12:1.
2. (a) Hi swihi leswi hi faneleke hi swi tiva hi hina vini? (Yobo 37:23, 24) (Nakambe vona xifaniso.) (b) Hi vuyeriwa njhani loko hi twisisa leswaku a swi bohi ku tiva swilo hinkwaswo?
2 Hambileswi hi nga ni vuswikoti byo dyondza, ka ha ri ni swo tala leswi hi nga swi tiviki. (Hlaya Yobo 37:23, 24.) Ehleketa hi Yobo. Yehovha u vutise Yobo swivutiso swo tala leswi pfuneke Yobo a vona leswaku a a nga tivi swilo hinkwaswo. Bulo leri a veke na rona na Yehovha ri n’wi pfune leswaku a titsongahata ni ku cinca ndlela leyi a a ehleketa hayona. (Yobo 42:3-6) Na hina hi ta va hi endla kahle loko hi titsongahata ni ku pfumela leswaku a hi tivi swilo hinkwaswo. Loko hi endla tano, swi ta hi pfuna hi tshemba leswaku Yehovha u ta hi tivisa leswi hi faneleke hi swi tiva leswaku hi endla swiboho swa vutlhari.—Swiv. 2:6.
Ku pfumela leswaku a hi tivi swilo hinkwaswo swi ta hi pfuna hilaha swi pfuneke Yobo hakona (Vona ndzimana 2)
3. Hi ta bula hi yini eka nhlokomhaka leyi?
3 Eka nhlokomhaka leyi, hi ta kambisisa swilo swin’wana leswi hi nga swi tiviki ni mitlhontlho leyi hi nga langutanaka na yona hikwalaho ka sweswo. Hi ta tlhela hi kambisisa leswaku hikwalahokayini swi ri swinene ku va hi nga tivi swilo hinkwaswo. Ku kambisisa tinhla leti swi ta hi pfuna hi tshemba leswaku Yehovha u ta hi byela leswi hi faneleke hi swi tiva tanihi leswi ku nga yena “Loyi a nga ni vutivi lebyi heleleke.”—Yobo 37:16.
A HI SWI TIVI LESWAKU MAKUMU MA TA FIKA RINI
4. Hi ku ya hi Matewu 24:36, i yini leswi hi nga swi tiviki?
4 Hlaya Matewu 24:36. A hi swi tivi leswaku makumu ya misava leyi ma ta fika rini. Hambi ku ri Yesu, loko a ha ri laha misaveni a nga ri tivi “siku ra kona ni nkarhi.”a Kambe endzhakunyana u byele vaapostola leswaku Yehovha loyi a nga Muhlayisi Lonkulu wa Nkarhi hi yena a nga ni mfanelo yo hlawula leswaku swiendlakalo swin’wana swi ta endleka rini. (Mit. 1:6, 7) Yehovha u veke siku leri makumu ma nga ta fika ha rona kambe hina a hi nge pfuki hi ri tivile.
5. Hi nga titwa njhani hileswi hi nga tiviki leswaku makumu ma ta fika rini?
5 Hi ku ya hi leswi Yesu a swi vuleke, a hi swi tivi leswaku hi ta rindzela makumu nkarhi wo tanihi kwihi. Hikwalaho ka sweswo, hi nga ha hela matimba ngopfungopfu loko ku ve se i khale hi rindzele siku ra Yehovha. Nakambe swi nga hi tikela ku tiyisela ku hlekuriwa hi swirho swa ndyangu kumbe vanhu van’wana lava nga riki Timbhoni loko ha ha rindzele siku rero. (2 Pet. 3:3, 4) Swa olova ku tibyela leswaku loko a hi tiva siku leri makumu ma nga ta fika ha rona, a hi ta lehisa mbilu ni ku tiyisela ku hlekuriwa.
6. Hikwalahokayini swi ri swinene leswi hi nga swi tiviki leswaku makumu ma ta fika rini?
6 Leswi Yehovha a nga hi byelangiki siku leri makumu ma nga ta fika ha rona, u hi nyika nkarhi wo kombisa leswaku hi n’wi tirhela hileswi hi n’wi rhandzaka ni ku n’wi tshemba. Hi lava ku tirhela Yehovha hilaha ku nga heriki ku nga ri ku fikela loko makumu ma fika. Ematshan’weni yo ehleketa hileswaku “siku ra Yehovha” ri ta fika rini, hi ta va hi endla kahle loko hi ehleketa hi swilo leswinene leswi nga ta endleka loko siku rero ri hundzile. Loko hi endla tano, hi ta tshinela swinene eka Xikwembu naswona hi ta endla hinkwaswo leswi hi nga swi kotaka leswaku hi xi tsakisa.—2 Pet. 3:11, 12.
7. I yini leswi hi swi tivaka?
7 I swa nkoka ku ehleketa hileswi hi swi tivaka, ku nga leswaku masiku yo hetelela ma sungule hi 1914. Yehovha a nga lo hi byela hi vuprofeta lebyi kombetelaka eka lembe rero ntsena kambe u tlhele a hi byela hi vuenti hi swiendlakalo leswi a swi ta endleka endzhaku ka lembe rero. Hikwalaho ka sweswo, ha tiyiseka leswaku “siku lerikulu ra Yehovha ri le kusuhi.” (Sof. 1:14) Nakambe ha swi tiva leswaku u lava hi chumayela vanhu hilaha hi nga kotaka hakona “mahungu lawa lamanene ya Mfumo.” (Mat. 24:14) Mahungu lawa ma chumayeriwa ematikweni ya kwalomu ka 240 hi tindzimi leti tlulaka 1 000. A swi bohi leswaku hi tiva “siku ra kona ni nkarhi” leswaku hi hisekela ntirho lowu wa nkoka.
A HI SWI TIVI LESWAKU YEHOVHA U TA ENDLA YINI
8. Xana xiga lexi nge “ntirho wa Xikwembu xa ntiyiso” xi vula yini? (Eklesiasta 11:5)
8 A hi mikarhi hinkwayo hi tivaka “ntirho wa Xikwembu xa ntiyiso.” (Hlaya Eklesiasta 11:5.) Xiga xexo xi kombetela eka leswi Yehovha a endlaka swi va kona kumbe leswi a swi pfumelelaka ku swi endleka leswaku ku hetiseka xikongomelo xakwe. A hi nge pfuki hi swi tivile leswaku hikwalahokayini Yehovha a pfumelela nchumu wo karhi leswaku wu endleka kumbe ndlela leyi a nga ta hi pfuna hayona. (Ps. 37:5) Bibele yi fanisa ku nga “tivi ntirho wa Xikwembu xa ntiyiso” ni ndlela leyi n’wana a kulaka hayona endzeni ka khwiri ra mana wakwe, ku nga nchumu lowu ni sweswi van’wasayense va nga wu twisisiki hi ku helela. Hilaha ku fanaka, na hina a hi yi tivi ndlela leyi Yehovha a nga ta endla swilo hayona.
9. Hi nga langutana ni mitlhontlho yihi hikwalaho ka leswi hi nga swi tiviki leswaku Yehovha u ta hi pfuna njhani?
9 Loko hi nga yi tivi ndlela leyi Yehovha a nga ta hi pfuna hayona, swi nga endla hi kanakana ku endla swiboho swo karhi. Hi nga kanakana ku titsona swo karhi leswaku hi tirhela Yehovha hilaha ku engetelekeke, ku fana ni ku rhurhela laha ku nga ni xilaveko lexikulu xa vachumayeri va Mfumo hambi ku ri ku tshika swo karhi evuton’wini bya hina hikwalaho ka Mfumo. Kumbe hi nga tivutisa loko Yehovha a hi amukela hileswi hi tsandzekaka ku fikelela swo karhi entirhweni wakwe, hi nga voniki mihandzu entirhweni wo chumayela hambiloko hi tirha hi matimba kumbe loko hi hlangana ni mitlhontlho eka tiprojeke to aka miako ya nhlangano.
10. Hi dyondza ku endla yini loko hi nga tivi leswaku Yehovha u ta hi pfuna hi ndlela yihi?
10 Ku nga tivi leswaku Yehovha u ta hi pfuna hi ndlela yihi swi hi pfuna leswaku hi titsongahata ni ku vona ndlela leyi miehleketo ya Yehovha yi tlakukeke hayona eka ya hina. (Esa. 55:8, 9) Hi tlhela hi dyondza ku tshemba Yehovha hi ku helela ni ku titshega hi yena leswaku a hi pfuna. Loko hi vona vuyelo lebyinene entirhweni wo chumayela kumbe eka tiprojeke to aka miako ya nhlangano, hi yisa ku dzuneka eka Yehovha. (Ps. 127:1; 1 Kor. 3:7) Hambiloko mikarhi yin’wana swilo swi endleka hi ndlela leyi a hi nga yi langutelanga, hi fanele hi tsundzuka leswaku Yehovha u vona swilo hinkwaswo. (Esa. 26:12) Hi endla leswi hi nga swi kotaka hi ri karhi hi tshemba leswaku Yehovha u ta hi pfuna. Hi ni ntshembo wa leswaku Yehovha u ta hi nyika nkongomiso lowu hi wu lavaka hambiloko ku nga ri hi singita ku fana ni ndlela leyi endleke hayona enkarhini lowu hundzeke.—Mit. 16:6-10.
11. Hi swihi swilo swa nkoka leswi hi swi tivaka?
11 Ha swi tiva leswaku Yehovha u ni rirhandzu, u lulamile naswona u tlharihile. Nakambe ha swi tiva leswaku wa swi tlangela leswi hi n’wi endlelaka swona ku katsa ni vamakwerhu. Ku engetela kwalaho, ha swi tiva leswaku wa va katekisa lava tshembekaka eka yena.—Hev. 11:6.
A HI SWI TIVI LESWI NGA TA ENDLEKA ENKARHINI LOWU TAKA
12. Hi ku ya hi Yakobo 4:13, 14, i yini leswi hi nga tiyisekiki ha swona?
12 Hlaya Yakobo 4:13, 14. Ku vula ntiyiso a hi swi tivi leswaku mundzuku u hi khomele yini. Namuntlha hi nga humeleriwa hi swilo leswi a hi nga swi langutelanga kumbe leswi hi nga taka hi nga swi koti ku swi lawula. (Ekl. 9:11) Kutani sweswo swi nga endla hi tivutisa loko leswi hi swi kunguhateke swi ta humelela kumbe loko hi ta kota ku vona vuyelo bya swona.
13. Ku nga tivi leswaku ku ta endleka yini enkarhini lowu taka swi nga endla leswaku hi titwa njhani?
13 Swi nga hi tikela ku tiyisela swiyimo swo tika hileswi hi nga tiviki leswaku ku ta endleka yini enkarhini lowu taka. Hikwalahokayini hi vula tano? Hikuva ku vilela hileswi nga ha endlekaka swi nga endla hi heleriwa hi ntsako. Ku weriwa hi makhombo hi xitshuketa ni swiendlakalo leswi nga languteriwangiki swi nga endla hi va ni gome hi tlhela hi vilela. Nakambe loko hi nga swi kumi leswi hi swi languteleke, hi nga hela matimba.—Swiv. 13:12.
14. Hi swihi leswi hi faneleke hi swi endla ni ku swi tiva leswaku hi tsaka? (Nakambe vona swifaniso.)
14 Loko hi tiyisela miringo, hi kombisa leswaku hi tiyimisele ku tirhela Tata wa hina wa le tilweni hambi ko endleka yini hikwalaho ka leswi hi n’wi rhandzaka, ku nga ri hi leswi hi lavaka ku vuyeriwa. Bibele yi kombisa leswaku a hi fanelanga hi langutela leswaku Yehovha a hi sirhelela eka miringo hinkwayo leyi hi langutanaka na yona hikuva a nga swi kunguhati ka ha ri emahlweni leswaku vutomi bya hina byi ta va njhani. Wa swi tiva leswaku ntsako wa hina a wu titsheganga hi ku tiva leswaku vumundzuku byi hi khomele yini, ku ri na sweswo wu titshege hi ku landzela nkongomiso wakwe ni ku n’wi yingisa. (Yer. 10:23) Loko hi titshega hi yena loko hi endla swiboho, hi pfumelelana ni marito lama nge: “Loko Yehovha a swi rhandza, hi ta hanya, hi endla leswi kumbe leswiya.”—Yak. 4:15.
Loko hi lava nkongomiso wa Yehovha ni ku tlhela hi n’wi yingisa, u ta hi sirhelela (Vona tindzimana 14-15)b
15. Hi tiva yini hi vumundzuku?
15 Hambileswi hi nga swi tiviki leswaku ku ta endleka yini mundzuku, ha swi tiva leswaku Yehovha u hi tshembise vutomi lebyi nga heriki, ku nga ha va etilweni kumbe laha misaveni. Ha swi tiva leswaku a nga hembi naswona a xi kona lexi nga n’wi sivelaka ku hetisisa switshembiso swakwe. (Tito 1:2) Hi yena ntsena loyi ‘a boxaka leswi nga ta humelela swi nga si humelela, ni leswi nga si humelelaka u swi vule khale.’ Swi ve tano enkarhini lowu nga hundza naswona swi ta va tano enkarhini lowu taka. (Esa. 46:10) Ha swi tiva leswaku Yehovha a nge tshiki ku hi rhandza. (Rhom. 8:35-39) U ta hi nyika vutlhari, nchavelelo ni matimba yo tiyisela nchumu wun’wana ni wun’wana lowu hi nga langutanaka na wona. Ha tiyiseka leswaku Yehovha u ta hi pfuna ni ku hi katekisa.—Yer. 17:7, 8.
A HI NGE YI TWISISI HI KU HELELA NDLELA LEYI YEHOVHA A HI TIVAKA HAYONA
16. Yehovha u tiva yini hi hina naswona sweswo swi endla hi titwa njhani? (Pisalema 139:1-6)
16 Hlaya Pisalema 139:1-6. Muvumbi wa hina u hi tiva kahle, u tiva leswi hi swi ehleketaka ni ndlela leyi hi titwaka hayona. Nakambe u tiva leswi hi lavaka ku swi vula ni leswi nga etimbilwini ta hina. Ku engetela kwalaho, u tiva hinkwaswo leswi hi swi endlaka ni leswaku hikwalahokayini hi swi endla. Hi xikombiso, Hosi Davhida u vule leswaku Yehovha wa khathala hi hina naswona u lunghekele ku hi pfuna. A hi ku tsakisa ka swona ku vona Hosi leyi Tlakukeke tlhelo Mutumbuluxi wa tilo ni misava a khathala hi hina! Hi pfumelelana ni marito ya Davhida loyi a nga te: “Ndlela leyi u ndzi tivaka ha yona a ndzi koti ku yi twisisa. Yi tlakuke ngopfu lerova a ndzi nge yi fikeleli.”—Ps. 139:6.
17. I yini leswi nga endlaka swi hi tikela ku tshemba leswaku Yehovha u hi tiva kahle?
17 Ndlela leyi hi kurisiweke hayona, ndhavuko kumbe leswi a hi pfumela eka swona, swi nga endla swi hi tikela ku vona Yehovha tanihi Tatana loyi a nga ni rirhandzu naswona a khathalaka hi hina. Kumbexana hi nga ha vona onge swihoxo leswi hi tshameke hi swi endla enkarhini lowu nga hundza, swi bihe ngopfu lerova Yehovha a nge pfuki a lave ku va ekusuhi na hina. Phela hambi ku ri Davhida mikarhi yin’wana a a titwa tano. (Ps. 38:18, 21) Hilaha ku fanaka, munhu loyi a ringetaka ku cinca vutomi byakwe ni ku hanya hi milawu ya Yehovha a nga tivutisa a ku: ‘Loko Xikwembu xi ndzi twisisa, hikwalahokayini xi lava ndzi cinca ndlela leyi ndzi hanyaka hayona?’
18. Hi vuyeriwa njhani loko hi amukela leswaku Yehovha u hi tiva ku tlula ndlela leyi hi titivaka hayona? (Nakambe vona swifaniso.)
18 Hi nga dyondza ku amukela leswaku Yehovha u hi tiva ku antswa ku tlula ndlela leyi hina hi ti tivisaka xiswona ni leswaku u vona leswinene eka hina ku nga leswi hi tikelaka ku swi vona. Hambileswi a swi vonaka swihoxo swa hina kambe wa swi twisisa leswaku hikwalahokayini hi endle tano hikuva wa hi rhandza. (Rhom. 7:15) Loko hi tlangela leswinene leswi Yehovha a swi vonaka eka hina, swi ta endla leswaku hi n’wi tirhela hi ku tshembeka naswona hi tsakile.
Namuntlha hi kota ku langutana ni swiendlakalo leswi nga languteriwangiki hileswi Yehovha a hi tshembiseke leswaku u ta hetisisa switshembiso swakwe emisaveni leyintshwa (Vona tindzimana 18-19)c
19. Hi tiva yini hi Yehovha?
19 A hi kanakani leswaku Yehovha i rirhandzu. (1 Yoh. 4:8) Ha swi tiva leswaku milawu yakwe yo lulama yi kombisa ndlela leyi a hi rhandzaka hayona nileswaku mikarhi hinkwayo u hi navelela leswinene. Nakambe ha swi tiva leswaku u lava hi hanya hilaha ku nga heriki. U hi nyike nkutsulo leswaku sweswo swi koteka. Nyiko yoleyo yi hi tiyisekisa leswaku u lava swi hi fambela kahle hambileswi hi nga hetisekangiki. (Rhom. 7:24, 25) Nakambe ha swi tiva leswaku “Xikwembu i xikulu eka timbilu ta hina naswona xi tiva swilo hinkwaswo.” (1 Yoh. 3:19, 20) Yehovha u vona swilo hinkwaswo hi hina naswona wa tshemba leswaku hi ta swi kota ku endla ku rhandza kakwe.
20. I yini leswi nga ta hi pfuna leswaku hi papalata ku vilela hileswi hi nga swi tiviki?
20 Yehovha u hi tivise hinkwaswo leswi hi faneleke hi swi tiva. Ematshan’weni yo ehleketa hileswi hi nga taka hi nga koti ku swi cinca, hi ta va hi endla kahle loko hi ehleketisisa hi swilo swa nkoka ku nga leswi hi swi tivaka. Loko hi endla tano, hi ta va hi kombisa leswaku hi tshemba Yehovha “Loyi a nga ni vutivi lebyi heleleke.” (Yobo 36:4) Hambileswi hi nga tiviki swilo hinkwaswo sweswi, hi swi langutele hi mahlongati ku dyondza swilo leswintshwa hi Xikwembu xa hina Lexikulu hilaha ku nga heriki.—Ekl. 3:11.
RISIMU 104 Nyiko Ya Xikwembu Ya Moya Lowo Kwetsima
a Leswi Yesu a nga ta rhangela eka nyimpi ya Armagedoni, swa twala ku gimeta hileswaku se wa ri tiva siku leri nyimpi yoleyo yi nga ta sungula ha rona ni leswaku u ta va ‘hlula rini valala vakwe.’—Nhlav. 6:2; 19:11-16.
b NHLAMUSELO YA XIFANISO: Tatana ni xijahatana xakwe va ri karhi va lunghisa nkwama wa ndzindzakhombo leswaku va lunghekela xiyimo lexi nga languteriwangiki.
c NHLAMUSELO YA XIFANISO: Makwerhu loyi a langutaneke ni swiyimo swo tika u ehleketisisa hi ntsako lowu a nga ta wu kuma emisaveni leyintshwa.