Papila Leri Humaka Eka Huvo Leyi Fumaka

“ONGE mi nga va ni musa lowu nga faneriwiki ni ku rhula loku humaka eka Xikwembu Tata wa hina ni le ka Hosi Yesu Kreste.” Lexi i xiloso lexi Pawulo a xi tirhiseke eka mapapila yakwe yo tala lawa a ma tsaleleke mavandlha. Xi yi hlamusela kahle ndlela leyi hi titwaka ha yona hi n’wina hinkwenu.—Efe. 1:2.

Ha wu tlangela swinene musa lowu nga faneriwiki wo huma eka Yehovha, lowu a hi kombeke wona hi ku tirhisa gandzelo ra nkutsulo ra Kreste Yesu! Nkutsulo wu endla leswaku hi amukeleka emahlweni ka Xikwembu. A hi nga ta swi kota ku amukeleka eka xona, hambiloko ho yi hlayisa ku yini Bibele, hi chumayela mahungu lamanene kumbe hi endla mintirho yo karhi leyinene. Ku rivaleriwa swidyoho ni ntshembo wo kuma vutomi lebyi nga heriki a hi hakelo ya mintirho ya hina, kambe i tinyiko leti kombisaka musa wa Yehovha lowu nga faneriwiki ha Yesu Kreste.—Rhom. 11:6.

Pawulo u tsalele vapfumeri-kulobye a ku: “Ha mi kombela . . . leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona. Hikuva xi ri: ‘Hi nkarhi lowu amukelekaka ndzi mi twile, naswona hi siku ra ku ponisiwa ndzi mi pfunile.’ Maswivo! Sweswi ngopfu-ngopfu i nkarhi lowu amukelekaka. Maswivo! Sweswi i siku ra ku ponisiwa.” Ku ve ni “nkarhi lowu amukelekaka” loko muti wa Yerusalema wu nga si lovisiwa hi lembe-xidzana ro sungula. Vanhu va timbilu letinene lava rhandzaka Yehovha va ponisiwile hi tlhelo ra moya. Leswi swi endle leswaku vanhu lava hinkwavo vo tshembeka, va hetelela va ponisiwile ni hi tlhelo ra nyama, hi ku baleka va huma eYerusalema muti lowu wu nga si herisiwa hi 70 C.E.—2 Kor. 6:1, 2.

Ninamuntlha, hi hanya ‘enkarhini lowu amukelekaka’ ni le ‘sikwini ra ku ponisiwa.’ Lava Yehovha a va amukelaka tanihi malandza yakwe ni lava va ponisiwaka hi tlhelo ra moya, va ni ntshembo wa ku pona hi tlhelo ra nyama eka “siku lerikulu ra Yehovha,” leri nga kusuhi swinene.—Sof. 1:14.

Ku ta ka siku ra Yehovha ku hi endla hi va ni vutihlamuleri lebyikulu swinene. Hi fanele hi lemuxa ni ku pfuna vanhu va timbilu letinene leswaku va kuma musa wa Yehovha lowu nga faneriwiki leswaku na vona va kota ku pona. Pawulo a a byi tekela enhlokweni vutihlamuleri lebyi. U tsale a ku: “Kunene ndzi le khombyeni loko ndzi nga ma vuli mahungu lamanene!” U tlhele a phofula ndlela leyi a titwaka ha yona hi ku vula a ku: “Eka lavo tlhariha swin’we ni le ka swihunguki ndzi ni nandzu: kutani ndzi ni mapfundza yo vula mahungu lamanene.”—1 Kor. 9:16; Rhom. 1:14, 15.

Yehovha u ta hi vona nandzu loko ho wu tekela ehansi ntirho lowu wa nkoka wa ku lemukisa vanhu. Hi tsundzuka marito lawa Yehovha a ma byeleke muprofeta Ezekiyele lama nge: “N’wana wa munhu, ndzi ku endle murindzi endlwini ya Israyele, enon’wini wa mina u ta twa marito kutani u ta ndzi lemukisela vona. Loko ndzi byela lowo homboloka ndzi ku, ‘U ta fa hakunene,’ kutani wena u nga n’wi lemukisi, u nga vulavuli leswaku u lemukisa lowo homboloka endleleni yakwe yo homboloka leswaku u n’wi londzovota a hanya, leswi a hombolokeke, u ta fa exihoxweni xakwe, kambe ngati yakwe ndzi ta yi lava evokweni ra wena.”—Ezek. 3:17, 18.

Swa tika ku langutana ni masiku lawa ya makumu. Swa tika ku ringanisela etimhakeni ta ndyangu, ntirho wa ku tihanyisa, mintirho ya le vandlheni ni ntirho wo chumayela. Ku tlhandlekela kwalaho, vo tala va n’wina mi karhatiwa hi ku vabya, ntshikilelo wa mianakanyo, ku dyuhala swin’we ni ku kanetiwa. Vo tala va n’wina ma ‘tikeriwa.’ Swi tiveni leswaku ha mi twela naswona hi pfumelelana na Yesu loko a ku: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa.” (Mat. 11:28) Ha mi bumabumela n’wina hinkwenu lava mi yaka emahlweni mi tirhela Yehovha hi ku tshembeka hambiloko mi langutana ni mintlhontlho leyikulu ni leyitsongo.

Hikwalaho ka ku hiseka ka n’wina entirhweni wo chumayela ni ku dyondzisa ni hikwalaho ka mikateko ya Yehovha, emisaveni hinkwayo ku khuvuriwa vanhu va 4 762 hi xiringaniso, vhiki ni vhiki. Eka lembe ra ntirho ra n’wexemu, ku vumbiwe mavandlha lamantshwa ya 1 375. Hi ni ntshembo wa leswaku buku leyintshwa leyi nge Xana Bibele Yi Dyondzisa Yini Hakunene? leyi ana se yi kumekaka hi tindzimi leti tlulaka 120, yi ta pfuna vanhu va timiliyoni leswaku va vuyeriwa hi musa lowu nga faneriwiki ni ku rhula loku humaka eka Yehovha ‘esikwini leri ra ku ponisiwa.’

Tiyisekani leswaku hina tanihi Huvo leyi Fumaka ha mi rhandza naswona ha mi khongelela. Na hina ha mi nkhensa leswi mi hi khongelelaka.

Vamakwenu,

Huvo leyi Fumaka ya Timbhoni ta Yehovha