GEORGIA
A Ndzi Titshega Hi Nkongomiso Wa Yehovha
Tamazi Biblaia
U VELEKIWE HI 1954
U KHUVURIWE HI 1982
MATIMU YAKWE HI KU KOMISA U pfunete ku kandziyisa minkandziyiso exihundleni naswona u tlhele a va un’wana wa valanguteri vo sungula va miganga eGeorgia, loko hi hala tlhelo a ri karhi a kurisa vana va mune.
MANANA a a hlundzukile swinene loko mina ni nsati wa mina Tsitso hi va Timbhoni ta Yehovha. Siku rin’wana, u vitane maxaka ya hina hinkwawo, a a ri ntshembo wa leswaku ma ta endla ndzi tshika ku tihlanganisa ni Timbhoni hi ku helela. A ndzi fanele ndzi hlawula—ku cinca mianakanyo kumbe ndzi hlongoriwa ekaya.
Ndzi endle xiboho xo famba. Tanihi leswi a ndzi tirha hi tinsimbi, ndzi anakanye hi ku rhurhela edorobeni ra Kutaisi, ku nga doroba ra vumbirhi hi ku kula eGeorgia laha a swi ta ndzi olovela ku kuma ntirho. Nakambe a ndzi swi tiva leswaku edorobeni rolero a ku ri ni xilaveko lexikulu xa vahuweleri, kutani a ndzi titshega hi nkongomiso wa Yehovha.
Endzhakunyana ka sweswo, ndzi hlangane ni un’wana wa swichudeni swa mina swa Bibele, loyi a a tshama exidorobanini lexi vuriwaka Jvari. Loko a twa leswaku ndzi lava ku rhurhela eKutaisi, u ndzi kombele leswaku ndzi nga fambi. U ndzi byele a ku: “Hi ni yindlu. Mina, nsati ni vana va mina hi ta etlela ekamareni rin’we kutani wena ni nsati wa wena mi ta tirhisa kamara lerin’wana.”
Leswi a ndzi titshega hi nkongomiso wa Yehovha, ndzi n’wi byele leswaku ndzi ta tshama na yena swa xinkarhana ntsena loko hi ku hatlisa ndzi ta kuma ntirho ni ndhawu leyi ndzi nga ta hirha eka yona eJvari. Lexi ndzi hlamariseke, hi madyambu ya siku rero u te ni nxaxamelo wa mintirho leyi va lavaka vanhu.
Endzhakunyana ka masiku ma nga ri mangani, ndyangu wa mina wu fike wu tshama eJvari. Hi siku ro sungula, ndzi kume ntirho lowu a wu holela mali yo tala. Muthori wa mina lontshwa u ndzi nyike ndhawu yo tshama endlwini leyikulu leyi a yi ri ya khamphani. Endzhakunyana ka sweswo, ndzi komberiwe ku pfuneta ku kandziyisa minkandziyiso leyi sekeriweke eBibeleni exihundleni. A hi ri ni ndhawu leyi eneleke ekaya ra hina lerintshwa, kutani mina ni nsati wa mina hi pfumerile leswaku ntirho lowu wu endleriwa kona.
Ku ringana malembe yo tala, yindlu ya hina a yi khomela Xitsundzuxo ni swiendlakalo swin’wana swo hlawuleka. Ku khuvuriwe vanhu vo tlula 500 endlwini ya hina! Ndza tsaka swinene leswi ndzi voneke vumbhoni byo titshega hi nkongomiso wa Yehovha ni ku tlhela ndzi wu landzela!