Papila Leri Humaka Eka Huvo Leyi Fumaka

Eka Timbhoni-kulorhi Ta Yehovha:

Hakunene ya tsakisa minkarhi leyi hi hanyaka eka yona! Naswona hi ni ntsako lowukulu! Hakunene ha swi tsakela ku tirhisana na n’wina vamakwerhu va xinuna ni va xisati lava rhandzekaka, hi tirha “hi mbilu yin’we,” leswaku hi nyikela vumbhoni lebyikulu hi Yehovha Tata wa hina wa le tilweni, vumbhoni lebyi nga si tshamaka byi nyikeriwa.—Sof. 3:9; Yoh. 14:12.

Ku tirhela Yehovha hi tsakile a swi vuli swona leswaku a hi na swona swiphiqo leswikulu. Eka lembe ra ntirho leri hundzeke, van’wana va n’wina mi langutane ni swiyimo swo tika leswi vangiweke hi ku tsekatseka ka misava, tindhambhi, swidzedze swin’we ni timhangu tin’wana ta ntumbuluko leti xungetaka vutomi. (Mat. 24:7) Vo tala va xaniseka siku ni siku hikwalaho ka mavabyi ni ku dyuhala. Hinkwerhu ka hina hi fanele hi lwisana ni “switlhavi swa maxangu” leswi tshamelaka ku engeteleka. (Mat. 24:8) Ematikweni yo hlayanyana ku katsa ni le Armenia, Eritrea ni le Korea Dzonga, vamakwerhu vo tala va xinuna va khomiwile hikwalaho ka ripfumelo ra vona.—Mat. 24:9.

I yini lexi hi pfuneke leswaku hi tshama hi ri ni langutelo lerinene hambiloko hi langutane ni swiyimo leswi swo tika? Ndzimana ya lembe ya 2010 yi hi tsundzuxe hi mhaka yin’wana ya nkoka: ‘Rirhandzu ri tiyisela swilo hinkwaswo, naswona a ri heli.’ (1 Kor. 13:7, 8) Ina, ku rhandza vanhu van’wana—swin’we ni ku rhandza Yehovha—swi hi nyika matimba leswaku hi kota ku tiyisela.

Vanhu vo tala lava tivulaka Vakreste va hlamarisiwa hi ndlela leyi ntirho wa hina wu nga wukulu ha yona ni leswaku hi wu endla minkarhi hinkwayo. Hambileswi va nga ha vaka va nga pfumelelani ni leswi hi swi pfumelaka swin’we ni tidyondzo ta hina, van’wana va boheke ku vula va ku, “N’wina mi endla ntirho lowu a wu fanele wu endliwa hi hina!” I yini lexi endlaka leswaku Timbhoni ta Yehovha ti hambeta ti chumayela masiku hinkwawo? Nakambe nhlamulo hileswaku, i rirhandzu. Ku fana ni Tata wa hina wa le tilweni, a hi swi lavi leswaku ku lova hambi ku ri munhu un’we. (2 Pet. 3:9) Ku komba leswaku hi navela leswaku vanhu hinkwavo va hundzuka swi vonake eka nhlohlorhi leyintshwa ya vahuweleri va 7 508 050 leyi rhekhodiweke eka lembe ra ntirho leri hundzeke. Hi byihi vukhongeri byin’wana lebyi nga ni vanhu vo tala swinene, lava kombisaka rirhandzu hi ndlela leyi, va ya chumayela vanhu van’wana hi ku tirhandzela?

Ha khutazeka loko minkarhi hinkwayo hi vona ku hetiseka ka vuprofeta lebyi tsariweke hi Esaya lebyi nge: “Exiphen’wini xo hetelela xa masiku ntshava ya yindlu ya Yehovha yi ta simekiwa yi tiya ehenhla ka tintshava, kunene yi ta tlakuseriwa ehenhla ka switsunga; kutani matiko hinkwawo ma fanele ma khitikanela eka yona.” (Esa. 2:2-4) Exikarhi ka vanhu vo tala lava khitikanelaka endlwini ya Yehovha i vanhu va 294 368 lava khuvuriweke eka lembe ra ntirho leri hundzeke. Ha va amukela vanhu lava va risima enhlengeletanweni ya hina. Onge rirhandzu ra hina ra Vukreste ri nga hi susumetela ku hambeta hi va pfuna leswaku va lwisana ni minhlaselo ya nala wa hina Sathana Diyavulosi.—1 Pet. 5:8, 9.

Nhlohlorhi leyintshwa ya vanhu va 18 706 895 lava veke kona eXitsundzuxweni hi Ravumbirhi, March 30, 2010, yi kombisa leswaku ka ha ri ni vanhu va timiliyoni lava nga hi joyinaka eku gandzeleni Yehovha. Hakunene ha tsaka leswi Yehovha a nga si herisaka mafambiselo lawa ya swilo yo homboloka! Sweswi rirhandzu ra hina ri hi pfuna leswaku hi hambeta hi tiyisela.—2 Tes. 3:5.

Mintsombano ya Muganga leyi nge, “Tshamani Ekusuhi Na Yehovha!” leyi yo tala ya yona yi khomeriweke ematikweni yo tala emisaveni hinkwayo hi 2010, yi tiyise vuxaka bya hina na Yehovha, Tata wa hina wa le tilweni. Ma tiyisile marito ya mupisalema lama nge: “Va tsaka vanhu lava Xikwembu xa vona ku nga Yehovha!” (Ps. 144:15) Ku nga khathariseki leswaku vumundzuku byi nga ha va byi hi khomele yini, ha tiyiseka leswaku loko Yehovha a hi seketela a hi fanelanga hi chava hambi ku ri yini. (Ps. 23:4) Ku nga ri khale, Yehovha hi ku tirhisa N’wana wa yena, u ta “herisa mintirho ya Diyavulosi.” (1 Yoh. 3:8) Entiyisweni, hi swi langutele hi mahlo-ngati leswaku ri fika siku rero! Kambe sweswi, hi ni ntirho wo tala swinene lowu hi faneleke hi tshama hi khomekile ha wona.—1 Kor. 15:58.

Tiyisekani leswaku a hi “tshiki” ku mi katsa eswikhongelweni swa hina. (Rhom. 1:9) Onge mi nga “[tihlayisa] erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.”—Yudha 21.

Hi mi rhandza hinkwenu!

Vamakwenu,

Huvo Leyi Fumaka Ya Timbhoni Ta Yehovha