Nhlangano Lowuntshwa Wa Mahanyelo Ni Ntirho Wa Hina Wo Chumayela

EKA nhlangano wa lembe ni lembe wa Watch Tower Bible and Tract Society of Pennsylvania lowu veke kona hi October 3, 2015, Anthony Morris xirho xa Huvo leyi Fumaka u tivise leswaku Xikolo xa Vutirheli bya le Tilweni, Nhlangano wa Ntirho ni Dyondzo ya Bibele ya Vandlha a swi ta siviwa hi nhlangano lowuntshwa lowu vuriwaka Mahanyelo Ni Ntirho Wa Hina Wo Chumayela. Makwerhu Morris u tlhele a hlamusela leswaku Vutirheli Bya Hina Bya Mfumo a byi ta siviwa hi nkandziyiso lowu nga ni mivala ya mune ni matluka ya nhungu lowu vitaniwaka Mahanyelo Ni Ntirho Wa Hina Wo Chumayela—Xiyimiso Xa Minhlangano, lowu nga ni xiyimiso xa vhiki ni vhiki naswona wu tlhela wu va ni swifaniso leswi endleriweke leswaku ku hlaya ka Bibele ku va loku tsakisaka.

Nhlangano lowu, lowuntshwa wu aviwe hi swiphemu swinharhu:

1. Leswi Hi Swi Dyondzaka eBibeleni. Xiyenge xo sungula eka xiphemu lexi i nkulumo ya timinete ta khume leyi sekeriweke eka ku hlaya ka Bibele ka vhiki ni vhiki leyi katsaka ni swifaniso leswi nga eka xiyimiso. Xiyenge xa vumbirhi lexi nge “Endla Ndzavisiso,” i bulo ra swivutiso ni tinhlamulo ra timinete ta nhungu leri sekeriweke eka ku hlaya ka Bibele ka vhiki ni vhiki ni ku hlaya ka Bibele loku hetaka timinete ta mune.

2. Ndzetelo Wa Ntirho Wo Chumayela. Eka xiphemu lexi, swichudeni swinharhu swi kombisa ndlela yo dyondzisa eka riendzo ro sungula, riendzo ro vuyela ni le ka dyondzo ya Bibele.

3. Mahanyelo Ya Vakreste. Xiphemu lexi xi kombisa ndlela leyi hi nga yi tirhisaka ha yona milawu ya Bibele eka vutomi bya hina bya siku na siku. Xiyenge xa nkoka swinene eka xiphemu lexi i bulo ra swivutiso ni tinhlamulo ra Dyondzo ya Bibele ya Vandlha.

Vahuweleri emisaveni hinkwayo va kombise ndlela leyi va wu tlangelaka ha yona ndzetelo lowu va wu kumaka eka nhlangano lowu lowuntshwa. Makwerhu un’wana wa le Australia u tsale a ku: “Nhlangano wa Mahanyelo Ni Ntirho wa tsakisa swinene! Rungula ra kona ri fambisana swinene ni vutomi bya hina, naswona swingheniso leswi hi nga swi tirhisaka ensin’wini swa olova swinene. Minhlangano yi hatla yi hela tanihi leswi swiphemu swa kona swi nga koma, swi tsakisaka naswona vana na vona va katseka.”

Makwerhu un’wana la nga muhlanganisi wa huvo ya vakulu eItaly u tsale a ku: “Hi xiye leswaku nhlangano lowuntshwa wu endla leswaku hinkwerhu hi tsakela ku lunghiselela hi vukheta naswona leswi swi antswisa ndlela leyi hi chumayelaka ha yona. Nhlangano lowuntshwa wa le xikarhi ka vhiki wu kombisa ndlela leyinene leyi Yehovha a va dyondzisaka ha yona vanhu vakwe. Muhuweleri un’wana la nga ni malembe ya 15 u te: ‘Khale a swi ndzi tikela ku dzikisa mianakanyo ya mina eminhlanganweni. Kambe nhlangano lowu lowuntshwa wu ndzi pfune leswaku ndzi dzikisa mianakanyo ya mina eminhlanganweni naswona ndzi lunghiselela hi vukheta.’”

Ndyangu wun’wana wa le Austria wu tsale wu ku: “A swi nga olovi ku hlaya Bibele vhiki ni vhiki ni xinhwanyetana xa hina xa malembe ya khume. Kambe xiphemu lexi nge ‘Leswi Hi Swi Dyondzaka eBibeleni’ xi endla leswaku hi hlamula hi ntshunxekile. Sweswi hinkwerhu ka hina ha swi rhandza ku lunghiselela ku hlaya ka Bibele ka vhiki ni vhiki. Xa nkoka swinene hi leswaku vuxaka bya n’wana wa hina na Yehovha byi ya byi kula.”

Ines la tshama eJarimani u ri: “Swa ndzi khutaza swinene loko ndzi lunghiselela ni ku anakanyisisa hi rungula leri nga kona. A ndzi nga si tshama ndzi endla ndzavisiso hilaha ku dzikeke. Sweswi ndzi ni vuxaka lebyinene na Yehovha. Misava leyi, leyi lawuriwaka hi Sathana yi ndzi heta matimba. Minhlangano ya ndzi khutaza leswaku ndzi ya emahlweni.”

Mavandlha lama nga eSwihlaleni swa Solomon ma wu tsakela swinene nhlangano lowuntshwa wa le xikarhi ka vhiki naswona ma endla matshalatshala leswaku ma vuyeriwa hilaha ku heleleke. Mavandlha yo tala ma le tindhawini leti nga ekule leti nga riki na gezi kumbe Internet naswona vamakwerhu va kwalaho va hanya vutomi byo olova. Xana va swi kuma njhani switirhisiwa swo tlanga tivhidiyo ni ku tlhela va kuma tivhidiyo ta minhlangano ya nh’weti na nh’weti? Vahuweleri va le vandlheni rin’wana exihlaleni xa Malaita va teke xiboho xo tirha swin’we leswaku va xavisa tikhokhonati leti omisiweke. Va nyikele hi mali ya kona evandlheni leswaku va ta kuma xitirhisiwa lexi kotaka ku tlanga tivhidiyo lexi tirhaka hi matimba lama humaka eka dyambu. Leswaku va kuma tivhidiyo ta nh’weti ni nh’weti, vamakwerhu va ya endhawini ya le kusuhi laha va kotaka ku nghena eka Internet leswaku va ta kota ku kopa tivhidiyo, ivi va nyika ni vamakwerhu van’wana va le vandlheni.

Makwerhu la tshamaka eUnited States u tsale a ku: “Swa ndzi olovela ku dyondza hi swifaniso ni tivhidiyo. Emalembeni yo tlula 40 lama hundzeke a swi ndzi tikela ku dyondza. A ndzi fanele ndzi hlaya rungula ko hlayanyana leswaku ndzi ri twisisa ndzi nga si ri hlamusela munhu un’wana. Ndzi nkhensa Huvo leyi Fumaka hikwalaho ka tivhidiyo ni swifaniso leswi yi swi lunghiselelaka. Swingheniso swa tibuku ta Bibele swa tsakisa naswona ndzi rhandza swifaniso leswi nga eka swiyimiso swa minhlangano! Swi le rivaleni leswaku Yehovha u ma katekisile matshalatshala ya n’wina hikwalaho ka swilo leswi mi swi endleleke vanhu vakwe. Ndza nkhensa swinene.”