Pfuna Swichudeni Swa Wena Swa Bibele Leswaku Swi Tirhela Yehovha

1-2. (a) Hikwalahokayini swichudeni swa Bibele swin’wana swi kanakana ku tirhela Yehovha? (b) Hi ta bula hi yini eka nhlokomhaka leyi?

XANA wa ha swi tsundzuka leswi a swi endla u kanakana ku va Mbhoni ya Yehovha? Kumbexana hileswi a wu chava leswaku swirho swa ndyangu, vatirhikulobye ni vanghana va ta ku jikela. Kumbe hileswi a wu ehleketa leswaku a wu nge pfuki u swi kotile ku hanya hi milawu ya Xikwembu. Loko swi ri tano, u nga pfuna swichudeni swa wena leswi kanakanaka leswaku swi yimela ntiyiso.

² Yesu u swi xiyile leswaku ku chava koloko ku nga sivela munhu leswaku a nga swi koti ku va mulandzeri wakwe. (Mat. 13:​20-22) Hambiswiritano, a nga va helelanga mbilu lava a va kanakana ku n’wi landzela. Hikwalaho, u kombe vadyondzisiwa vakwe ndlela yo pfuna vanhu vo tano leswaku (1) va xiya leswi va sivelaka ku endla nhluvuko, (2) va ya va n’wi rhandza swinene Yehovha, (3) va rhangisa swilo swa nkoka, ni (4) ku va va hlula mitlhontlho. Hi nga swi tirhisa njhani leswi Yesu a swi byeleke vadyondzisiwa vakwe loko hi ri karhi hi tirhisa buku leyi nge, Tiphine Hi Vutomi Hilaha Ku Nga Heriki! leswaku hi pfuna xichudeni xa Bibele xi kota ku tirhela Yehovha?

PFUNA XICHUDENI XA WENA XI TIVA LESWI XI SIVELAKA KU ENDLA NHLUVUKO

3. I yini leswi nga ha vaka swi sivele Nikodema leswaku a va mudyondzisiwa wa Yesu?

³ Nikodema loyi a a ri xikhulu xa Vayuda, u langutane ni tlhontlho wun’wana loko a lava ku va mudyondzisiwa wa Yesu. Endzhaku ka tinh’weti ta tsevu Yesu a sungule ntirho wakwe wo chumayela, Nikodema u swi xiyile leswaku Yesu a a rhumiwe hi Xikwembu. (Yoh. 3:​1, 2) Nilokoswiritano, Nikodema u hlawule ku ya vona Yesu exihundleni hikwalaho ka leswi a a “chava Vayuda.” (Yoh. 7:13; 12:42) Kumbexana a a ehleketa leswaku u ta lahlekeriwa hi swilo swo tala loko o va mudyondzisiwa wa Yesu.a

4. Xana Yesu u n’wi pfune njhani Nikodema leswaku a twisisa leswi Xikwembu xi swi languteleke eka yena?

⁴ Hambileswi Nikodema a a tiva Nawu, a a lava ku pfuniwa ku twisisa leswi Yehovha a swi languteleke eka yena. Yesu u n’wi pfune njhani? A a lunghekele ku n’wi pfuna hambileswi a teke eka yena nivusiku. Nakambe u n’wi byele leswi a a fanele a swi endla leswaku a va mudyondzisiwa wakwe, ku nga ku hundzuka eswidyohweni swakwe, a khuvuriwa ni ku tlhela a kombisa ripfumelo eka N’wana wa Xikwembu.—Yoh. 3:​5, 14-21.

5. Hi nga xi pfuna njhani xichudeni xa hina xa Bibele leswaku xi tiva leswi xi sivelaka ku endla nhluvuko?

⁵ Hambiloko xichudeni xa Bibele xi ma twisisa kahle Matsalwa, swi nga ha lava leswaku hi xi pfuna xi tiva leswi xi sivelaka ku endla nhluvuko. Hi xikombiso, ntirho wa ku tihanyisa kumbe ku kanetiwa hi swirho swa ndyangu swi nga endla leswaku xi nga swi koti ku tirhela Yehovha. Hikwalaho, tinyike nkarhi wo va ni xichudeni xa wena hi ku va u xi rhamba eswakudyeni kumbe leswaku mi tiolola milenge. Loko u endla tano, u nga ha pfulekeriwa hi nkarhi wo tiva leswi xi karhataka. Xi khutaze leswaku xi endla ku cinca loko swi fanerile leswaku xi kombisa ndlela leyi xi rhandzaka Yehovha hayona ku nga ri ku tsakisa wena.

6. U nga xi pfuna njhani xichudeni xa wena leswaku xi kota ku tirhisa leswi xi swi dyondzaka? (1 Vakorinto 16:13)

⁶ Loko xichudeni xa wena xa Bibele xi tiyiseka leswaku Yehovha u ta xi pfuna xi hanya hi milawu yakwe, xi ta va ni matimba yo tirhisa leswi xi swi dyondzaka. (Hlaya 1 Vakorinto 16:13.) Hi nga fanisa ntirho wa wena wo va mudyondzisi wa Bibele ni ntirho lowu endliwaka hi thicara exikolweni. Ehleketa hiloko wa ha ri exikolweni, xana a wu rhandza thicara ra njhani? Kumbexana a wu rhandza thicara leri ku lehiselaka mbilu ni ku tlhela ri ku pfuna u endla swilo leswi a wu ehleketa leswaku a wu nge pfuki u swi kotile. Hilaha ku fanaka, mudyondzisi lonene wa Bibele a ngo dyondzisa leswi Yehovha a lavaka hi swi endla ntsena kambe u tlhela a tiyisekisa xichudeni xakwe leswaku Yehovha u ta xi pfuna xi antswisa swo karhi evuton’wini bya xona. U nga swi endla njhani sweswo?

PFUNA XICHUDENI XA WENA LESWAKU XI YA XI RHANDZA YEHOVHA

7. Xana Yesu u va pfune njhani vayingiseri vakwe leswaku va ya va rhandza Yehovha?

⁷ Yesu a a swi tiva leswaku loko vadyondzisiwa vakwe va rhandza Xikwembu, a swi ta endla va lava ku tirhisa leswi va swi dyondzaka. Nkarhi ni nkarhi a a dyondzisa hi swilo leswi a swi ta pfuna vadyondzisiwa vakwe leswaku va ya va rhandza Tata wa vona wa le tilweni. Hi xikombiso, u fanise Yehovha ni tatana loyi a nyikaka vana vakwe tinyiko letinene. (Mat. 7:​9-11) Swi nga endleka leswaku van’wana va vayingiseri va Yesu a va nga ri na yena tatana wo tano. Ehleketa ndlela leyi va nga ha vaka va titwe hayona loko Yesu a va byela hi xikombiso xa tatana loyi a amukeleke n’wana wakwe loyi a a hanya vutomi bya vusopfa. Xikombiso xexo xi va pfunile leswaku va swi vona ku Yehovha wa va rhandza vana vakwe naswona u lava ku va pfuna.—Luka 15:​20-24.

8. U nga xi pfuna njhani xichudeni xa wena xa Bibele leswaku xi ya xi rhandza Yehovha?

⁸ Na wena u nga swi kota ku pfuna xichudeni xa wena xa Bibele leswaku xi ya xi rhandza Yehovha hi ku va u xi byela hi vumunhu lebyinene lebyi Xikwembu xi nga na byona loko mi ri karhi mi dyondza. Loko mi ri karhi mi dyondza xi pfune xi vona leswaku leswi xi swi dyondzaka swi fambisana njhani ni rirhandzu ra Yehovha. Loko mi dyondza hi nkutsulo, xi pfune xi vona leswaku wu xi vuyerisa njhani. (Rhom. 5:8; 1 Yoh. 4:10) Loko xichudeni xi vona ndlela leyi Yehovha a xi rhandzaka hayona xi ta ya xi n’wi rhandza swinene.—Gal. 2:20.

9. I yini leswi pfuneke Michael leswaku a cinca vutomi byakwe?

⁹ Ehleketa hi Michael wa le Indonesia. U kulele entiyisweni kambe a a nga khuvuriwanga. Loko a ri ni malembe ya 18, u rhurhele etikweni rin’wana leswaku a ya tirha tanihi muchayeri wa lori. Hi ku famba ka nkarhi, u catile kambe u siye ndyangu wakwe a ya tirhela etikweni ra le kule. Loko a ha fambile, nsati wakwe ni xinhwanyetana xa vona va sungule ku dyondza Bibele naswona a va endla nhluvuko. Endzhaku ka rifu ra mana wakwe, Michael u endle xiboho xo tlhelela ekaya leswaku a ya khathalela bava wakwe naswona u sungule ku dyondza Bibele. Michael u fike a khumba hi xiyenge lexi nge, “Anakanyisisa” lexi nga eka buku leyi nge, Tiphine Hi Vutomi Hilaha Ku Nga Heriki! eka dyondzo 27. Loko a ri karhi a anakanyisisa hi ndlela leyi Yehovha a nga ha vaka a titwe hayona loko a vona N’wana Wakwe a xaniseka, u xiririke mihloti. Sweswo swi endle leswaku a sungula ku khensa nkutsulo, a cinca vutomi byakwe ni ku tlhela a khuvuriwa.

PFUNA XICHUDENI XA WENA LESWAKU XI RHANGISA SWILO SWA NKOKA

10. Yesu u va pfune njhani vadyondzisiwa vo sungula leswaku va rhangisa swilo swa nkoka? (Luka 5:​5-11) (Nakambe vona xifaniso.)

¹⁰ Vadyondzisiwa vo sungula va hatle va swi xiya leswaku Yesu a a ri Mesiya loyi a tshembisiweke kambe a va lava ku pfuniwa va rhangisa ntirho wo chumayela. Petro na Andriya se a va ri ni nkarhinyana va ri vadyondzisiwa loko Yesu a va rhamba leswaku va n’wi landzela nkarhi hinkwawo. (Mat. 4:​18, 19) A va tirha na Yakobo na Yohane ebindzwini ra vona ro phasa tinhlampfi leri a ri famba kahle swinene. (Mar. 1:​16-20) Loko Petro na Andriya va endla xiboho xo “siya tinete ta vona” leswaku va kota ku landzela Yesu nkarhi hinkwawo, va rhange hi ku tiyiseka leswaku va ta swi kota ku khathalela mindyangu ya vona. I yini lexi va pfuneke leswaku va rhangisa swilo swa nkoka? Buku ya Luka yi kombisa leswaku Yesu u endle singita leri endleke va tiyiseka leswaku Yehovha a a ta va khathalela.—Hlaya Luka 5:​5-11.

11. Hi nga yi tirhisa njhani mitokoto ya hina leswaku hi pfuna xichudeni xi tiyisa ripfumelo ra xona?

¹¹ A hi nge swi koti ku endla masingita hilaha Yesu a endleke hakona. Kambe hi nga swi kota ku byela van’wana ndlela leyi Yehovha a va seketelaka hayona lava n’wi rhangisaka evuton’wini bya vona. Hi xikombiso, xana wa yi tsundzuka ndlela leyi Yehovha a ku pfuneke hayona loko u sungula ku ya etinhlengeletanwini ta vandlha? Kumbexana a wu boheka ku byela muthori wa wena leswaku a wu nge he swi koti ku tirha tiawara to tala hikuva sweswo swi ta endla leswaku u nga vi kona etidyondzweni. Loko u ri karhi u byela xichudeni xa wena mitokoto leyi, tlhela u xi hlamusela ndlela leyi ripfumelo ra wena ri tiyeke hayona loko u vona ndlela leyi Yehovha a ku seketeleke hayona loko u rhangisa ku n’wi tirhela.

12. (a) Hikwalahokayini hi fanele hi rhamba vamakwerhu vo hambanahambana loko hi ri karhi hi dyondza Bibele na xichudeni? (b) Hi nga ti tirhisa njhani tivhidiyo leswaku hi dyondzisa swichudeni swa hina hi ndlela leyinene? Nyika xikombiso.

¹² Xichudeni xa wena xi nga vuyeriwa loko xi twa leswi van’wana va swi endleke leswaku va kota ku tirhela Yehovha. Hikwalaho, rhamba vamakwerhu vo hambanahambana leswaku va mi joyina loko mi dyondza. Va kombele leswaku va hlamusela ndlela leyi va wu kumeke hayona ntiyiso ni leswi va swi endleke leswaku va rhangisa ku tirhela Yehovha evuton’wini bya vona. Nakambe hlalelani tivhidiyo leti kumekaka eka xiyenge lexi nge, “Anakanyisisa” kumbe lexi nge, “Kuma Leswi Engetelekeke” leswi kumekaka eka buku leyi nge, Tiphine Hi Vutomi Hilaha Ku Nga Heriki! Hi xikombiso, loko mi ri karhi mi dyondza dyondzo 37, hlalelani vhidiyo leyi nge, “Yehovha U Ta Hi Khathalela” ivi endzhaku u tiyisekisa xichudeni xa wena leswaku Yehovha u ta xi pfuna loko xi n’wi rhangisa.

PFUNA XICHUDENI XA WENA LOKO XI LANGUTANA NI MITLHONTLHO

13. Yesu u va pfune njhani vadyondzisiwa vakwe leswaku va langutana ni nkaneto?

¹³ Yesu u byele valandzeri vakwe leswaku a va ta kanetiwa hambi ku ri hi maxaka ya vona. (Mat. 5:11; 10:​22, 36) Nakambe loko Yesu a ri ekusuhi ni ku heta ntirho wakwe wo chumayela, u lemukise vadyondzisiwa vakwe leswaku swi nga endleka va dlayiwa hileswi va gandzelaka Yehovha. (Mat. 24:9; Yoh. 15:20; 16:2) U va khutaze leswaku va va ni vuxiyaxiya loko va ri karhi va chumayela. U tlhele a va khutaza leswaku va nga lwi na vona lava va va kanetaka nileswaku va tirhisa vutlhari loko va ri karhi va chumayela.

14. Hi nga xi pfuna njhani xichudeni leswaku xi lunghekela ku kanetiwa? (2 Timotiya 3:12)

¹⁴ Hi nga pfuna xichudeni xa Bibele xi kota ku tiyimela loko xi kanetiwa hi ku va hi xi byela leswi vatirhikulobye, vanghana ni maxaka va nga swi endlaka kumbe ku swi vula hileswi xi dyondzaka Bibele. (Hlaya 2 Timotiya 3:12.) Hi xikombiso, vatirhikulobye van’wana va nga endla mafenya hikwalaho ka leswi xi hanyaka hileswi xi swi dyondzeke eBibeleni. Kasi van’wana hambi ku ri maxaka ya le kusuhi va nga solasola leswi xi pfumelaka eka swona. Loko hi hatla hi pfuna xichudeni xi lunghekela ku kanetiwa, xi ta va xi lunghekile loko ndzingo wu fika.

15. I yini leswi nga pfunaka xichudeni leswaku xi langutana ni ku kanetiwa hi vandyangu?

¹⁵ Loko swi ta eka ku kanetiwa hi vandyangu, khutaza xichudeni xa wena leswaku xi anakanyisisa hileswi swi nga endlaka xi kanetiwa. Swi nga endleka va ehleketa leswaku xi humbiwe mano kumbe va twe mavunwa hi Timbhoni ta Yehovha. Hambi ku ri Yesu u kanetiwile hi ndyangu wa ka vona. (Mar. 3:21; Yoh. 7:5) Dyondzisa xichudeni xa wena leswaku xi va lehisela mbilu vandyangu ni ku tlhela xi vulavula ni van’wana hi ndlela ya musa.

16. Hi nga xi pfuna njhani xichudeni leswaku xi hlamusela leswi xi pfumelaka eka swona hi ndlela ya vutlhari?

¹⁶ Hambiloko maxaka ma kombisa ku tsakela, xichudeni a xi fanelanga xi hlamusela swilo hinkwaswo hi nkarhi wun’we. Phela sweswo, swi nga endla leswaku ma pfilunganyeka ni ku tlhela ma nga ha swi tsakeli ku bula na xona enkarhini lowu taka. Xi khutaze ku hlamusela leswi xi pfumelaka eka swona hi ndlela yo olova leyi nga ta endla leswaku ni le nkarhini lowu taka ma xi yingisela. (Kol. 4:6) Kumbexana xi nga tlhela xi ma byela hi website ya jw.org. Sweswo swi ta endla leswaku ma dyondza swo tala hi Timbhoni ta Yehovha hi nkarhi wa wona.

17. U nga xi pfuna njhani xichudeni leswaku xi hlamula swivutiso leswi van’wana va nga ha vaka na swona hi Timbhoni ta Yehovha? (Nakambe vona xifaniso.)

¹⁷ U nga tirhisa xiyenge lexi nge, “Swivutiso Leswi Talaka Ku Vutisiwa” lexi kumekaka eka jw.org leswaku u pfuna xichudeni xa wena xi lunghiselela tinhlamulo to olova ta swivutiso leswi maxaka kumbe vatirhikulobye va nga swi vutisaka. (2 Tim. 2:​24, 25) Emakumu ka dyondzo yin’wana ni yin’wana kambisisani xiyenge lexi nge, “Van’wana Va Ri” lexi kumekaka eka buku leyi nge, Tiphine Hi Vutomi Hilaha Ku Nga Heriki! Xi khutaze leswaku xi praktisa ndlela leyi xi nga ta va hlamusela hayona van’wana leswi xi pfumelaka eka swona. U nga tlhela u xi nyika swiringanyeto swa ndlela leyi xi nga swi endlaka hayona sweswo. Loko xi endla tano, xi ta swi kota ku hlamusela leswi xi pfumelaka eka swona handle ko chava.

18. Hi nga xi khutaza njhani xichudeni leswaku xi sungula ku chumayela ni vandlha? (Matewu 10:27)

¹⁸ Yesu u khutaze vadyondzisiwa vakwe leswaku va byela vanhu mahungu lamanene. (Hlaya Matewu 10:27.) Loko xichudeni xi hatla xi sungula ku byela van’wana leswi xi pfumelaka eka swona, xi ta hatla xi tshemba Yehovha. U nga xi pfuna njhani leswaku xi fikelela sweswo? Loko ku tivisiwa matsima yo chumayela evandlheni, khutaza xichudeni xa wena leswaku xi anakanyisisa hileswi xi nga swi endlaka leswaku xi fanelekela ku va muhuweleri. Xi hlamusele leswaku hikwalahokayini vo tala va vone swi olova ku sungula ku chumayela hi nkarhi wolowo wa matsima. Xi nga tlhela xi vuyeriwa eka ndzetelo wa ntirho wo chumayela lowu hi wu kumaka eka tinhlengeletano ta le xikarhi ka vhiki. Ndzetelo lowu wu ta xi pfuna leswaku xi kota ku hlamusela leswi xi pfumelaka eka swona hi ndlela leyi khorwisaka.

KOMBISA LESWAKU WA XI TSHEMBA XICHUDENI XA WENA

19. Yesu u swi kombise njhani leswaku wa va tshemba vadyondzisiwa vakwe naswona hina hi nga n’wi tekelela njhani?

¹⁹ Loko Yesu a nga si tlhelela etilweni, u byele vadyondzisiwa vakwe leswaku a a ta tlhela a va na vona. Kambe a va nga swi twisisi leswaku a vulavula hi ku va na vona etilweni. Yesu a a swi tiva leswaku va tshembekile hambileswi a va nga swi twisisi leswi a a vulavula hi swona. (Yoh. 14:​1-5, 8) Nakambe a a swi tiva leswaku a va lava nkarhi wo twisisa swin’wana swo fana ni ntshembo wo hanya etilweni. (Yoh. 16:12) Na hina hi nga kombisa leswaku ha tshemba ku xichudeni xa hina xi lava ku tsakisa Yehovha.

20. Makwerhu waxisati wa le Malawi u swi kombise njhani leswaku wa xi tshemba xichudeni xakwe?

²⁰ Hi tshama hi ri ni ntshembo wa leswaku swichudeni swa hina swi lava ku endla leswinene. Ehleketa hi makwerhu waxisati Chifundo loyi a tshamaka eMalawi. U sungule ku dyondza Bibele ni muntshwa waxisati loyi a a nghena kereke ya Khatoliki loyi a vuriwaka Alinafe va tirhisa buku leyi nge, Tiphine Hi Vutomi Hilaha Ku Nga Heriki! Loko va heta ku dyondza dyondzo 14, Chifundo u vutise xichudeni xakwe loko swi ri kahle ku gandzela hi ku tirhisa swifaniso. Alinafe u hlundzukile kutani a hlamula a ku, “Xexo i xiboho xa munhu hi yexe!” Sweswo swi endle leswaku Chifundo a tivutisa loko wolawo ku ri makumu ya dyondzo ya vona. Hambiswiritano, u ye emahlweni a dyondza na Alinafe, a ri karhi a tshemba leswaku u ta swi twisisa hi ku famba ka nkarhi. Endzhakunyana ka tin’hweti ti nga ri tingani, Chifundo u n’wi vutise xivutiso lexi nga eka dyondzo 34 lexi nge, “Ku dyondza Bibele ni ku tiva Yehovha Xikwembu xa ntiyiso, swi ku vuyerise njhani ku ta fikela sweswi?” Loko Chifundo a hlamusela ndlela leyi Alinafe a hlamuleke hayona u ri, “U boxe tinhla to tala to tsakisa, yin’wana ya tona hi leswaku Timbhoni a ti katseki eka nchumu wun’wana ni wun’wana lowu Bibele yi vulaka leswaku wu hoxile.” Endzhakunyana ka sweswo, Alinafe u tshike ku tirhisa swifaniso naswona u khuvuriwile.

21. Hi nga xi pfuna njhani xichudeni xa hina leswaku xi tirhela Yehovha ni ku tlhela xi yimela ntiyiso?

²¹ Hambileswi ku nga Yehovha loyi a “swi kurisaka,” na hina hi ni vutihlamuleri byo pfuna xichudeni xa hina xa Bibele leswaku xi endla nhluvuko. (1 Kor. 3:7) Hi endla swo tala ku tlula ku xi dyondzisa leswi Xikwembu xi lavaka leswaku xi swi endla. Hi xi pfuna leswaku xi n‘wi rhandza swinene Yehovha. Nakambe hi tlhela hi xi khutaza ku kombisa ndlela leyi xi n’wi rhandzaka hayona hi ku va xi n’wi rhangisa evuton’wini bya xona. Ku engetela kwalaho, hi xi dyondzisa leswaku xi titshega hi Yehovha loko xi langutane ni mitlhontlho. Loko hi kombisa leswaku ha xi tshemba, hi endla xi tiyiseka leswaku xi nga swi kota ku hanya hi milawu ya Yehovha ni ku tlhela xi yimela ntiyiso.